top of page

Tripura ni lukurok bw bithi chawi Sugar eba Diabetes bathakrwi man

Updated: Nov 22, 2022

Tripura hasteni Tiprasa wngui hasaka achai phaiwi thangui thana bangwi chini chamung nungmung kaham khe chawi thangna nangw belainw.Tei hamya chamungno chwng chaya, phiya chamung kaham chathani bini kaham hamya bwswk joratwi bono saimansokya chini luku rokbw kwbangma tongw. Omo hai wngui chini jora jora karjakma rog sai marwkya omo haikhe nukjakma baino sakgo bemar bumuk khawi kaksokya bebar kwphama nukjakgo. Jeswk thaio tongwi tongwi tongnai luku phanosi o bamarno manjagwi thangw. Chini kami bolong amchaio manjagwi bw tongma nukjago kwbang no Tiprasa borok rogni bisingw bw. Tei chini bolong mura hathai bai kwrwngjak abohai Thai bisingo manthokgo dal bidal bumuk bemarni bithi bwrairog.'Duksa Songdari' mungui bithi mungsa manthokgo kami bolong ganao abo wngma Sugar eba Diabetes no bathakrwi tong rio. Phaidi o Bithi no sinilainai tei bono bahaikhe chawi man.


Ani ama Bishu Laxmi Debbarma oh bithino naitogwi nahawi bithi swnammo bahaikhe bo sao,"Murduk bithi hinui saimano tei Duksha Songdari' hinui hinjakgo o bithi ni mung. Je borok Sugar wngjagw borog kwkha jeswk chawi Mano aswkno kaham hinjakgo tangui hinkhe Sugar wngkha kwtwi no hinjagw bo kwtwi chakhe bario tei kwkhasi chakhe bini sakni bemar bariya wngnai.





Tabok bithi no bahaikhe Cha hunke abo swkang bolongo thangui naitogwi naharo. O murduk bithi buphang kuchuk Kotor rogo kwswngui tongo. Bolongni khagwi tubui omono siriwo tei sirikpai bara bara khe rasuwi togui bwtwi phairwo, aboni yagulo Twi nung jaknai Twi kaham lota o tisao, Aboni yakulo khe o bithi tokjakno chomwi tonu. Bithi chomwi tongma horo chomwi rwkhe phung ai kheno nungui eba 3 gonta kebengui phano nungui mano, jeswk murduk bithi ni bwtwi twio o kwlai tongkhe kaham wngw.


Sabo sabo o bithino nungui sakni kwtwi bemar manjkma bathakdro wngkha?


Chayan Debbarma ani nukhungo ani bwsai bo kwtwi no bemar o kwlwkjak bo Dr. Naijakgui bithi bo chai tongo kwchar kwcharo jora mankhe eba belai barijakma hairog wngjakhe omo Murduk bithi nahawi togui ma khanrio.Tei ani buwai jwk bw haino Kwtwi ni bemar manjakjagw oh bithino tal kwbang romwi nungkha hin Sao tei bo nungui kisa komijakma tei sak kaham wngjkma hai wngo hin sao.


Bithi ni thokmale bomhai ?


Puila nungwi ang tabok naimao kwkha hinui saimankha. Bwi je nungnai rogni khugo khwnao tei tabok ang nungui naimabo kwkhanu ma nungw tei omo aswkhe kwkha hinui ang saimaya belai khe nw khao.


Talbwswk romwi nungna nang o bithino?


Tal baryawi balogwi kisa nungui mankhe he kwtwi bemar manjak nairogni bangwino kaham. Phiya aswkno je kebo borok kwkha nungwi maya hinkhe tal barwi phano nungui mano.Tobo nungna nangnai kwkha phano tangui hinba Sugar eba Kwtwi ni Bithi bwrai hunkhe bebakno kwkha nu wngnai. Kwtwi bemarni bithi kwkhano wngnai tei dalbidal obono karwibo kwkha bithi bwrai tongo tei bwthaibo tongo aborogno o kwtwi bemar manjakgui tongnai nungui mano. Dalbidal bithi bwraio ni bisingo 'Duksha Songdari' mungui bithi o kwtwi bemarni bangwi kaham sinimung wngkha tei je lukurog o bemar bai koboljak borog o bithino nungui mano.


Tripura hasteo aghini srisitini siminw omo hai Bithi wathi - Bonaji rok bogwi phaio tei tabok bw nwkjagwi tongw. Omo haikheno kwbangma beramni bithi manthogwi tongw tabok bw bolang halongw rogo. Phiya tabok omo hai sai manjak borok rok kwbangma langma yakar langma bangwi komolna thangwi tongw. Sibuk swkjakma bithi, yathei baima bithi, kongrai bithi, luma bithi bebaknw tongw tbaok bw. Phiya bono narwgwi tongna hinkhe swrwngwi ma narwknai tabokni jorani luku rok.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.




コメント


bottom of page