Jamatia Rok Ni Songkiton Rolai Mani Bising Bwraini Kok

Chini Tripura haste go Sonkitan rolaigwi eba palai jakgwi faimani mari chini jotto dopha gonw nukjak gw. Fiya ba o kokbwkhal ni bisingtwi Jamatia dophani Mayungtwisa kamini Sonkiton bodol rok ni samung no silainai.

Sonkitan bodol hopung aiwui rwchaablaiwo

Songkiton Jamatia dopha go aigi ni siminno palaijakgwi faikha. Omo boforo ni simi pailai jakgwi faikha kebo kahamkhe saigwi maya. O Sonkitan ni naharmwng wngkha mwtaini mwngbai mwtaini kokthai tei mwtaini rwchamwng no phulok gani, kaham wansok lai gwi tei kahamni lamago yapri selainani.

Songkitan bebak jaga gonw rogwi mano nok kerthani, puja khlai thani, abur sulaimwng pada, tinratri, shrado tei kwbangma (etc.). Sonkitan roya kho swkang songto bodol rok mwtaini mwng bai posa khalaisa barok go.

Aigi khe Baba Garia ni mung twi no Songkitan rijaago

Nok kerthani Songkitan rolai mani kokbwkha (reason) wng kha mwtaini mwngbai o nukhung go hamkhwrai magwi , dondo dosa, biyal kangal khe matongya na twi hwnwi mwtai no khulum sagwi rwchapmwng rwchalai gw. Chwrai achaimani yagulo abur suthani wo bo Sonkitan romagw, chwrai ayuk thaluk magwi sak kaham khe matongwi thanglang thwng hwnwi mwtaini mwng bai surimwng pada khwlai jaago.

Tin-shrado go songto romani kokbwkha(reason) wngkha khajani borok thwinai ni phola tei bo jejaga tongwi bo hamkhrai magwi matong thwng hwnwi mwtaino khulum samani tei afuro mwtaini rwchapmwng rwchagwi songkirton bodol hopwng aigw.

Borom gwnang aani aama tei baba Purnini Jamatia tei Hiran Joy Jamatia bo Songkiton bodol ni logesong. Borokno karwi bo Mankishor Jamatia ni khuk twi ang o kokbwkha rok saimankha. Borok sakha salgo khe samwng humung tong mabai Songkitan eba kirton horo rojak kuk go fiya ba sal go bo roi mano. Songkitan bodol rok songto romani bising twi khakaham, kok kaham fulok go eba pirgo kwchang no kwchang huya kutung no kutung huya khe. Fiya yagulo borok kunu naya twbw saya.Fiyaba nokphang buchimani bisingtwi nokphang muchuk khe ba je chuktwi dokhina rohwi mano.

Songkitan rwchaabmung rimani swkaang maikhlai barogwi mwtai no suri jaago

Borok bai baksa Songkitan rothani go jotto borok eba jefa borok gwthalgwi mano mothani borokno sagwi. Borok aigewo khe mwtai kotor Baba Garia ni mwngbai Songkotan rolai gw. Baba garia wng kha belaikhe no ker kwthar tei kwbwi. Takhuk Mansing Jamatia samani mote borok tabok Padma Shri Beni Chandra Jamatia ni bijab ,Kokborok Dormo Lambai' ni rwchamwng tei koklop rokbo rwchalai go.

Ang khakhlai go o kokbwkhal (article) ni bising twi norok Songkiton tamono hu, tamoni bangwi palaijak eba rolai kahamkhe saimankhwna hwnwi. Ang o kokbwkhalni bisingtwi jotto nonw khakaham, kok kaham tei khulumwng yafar go. Hambai.

O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.