top of page

Kwmana Ni Lama Thang Tongkha Tiprasa Rog Ni Chamung 'Muimasing'

Bharat haa kotor ni bising khopjak Northeastern region ni chikonsa haste wngkha Tripura. O haste kwcham jora ni simi Tiprasa rog ni jaga eba thai hinwi swrai swrai khai sinijagwi tngw. Phiya ba jora swlaijakma bai baksa gwdalui o haste o kwbangma bosong ni eba kwbangma dopha ni borok rog bo tabuk tongwi tongo.

Masing ni mamblai sai kothok mui bisingo muimasing bo duljago

Kwcham jora ni simi chini Tiprasa dopha o huk ty muikwthwng-thaikuthung khwlai lai chamani swrai swrai khai nugui phailaio. Jora by mwchang riwoi hathai kupulung huk tei muikwthwng-thaikuthung bai chwnajak.


Kami amchai rogo kwbangma chini bosong ni borok rog swrwngmung ni biyal o kwlaijak, sal phaikhe borok saakni chana ni bagwi huk o mang samung ma tanglaijao, muikwthwng-thaikuthung kailaijao. Baksa ba niji chana bagwi muikwthwng-thaikuthung kailaio baksa ba hatio twlang phal laio. Phiya ba kwbangkwk borok noh hatio twlang phal laio, tangwi hinma le borog aa muikwthwng-thaikuthung phalmani rang bai c nok ni bagwi je nangkuk mani ri-chum rog pailaio.


Chwng joto noh saimano chini Tripura haste ni haa belai khai kaham, chini o haste o muikwthwng-thaikuthung, hukbar, kheto tei kwbangma chajaknai manwi rog kaham khai noh achaio, watwi bo jora bai gwdalui noh phaio aboni bagwi muikwthwng-thaikuthung khai nai rog tei hukbar eba huk khai nai rog kaham khai khailai mano. Chini Tripura haste huk tei muikwthwng-thaikuthung ni bagwi alka phatar haste ni borok rog bai sinijagwi tongo. Aro ni bising Kamala(Orange), Rubber plantation, Anaroso (Pineapple), Thaipung(Jackfruit), abono karwi bo muikwthwng-thaikuthung ni bising Muimasing, Phantok, Muilok eba Milok, Chakumura, Khakulu, Kosoi, Siping teibo kwbangma dal bidal ni muikwthwng-thaikuthung chini borok rog kwcham jora ni simi khai phailaio.

Para rogo jotto ni nogo no buphang phangsa phangnwi kaijak manthogo

Chini Tiprasa rog ni chamung rogo bo bui bai sol lai ya hinwi chwng sawoi mano. Chwng saimano buini haste eba kotor kotor dohliyung (big city) rogo jora bai mwchang ya muikwthwng-thaikuthung maanmani tei chalaimani. Phiyaba chini dophao eba Tiprasa bosong o chwng jora bai mwchang ri woi muikwthwng-thaikuthung chalaio. Chwng masing jora ni muikwthwng-thaikuthung tei sachlang jora ni muikwthwng-thaikuthung alka alka chalaio. Chini Tiprasa bosong o Masing jora ni muikwthwng 'Muimasing' joto Tiprasa noh chalai na bagwinasing lai tongo. Masing jora ni salo siyari lob lob kwlaijak o jorao noh chini Tiprasa bosong ni borok rog o muikwthwng noh mui song chana bagwi khaklaio.


Masing jorao noh o muikwthwng manthokgo aa bagwi noh obo ni mung 'Muimasing' (Masing jora ni mui). Masing jora phaikhe chini Tiprasa bosong ni borok rog o 'Muimasing' noh jatre-pod khai mui song chalaio. Baksa ba Muimasing Mosodeng chalaio, baksa Muimasing awandru chalaio, baksa Muimasing gudok chailaio, baksa ba Muimasing chakhwi chalaio.

'Muimasing' chini Tiprasa dophao kaisa traditional chamung hinwi chwng swrai swrai sawoi mano. Phiya ba twrwk twrwk o chamung rog joto kwmai tongbai kha, tangwi hinma le tabuk ni jorao joto borok phatar haa ni kanchung-chummung tei chamung rog twrwk twrwk adopt khailai tongmani chwng kaham khai noh saimano, aboni bagwi chini Tiprasa dopha ni chamung rog twrwk twrwk kwmanani lama thang tngw.


Aigi ni sal o chwng muimasing no berama butui, mosodeng, tei awandroo swnamui chawo. Tabuk bo chana nango. Chini o chamung rog noh khati narakna bagwi chwng kwbang kwbang chamung ni ter eba Food Festival ma khai lai nai. Chini o Muimasing bai swramjak jak dal bidal mui bahai khai tebo luku rog ni bwskang o pirwi maan chwng ma chaitoklai nai.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.

Comments


bottom of page