top of page

Nakri Mwtai pho mani Raida

Updated: Nov 18, 2022

O swngsaro Chwng borok rog samay ni loge Gwdal oi himna thang thani kubangma manwi chokrai thang jak o.Phiya baksa manwi kwcham chini loge tongwrk oi phio.Thik bohai khe nw chini Tripura haste o, Jamatia Hoda o kaisa nakri pho mani raida nw twi duloi tong kho.Kami ker thani hinkhe Luku samwng haiya khe ba Ker mwtai romahai khe nw nukhungni bangwi hokhe Nakri phowi phai aghini simi nw.


Nakri Mwtai palai mani ungkha je chini Nukhug hamkhrai tei ker kwthar ung wani bangoi. Kami amchai o luku humkhrai ni bangoi luku ni Choudary ni nokla o chaitra mas ni yagulo Nakri mwtai nw pooja khlai oi achak ragw. Baksa nukung o ba sak chorai pha si Nakri mwtai nw palai bai o. Ochai raida ni bwkhaktwi Nakri mwtai kaitham dalbidal tongo Burasa Nakri ,Thunai rog ni Nakri tei Boni rog ni Nakri. Chini Kami amchai o bomu Nakri achak ri nai abo ochai sema swng oi je gothok jak ma ni abonw nw achak ri o.



Borasa Nakri mwtai hmkhe kongsa nw wa, bono chwng kaitham sikambuk kolog ni gogra kan ri o, khum ni jaga o toola ni mala kan ri o tei ri ni jaga o khwtwng kosom tei khwtwng kuphur bai raph oi borom ri o.


Thunai rok ni Nakri mwtai khe kainwi wa bai khe achak ri jak o,bwta bai buphayung. Okra Nakri nw khwtwng kwchak tei kuphur bi raph oi ri kan mani borom ragw, khumni jagao toola bi mala kan ragwo tei kaitham sikambuk ni gogra kan ri oi ragw. Kushu Nakri nw hokhe khwtwng kuphur bai simi pha oi rogw, tola ni mala tei kaitham sikambuk ni gogra kan ragw.

Boni rok ni Nakri mwtai bai Thunai rok ni Nakri nw borom ri mani pher lai ya. Obo hai khe nw okra nw kwchak, kuphur kwtwng bi tei buphayung nw kuphur kwtwng bi raph oi borom rwjak o.


Nakri bahai khe pho-Luku hamkhrai ni bagoi Boni rok ni Nakri nw kwbang kuk palai jak o.Nakri mwtai nw luku amchai ni ochai scho scho bwchwlwi bi wa tola o sikambuk kaisa ragwi kubuksa blai, khai moslog blai, laitro blai bai khe kha wi tei kongthai porei pharuk Kai nwi eba baksa toktwi Kai nwi bi pooja ragw. Omo ni pore ha bwsng o kisa khe Nakri mwtai nw pho oi ragw.


Paithak o sathai kwlaio omo hai khe nw chini Kami ni borok rok naithok khe agei ni raida nw twi dol oi tongw. Phiya tabok Kami o bisi bwrwngnw Kami ker phanu nok khermwng haiya khe ba Nakri pho mani kisa kesewi thang ha. Uchai Nandi Gopal Jamatia tei Uchai Krishna Kumar Jamatia samani bisingtwinw o kokbwkhal swijakha.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



1 Comment


Geo Southgoa
Geo Southgoa
Dec 14, 2022

Would like to read it in english. Keep it up Biswa... Would like to see more pictures and more articles from you..

Like
bottom of page