top of page

Tiprasa Sikla Rangmari kisa baino Baniyan khaina yapri sepkha Manoranjan Debbarma


Tripura haste ungkha kaisa chikon haste - chwng jotonw sawi manu, Ora tongw kwbangma Niathok nwkthok, Beraithai rok, Laibuma thai rok. Mol swlai jagw wanswkmwng bw swlai jagwi nw thangw Tripura ni luku roknw wanswkmwng bw. Kwbnagma Sikla sikli rwngswrwngmwngw gwdalwi tongnai rok jora swsbaiwi tongbaio, bahai khe kaisa Haphangni sevak ungna sep manu hinwi. Phiya tabokni jorao biyang aswk haphangni sevak manthok omo haikhenw Tripurani kwbangkwk sikla sikli bw tongw sak saichung bachana naharmwng naharwi hingnai borok bw. Omo hai kaisa koktwma kasawi phaikha rangmari kisa baino baniyan khaina chengmani. Phiya bwswk hachalo o samwng thangnai o Siklasa nw sawi mansinai. Omo haikhenw khoroksa Bishramganj amchaini Twijil kamini sikla chengkha Mum swnam rangmari kisa swbaiwi nw mwng ungkha Manoranjan Debbarma.



Bahai khe Mum swnamna chengra kha?


Manoranjan sakha swrwngmani yakulo bw samwng hwmwng naitwkna chengkha DigitalnMedia hai rogo, aphro naitwk mankha rang kisani bisingw baniyan chengna kaisa samwng. Bw Youtube naiwi tei bw idea mankha samwng kwlai tei rang kisa swbaiwi phanu saksaichung bachana sep. Bw makha Mum swnamna idea. Mum swnamna idea manmani yakulo bw idea nw mwktham swnamna kisa phanu ler liya, waisa baino samwngw nw yak pholokha.


Mum swnam na manwi khuknwi boro manthok?


Bw tei bw sakha Tiprasa amchai belai bisingni bangwi gana gini hati rogo bw manthok ya manwi khuknwi. Mum swnamna kwlai phanu manwi khuknwi khe Rajakhor Aguli o nw phaiwi manaphaio hinwi sakha bw.


Manoranjan bw o samwngnw chengma aswk le dwk yakhw phiya boni naharmwg baniyan nw bahai khe kotor khe tisana bw nw boni chaitokmwng hinwi sajakha bw. Tabok bw hati rogo bwswk phal manu mwngsa saiwi manya khw. Mum packet thepana bw sakbaithangnw khaiwi tong khw sakni yakbai. Aswk rangmari bw swbai manya khe packet machine thepana bw. Bw tei bw sakha luku rogni bwskangw teibwi kaham khe samwng nw khaiwi tisawi phunukna.



Machine paina bwswk Investment nang?


Manoranjan Debbarma sakha bw rang mari kisa bai nw baniya o okhar mani machine bw kwlai baino chengra kha. Bo boni machine nw 3000 rang mari swbaiwi online twi nahar mani. 3 inch mum swnamjaknai machine ni rangmari aswk kwlaio aswk hinkhe 6 inch swnam jaknai machine hinkhe tei bw kwbangma rang mari kwlai thangw hinwi nw bw kisa baino chengra kha. Tabokswk jora bebagwi bw investment khaikha 8000 ni sai kwbang, Ora Mum swnamna thang thanio tei bw manwi khuknwi nangw - Color, khuktung nangw, paraffin wax (Raw material) nw KG bainw paina nangw. Tabok Raw material bw kwbangma rangmarini quality bai manthogw kaisa ba 150, 180 tei 200 hai kwlaiwi tongw tabok.


Manoranjan Debbbarma sakha tangwi Mum nw baniya khaina chongwi naharkha hinwi, bw sakha tabokni jorao bebakthaio nw nangkhw Mum. Mum tabok bw mwtai puja rothanio belaionw nangkhw Hindu dharma o simiya, Budhistb o bw nangw Muslim o bw nangw, Christian sharma bw nangw Mum tei nogo chati mwchungna bw nangw Mum. Bw tei bw sakha omo bwswk kaham ungnw tabok bw saimanya khw bw phiya khathangsama bisingw nw o samwngnw yapri sepkha bw.


Bwma bwphani yak pholokmwng tabokswk jora kaham nw manwi tong khw, phiya thaisa kok sagw bwma bwpha bai khaikhe khaikha kaham khenw khalogwi khaido hinwi. Ordek mordek rok khaiwi yakarta rodi hinwi. Tabok swk jora bw Mum ni mwngbw phar jak yakhw, phiya thingnangw bw sakni kaisa Brand swnam nai hinwi wanswk jak.



Hatio tikhlaina hinkhe license de nang?


Jepha manwi nw no hatio tikhlaina hinkhe kaisa license nangw, License kwrwi manwi khuknwi phalkha hinkhe thinangw kwbangma jwngjal phaiwi manu hinwi sakha bw. Haini bangwi jepha khenw license bai nw samwngnw chengmani kaham hinwi sakha bw.


Salo kaibwswk swnam man Mum?


Salsao Full Time naiwi mum swnam kha hinkhe waisao 66 ta mum swnamwi manu. 1 ghanta hai naiwi khaikhe nw 600 ta hai mum karewi manu. Tei salsao 2000 sai kwbang tikhlaiwi manu salsao tei packet thepana rok bw jora manarwgw hinwi sakha bw. Bw tabok phanu yak bai nw sanamwi tong khw. Bw tabok salsa o 3 tei 4 ghanta nawi samwng khai tong khw.


Tabok jotonw sakbaithang bacha thanio yapri sepna chengbai kha Sikla tei Sili rok. Omo haikhe nw omo bw kaisa phunukmari ungwi tei bw Sikla sikli swrwngmwng lengla jak roknw khasotonthung.



"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



Comments


bottom of page