top of page

Chini humuku mukumuni kanmung tei swlaimung swkang bisi puila yapri sema tamkhe naidi

Updated: Jul 1, 2023

Kanchum tiprasa bosongni borokrogni kubwi soi simungni yarwng sakbaithak chorkha tanwi swnamwi yakbai takborokbr rirwtrak takgwi tei rignai borok takgwi tei kamchwlwi borok takgwi yakbai kamchwlwi borok bo swnamwi chumu oborog wngkha tiprasa rogni soi sinimung kanchumungni bagwi.Phiya joto dophao Tripura hasteo daldibal dophabai gwdalma yagolo haphai kubun bosongni borok rogni kanchumma gwrwngrog bo chini bwrwi buma tei skili rogni bisingtwikhe swlaimungbo chengsama tongo tei chini kanmungno borom bai kubunni bosongni kanchumni borokrog logio bwswk jora kubulkha tei wansokmung pherma tongkhe tamorog phaidi khwnalainai.


Tripuri Rignai
Tripuri chamathwi rignai

Bishram Debbarma, ani achaiphaimani nukyakho ani Babu songni amal o sut kanmani tei ani ama songno bo nukya saree kanmani phiya jephuru wanjwi dopharog Tripura hasteo tongthai khwlaina chengsakha aphuru simi twrwk twrwkhe chini borokrogni kanmungrog swlaijakma nukjakha.Tei abo tamkhe hinui sana kwlai kwbangma hatio thangka hinkhe swkang wanjwi dophani hati kotor aro thangkhe swkang kanchumni phalnok mokol o kwlaio tei mokol o kwlaikhe mokol Naithok no nukgwi bwkha o kwphawi muchungma phaio omohaikhe painanwi wngwi thango tei saree rog Pai naipai phano waisa wainwi kanu chini buma bwrwirog olokhe chini takborok nu kaham hinui yakbai takgwi kano.Tei chwngba nijini yakbai khwtwng swnamo chokha lubui tei hukgo tula khul kaimani amono chokhao lubmng lubmang khwtwng swnmamo tamokhe jora kisa nao tei kosto bo nango,haiphano aa jora rogo kosto no chini borogrog kosto hinui gosiya samung tangwi chana mungsa si lama hinui.


Tiprasarogni muchungma kanchumungni bagwi tamkhe saimankha, bisi 1900 rogo saree mang kanlaima chol wngkha swrapsa tangwi hinkhe hati rogo richum phalnokgo saree tubuo tei swkang wanjwi nu chini Tripura hasteo haphaima bagwi tei joto Thai kami amchai o borogni borok mangsi kuplung tei borogni tongmung chamungrog chinisai swkang chwngsajak hinui chwng tiprasa le suja tongjanai bwkha kaham kha kuwar borokbai kwthai tongnai hamya wansokya kok walai kwrwi haini bagwi khuk kwtwibai kok samarogno phwrwngjakma rogno gosiwi naharo daktino.Tei School bo kwrwi porina phwrwngjakgo wanjwi bosongni borokni jarwino puila.Abono kebono naithokhe kanchumjak ri kaham nukha khe chini bwrwi rogni bwkhao bo muchungma phayo haini bagwi chwngbo je chol phaimani abohaikhe nu saree kom mari rangbai manma bagwi paiwi kaijakphuru rogo kanjakha tei kanthokjaknairog hinkhe saree no mangno kanchumkha tei wansokma bo pherlaima bo nukjakha kanchumni jarwino. Sao Budhu Laxmi Debbarma.



Tamorog puila swlaijakha kanchum bwrwi bumarogni bagwi, naithokjakgwi tei samungo nangjakgwi paimani rignairog wngkha,saree kwchak kaijakphuru kano,mugli eba manipuri rignai yesi yagra thangphuru kano,tei taiti ni rignai bo kano phiya kom kanjakgo, Assamese rignai rog bo paijakgo,tei takborok chakma rignai bo pai kano chini naithokjakmani dalbidal rignai kanchum chumna chwng chajakgo tei kha kaham mungsa hamya wansokyani bagwi no paina bagwibo mungsa kha kesepya.Teibo tongo Sapa Saree abo hinkhe Kaisa niyom raida tongo Jamatia kailai pandao jamai bai kwina no twi kwthar luna thankhe ri kwthar jamai eba kwina ni buma bupha nograi twi lunai rogno kangsa kangsa borok thikgwi bakgo tei kom mario wanjwi dophani sapa Saree no rwjakgi samung nangma bagwi.Tei kuphur heleng saree bwrwichwk umor rakhakrogno paiwi rwjakgo kanthokma bagwi tei kuphur saree tei ri patla boini bosongni phano Tiprasarogni bai samung nangkukgo.


Chamathwi rignai tabokle bwswk jora borom swlaikha, chini rignai chamathwi kuphur tei kwchakbai kwswngjak rignai dalbidal khe takgwi kanlaio phiya tabokni mol o naithok kwkhrang kormo kosomkhe takgwi kanlaikha phiya kuphur chamathwisi chini soi nangma jesa pandao bo kotor,chikon tei kailai panda school ni panda tei chini langmao bwrwi wngkha hinkhe paithak joranu borom kotor manjak chini chamathwi rignai, Sao Bidhulaxmi Debbarma.


Chini Tripuri chamathwi rignai takborok soi sinimung puila achaiphai phuruni siming paithak langma thwi thangma yagolo bo bwrwi bwsarogni bagwi kanchumni mari tei borom rwma jeswk dophani kanchumphano chini kubui khabai borom rwmale takborok rignai bo nu tongnai.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.


Comments


bottom of page