Chwraiphang simino chong nugui phaio chini Nai-Chuchu song kheto khwlai phaimani. Tabuk bw haikheno kheto o mai (paddy) kaio, mai rao khlaijak tongo. Jora thango jora phaio chini o haa oh tongmung-chamung joto swlaijak kha, haiphano chini Tiprasa rokni kheto khwlaimani tabuk phano swlaijakya kho.
'Mai' bisibrom no chwng huk oh kaima haikhe kheto o bo kaiwo eba bor o. Mai kaibai yagulo Aagon maso chwng mai ralainani chengo. Aphuro khe chwng yagu bai nogborog bai khe kheto nokhar laio chwla bwrwi joto mililaiwi. Janija chekhra tuiwi, maichu tuiwi bayarog kheto nokhar bai o. Habani ri chumoi parani sikla-sikli rok tei chakra rok thansa khe haba wngkhar laio. Mai basanai chwla rog hikhe baar ma tilango.
Mai ranani jora phaikhe nogni borok rok aichugo ma bachalaiwo. Pung digi samung tangkhe dakti samung paiwo. Haa nokphang himkhe tising khungsa nawui arw maicho-muicho, tui, kowai-phatui, chowag, daba duma tei chajaknai rog dawui ma tilango. Mai-mui bog charojaknai ata kathi, twi nongjaknai glass, chwak nungjaknai cup ma tilango. Dipor jora habani boroknw jekhepha mai phatisa ma chario.
Kani thaisa mai ranani himkhe 5-6 khorok borok nango. Haiphano kheto buchiwui yagu ma khilo. Kheto bw baksa twi gwnang baksa twi kwrui, baksa mai rokojak baksa mai kiyokjak, baksa mai kolok baksa mai bara. Bono nai borok ma tilango. Masing jora saal bw bara, bono nai phung damsichar (8 AM) bajekhe haba thangbaio, sarwikhe damsibrui (4 PM) eba damsiba (5 pm) hmikhe haba kasa oh. Sal kaisao wainui ma lengla laio, satung tongkok khe waitham waibrui fano ma bathak oh. Haiphano chini baya rog satungnw satung hinyawui, watuino watui hinyawui mai ralai wo.
Mai ratwtwi chwng rwchapmung rwchaliwo. Mai rani kwrwng rani rwngyano phwrwng tisawo. Borogni kwcharo khe naikolo. Dipor jora sokphaikhe bolongo jaga kaham naitugwi buphang saklom naithok lengla laiwo. Aro no mai bo chalaio. Je chwak nungnai nungo, mwsanai mwsawo. Chwak nungyarog khe mai chawui nungnai rogno naising hahai baksa khe haba nokhar laiphiwo. Tongthothok chathothok kheno koisa buini sai bara bw ma tangya kom bw ma tangyatui khe naisinglai naisinglai khe ma tanglaio. Haikheno haba ma tisawo.
Mai rabai salnui saltham kakhe mai basani hi yagu nai mai motha ma kho. Mai motha khaibaikhe mai basanai rog bw baksa khe chwla bwrwi thansa khe mai basanai faio. Bwrwi rog hikhe bokhorogw rujuwui tilango, chwla rog hikhe baar bai tuiwo. Haikhe no hala haphung kasawui mai ma rwka laiwo. Lama hamya sorthai simi, yakungo juta kwrwi haiphano mokhang nailai mwnwilaijak kheno haba ni bayarog samung tanglaiwo. Bahaikhe daiti pai nogo thangmanw bono nai borok daiti samong tanglai oh. Kheto nogbai hachal bw tongo sampha bw tongo. Hachal hinkhe kosto mankuk oh, borok bw kubang nango.
Mai tisabaikhe mai nagna nango. Tabokni jorawo khe machine bai si mai nago. Oh machine no nogo toboi mai ma nago. Habani borok joto khe, habani dol kotoma ba daiti samung pai thango. Haikhe nokhwla oh mai tisai oh. Haa kwbang hikheba mai bw kwbang mano, haa kisa rog hikheba mai bw kisa mano. Haiphano watui phaiyakhu swkang hinoi bono satungo lamui doll oh dao jate mai eyang ayang kusarya na tui hinoi. Haikhe no chini ha ni borok rog bisi kwrwngrowui mai chalai oh.
Haikheno chini Tiprasarog aigeni sirisiti no komorya khe kheto khlai mai chalaio. Jora bai jora kwdal riwui watui nokbar manjakya na tui khe kheto ni mai tisawui rondok nw mai kupulong khe tongro oh. Chati sogui tongo je mwtai chongno teibo naikhlai di hin. Nokhong kwchang roi tngrw di hin.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi Sansthani chubamungbai.