top of page

Tipra Luku Bosongo Hangrai Ter Palaijakmano Rwgwi Kok Kisa

Pous talni paithak horni aichugono Hangrai ter palaijago eba khwlaijago. A salo thwnairogni bekerengrognobo twio khibiui rohorjago. Bamon montro samung eba porimani bisintwi thwinaini pholani bagwi hamari tei pholano kwthar wngnani bagwi surijago. Hangrai wngkha Hindu tongtharni (dormo) kaisa ter. O Hangraino kubun dopha bosongrogbo palaima nukjago. Baksa Hangraino Pouskranti eba Makar Sankrantibo hinlaio.

Hangrai phuru para ni borok rok kuthum laiwui maai chalaiwo

Hangrai ter okwra, cherai, chakwra jotono palaio. Hangraio aichugo twi tukulaio, twi tukubai paikhe chwrairog hwngkhe ma - pha, okwra- chakrarogno yakug suwi khulumo tei ruwai nalaio. Okwrarogkhe chakwrarogni thani ruwai nalaio, khulumo tei borom yapharlaio. Hangwrai ter no rwgwi tiprasa lukurog hangraini salsa swkangni sarikni simino awang suklainani chengo, lairuk eba thailik bwlaibaini awang bangwi khao eba swnamlaio jaterepod dale dalni awang swnamlainani bagwi tiyar khwlailaio. Mami guriyani teibo kwbangkuk awang khwlaijago. Okwra chakwra sandai gusti, takhuk bukhuk jotono ringwi hohom dodomkhe hangraini salo awang chalaio nwnglaio tongthothokhe o ter no palailaio. Tripuri bosongni borok dopha tongnairog jotono o ter no tongthothokhe palailaio.

Cherai eba sikla bodol rok som ni noksa tango

Hangrai ter no kaisa tongthothokni ter hwnwi mano, cherai chasolok umorogni bisingo Hangwrai ter no teisa judakhe nukjago. Hagraini sal phainani salsni eba salchibrwi swkanrogoni simino hangrai nok tangnani chenglaio tongthothokhe bayab chalai pal baksakhe hangrai nok tangnani bagwi tiyar khwlailaio baksaba wa tano baksaba nara rao tei baksaba wasok eba chonga thumlaio. Hangwrai nok ni bagwi thai eba jaga chongjago pukhuri gana haiyakheba twima eba twisa ganarogo. Tamoni hinba aichugo twi tukunani nangbai omohai thairogno chongjago. Hangwraini horsa swkangni simino, hangwrai nogo tongnani chengo. Chamungni bagwi jotono bayab chalaini bisingo kisa misa rang rilawi muikwthwng - thaikwthwi, muihan-tohan akorog hatio thawngwi pawi tubulawi o nogono songlaio, chalaio, rwchaplaio mwsalaio tongthothokhe hangrai ter no palailaio. Aichuk wngkhe toksa toktwi bachaya swkang eba togwla kochikyasani swkangno bachaui hangrai nokno sokchanani nango eba sokchaui rwjago. Aboni yagulo twi tukui a hangrai nok sokma ganao sal payasak arono tonglaio ulo sal pakhe jotono jani jani nogo kiphilwi ri kwtal chumui ma- pha, okwra chakwrarogno yakung suwi khulumo tei ruwai nalaio. Bayap kiching chalaisongni nok - nogo beraiwi awanrog chalaio. Chwrairogni bisingo hangwrai ter omohai tongthothokhe palaimani nukjago.

Hanrai ni phungo twi ma tukukgo tei noksa ma soklaiwo

Tripuri Hindu dharma palainai rok thwinai ni bekereng naragwi pujima raida tongma nukjago. Bekereng naragwi bisi khonchoryasak bekereng khibiwi rohoya. Baksaba bisisani kwbang narakgo. Bini yagulo sal kaham eba hangrai jorao twi o bekerengno kochogwi rohoro. Hangwraini aichuk jorao, bekereng rohormungni samung khwlailaio. Twimao wngyakheba dumburo bekereng rohojago. Bekereng khibithani thwinaini sandai, bwsa bihik, tei jati gustirog simi thanglaio. Bekereng khibiwi pai thwinaini pholani thani hamkwraini bagwi surilaio. Bekereng khibiui bamon ni montro porima bisingtwi twi o kochokrwi rohorjago. Oma tripura haste simiya patar hasterogobo khwlaijago. Banaras, kolkata omahai teibo juda juda thaio hangwraini bekereng khibimung raida khwlaijago eba tangjago. Tripura hasteni bisingo Dumbur tei chakmaghatrogono kwbangkuk lulurogno omohai bekereng khibinani bagwi thanglaimani nukjakkugo. Abono karwi baksa kami ganagini twima eba twisarogobo khibimani nukjago.


Hangwrai ter o baksa bekereng khibio, baksa takhuk bukhuk tei sandairogno ringwi chalaio nwnglaio, malai rurai nao. Chwrairokhe Hangwrai nok tangwi tongthothokhe tonglaio, omohaikheno hohom dodomkhe tripuri lukurogni bisingo bisi brum brum o terno palaimani nukjago hangrai terni jorao.


This article has been created as a part of the Adivasi Awaaz project, with the support of Misereor and Prayog Samaj Sevi Sanstha.

Comments


bottom of page