Tripuri dophani Debbarma hinui mung sinijaknai rog Kailai panda khwlaima rogo hohom dodom khe palailakjakgui tongo tabokni jora rogo.Hindu eba mwtai no maninairog mwtai palaijakmani joto bwkhak phasingtwi nukjakguino tongo. Honiboro mwtai,ker mwtai, bosorni samung tangjakphuru mwtai rwlaijakma abo haikhenu Kowai tanma talo bo mwtai rwlaiwino Kowai tano hinui saimano. Oh Kowai tanmani bahaikhe tanna kwlai bini raidarogno tei Kowai tamni tanna nang aboni kokthairogno khursawi kahamkhe saimanlainai.
Nukhungni bubagrarogno sajwla ni Kailai panda khaina ni swkang tamo tamo raidarog palaijaknai tong, Ang swngka?
Jamai ni buma bo Sao, Taklai 2022 bisi sokphaimani Ani sajwla kusuni kalai panda khainai 11th March o.Tabok Kailai panda ni swkang kaisa raida ma palaio eba ma khwlaio abo wngkha 'Kowai Tanmani'. Oh raidano kebo Kailai pandani 7 din swkang khwlaio kebo 5din tei kebo 3din swkang Oro din bejor nainw ma tank 'Kowai Tanmanrogno' Chwngkhe 3din swkang tannai hinui chonglaikha.
Kowaile sabo tannai tei tamkhe Kowai tannai?
Jamaini Buma Sao, Kowai Tanna bagui borok khoroknwi borogno kobokgui kabojak tongo tei borogno tanphainai.Ah kobokjaknairog ani nokgo Kowai Tanna phaiphuru Mai Chaya tei twibo nungya omohaikhe ma phainai.Kowai tamkhe tannai abo Kowai tannai borogni raida no nairwkgui saimananu tamni hinba raida wngkha kokthai kwbang abo waisabai nukyawi Sana thangkhe kok koronai eba bujirwi mangwlak,haino bagui swkang nukkhe siwi thanganw tei bujibo mananai.
Kowai tanna phaijaki Kanduri Debbarma tei Pushpa Rani Debbarma borog khoroknwi, Pushpa Rani Debbarma Sao,Tini chwng matwi swkang rwnai abo mwtai wngkha kaijaknai khoroknwi bagui.Koroknwini God swnamjaknai khoroknwini mungui yagra phasing bwrwi tei chwlani mungui debra khwlai chini phasing bwskang naharrwi tei chwng jesa mwtaiphano rwna swkang sal pama phasing God ma achuk rwo.
God swnamma raida rog bahai?
Pushpa Rani Debbarma Sao, Talik bwlai tanwi Twi kaham khokgui sutroi nao swkang abono bowl rwjakgo mwtai sajokna bagui tei twi nwngma glas aro Twi kwtahar rwo Twi aro sindor ni phota pholwi rwjakgo,Twi Kwthar rwjakgo thaichuk bwthai thaijak buphangni bwlai bosok bejor khwlai rwo abono God hinui mung rwjakgo oh God no chamathwi bwsa ri kwthai bai hungrwi rwjakgo chwla tei bwrwiniungui.Tabok God bwsakango phatwi bwlai laisa aro saka thalik tei batasa bokgo.Tei bini bwsango teisa thalik bwlai bosok bowi rwjakgo aro saka phatwi laitham te Kowai 3ta bejor tei khum bokgo.Tei waisa haino hai bini tola o Phatwi laitham tei Kowai 3ta tei khum bokgui rwo,tei sorta kainwi God phasing tonuirwjakgo.
Chwlani mung tei bwrwini mungui God phasing moi songphuru rwmani Gorom mosla 12 prokar abo bokgui rwjakgo tei debra phasing laio khe sindor,tabok dupkathi logi tei twi twi kwthaar jugalwi khulumna swkang durpa bwlaibai sarsana bagui,abo wngkha mwtai rwnani bagui bebag jwgalpaikha.
Chwak tei 2ta chati sok gwnang abo tamo ?
Kandurii Debbarma, Chuwak rwma wngkha chwng chini Tiprasarogni kaisa sinimung hinui mano eba chini dophao chuwak borokrogni mungui mwtai barokjakha hinkhe abo je borok chuwak nungma abono nasikgui chuwak ma rio.Chati sok gwnang kainwi abo wngkha naimani chati phwnangui borog khoroknwi sabo kwplai tei kechen,aro je ni swkang chati thwinai bo kechen tei je chati chwngui tongphwlainai bo kwplai hinui romjakgu.
Kowai tanmani tangui tanna nang?
Kanduri Debbarma, Chwla bai bwrwi ni kaham hamya naina bagui tanjakgo.Borog khoroknwi kaisa tongmani kwnwi wngna thangtani bwswk joratwi kaham nukjakna tong tongya.Abono Kowai tanma ni bisingtwi nukjakgo,tabo Kowai kaisa philjak tei kaisa kholopjak hinkhe kham.Tei Kowai Tanna hinkhe chwla ni swkang tano bini paikhe bwrwini phasing tanwi mano.
Mwtai rwphuru jugalimani da swkang eba Kowai tanmani?
Pushpa Rani Debbarma, puila twi Kwthar sarsawi khulumu khulumbai jwgalio waitham khe jwgalpai teisa khumulumu abo haikhe wainui Pai Kowai tano.Paithakgo Kowai tanmanui Pai paithak Twi sarsawi khulumu khulumbai jugaliwi abo haikhe waitham twi sarsama kwlaikhata hinkhe mwtai tinini Kowai tanmani mwtai rwbaikha.
Tripuri dophani Debbarma bosongo palailai phaijakmani siri siti ni mukumrog taboksak jora dalbidal tongoino tongo. Luku panda kailabari Kwthar khe palailakjakgui tongo abonibo mwtai rwjakgo.Tei Kowai tanmani kaisa nangkukmani mwtai rwlaijakma bini raida rog nobo chini phainai tal ni chalairogbo saimanna nango.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"