top of page

Chaitokmung tei naharmung wngkha thinangni kwchwng athukiri-Mithun Debbarma

Adivasi Lives Matter naiwi tongnai eba Article poriwi tongnai joto hayungni lukurogbai baksa chwng chaitogo India ni kaiba hasterogni Adivasi hinjakrogni dalbidal kaham hamya kokthumno swrai swrai khwlaiwi phunuknani. Phaidi hinkhe India ni kaisa hasterogni bisingo Northeast Tripura haste ni bwkhak naisigwi naialainw. Tripura haste o jora belaino changdodor boyar sibsajak. Bharat ha kotorni Bollywood tokey mwsakwrwngrog kwbangma tongo. Borog jotono baksaba Miss India hairogo himjak tei kwplai wngjak. Abohaino Tripura hasteni puila participate khwlaiwi puila sokat manmani Mithun Debbarma 18th Rubaru Mr. India 2022 championship.


ALM – Rubaru Mr. India O sokat manwi bahai wngjak?


Mithun sakha Puilano ang sana muchungo ang 18th Rubaru Mr. India 2022 championship participate khaimani abo ani borogni bagwi khao eba chini Tiprasa ni bagwi eba ano logi rwnairogno molbrumno ani khao tongnai. Tangwi hinkhe omor chichar wngkha ROBARRU Mr. India o Tripura ni chwlarog kebo khoroksabo kwrwngyakhu abohai thairogo. So ani chaitokmung National Platform thangwi chini borogrogno represent khainani. Agini simino chaitokung tongo tei ang thangwi aro kahamkhe platform khai manmanibai mark kwbang narwkmanibai ang tini Mr. India hwnwi sinijakha. Ang belai kheno tongthokgo lukurogni hamjakma manmani bagwi. Ang kha khwlaio bwskangni salrogobo ang abohai bataimungrogo teibo kwrwngnai tei lukurogni chubachu mananw hwnwi.


ALM – Mr. India kwplai wngnani bagwi naithok da wngna nang?


Mithun- Hambai ALM ni kok swngnaino ano o kok swngmani bagwi. Kubun bororok wansugo Mr. India o thangna hinkhe ri-chum, kanmung chumung akorog naithok wngnani nango hwnwi. Camera bwskango himnai abotwiya. Soi soi thaio thangwi sogwinani eba finalist o thangwi sogwinani swlai swkang ang puila 8th round show khwlainani nangkha. 1st round total entries wngkha khorok thamchisai(30,000). 2nd round khorok nwichisai (20,000) abohaikhe khaikwlaijak mangno tini aswk jora kwplai wngwi norogni eba lukurogni hamjakmungno puila thai swnamkha ang. Chwng kwbangma Videos akorogbo swnamnani nangkha. Aborogni bisingo tongo “Drugs" no twiwi awareness, bahaikhe bororokbai kokrog sana nang eba Communication skills tei State Representation akorog khainani nangkha.



ALM- Nini mangpili o nukmani Cultural twiwi ri-chum tangwi?


Mithun- Wah waruk chini Tripura hasteni bisingo 6th Schedule areas o simi kwbangkhe nukjago. Wah waruk chini dophani bagwi belai nangkuk. Aboni bagwi ang chini wah waruk tei ri chum eba takborok ri chumwino ha kotoro phunukna muchungmani. Tei khaksa bwkhak ang joto videono mansak chaitokha chini Tripura hasteno phunuknani. Paithak bwkhak chini Tripura kaisa iconic thai hwnwi sinijak bugra molni yakbai Nuyungma(Ujjayata Place) phunuknani chaitokha tei phunugwibo rwkha ang.


ALM- Kokborok Industryo kai bwswk Music Video khaikha tei Films akorog?


MIthun- Kokborok Industry o tabuksa jora aswkto buini hai khwlaiwi kwbang wnglak ani tei kaisa Tokey khaikha. Mung Majra Saboni. O tokey belai nangkukjak Films Industryo tei hoda, nukhung, hamjaklaimano twiwi khwlaijak o tokey. Langmao anibo kaisa belai nangkukjak wngjakha o tokey o. Tangwi hinkhe o tokeyno ani langmao puila thai swnamkha tei lukurogni hamaribo mankha. bwskangni salo lukurogni bagwi teibo kaham khwlaiwi khwlainani chaitoknai.


ALM- Rubaru Mr India ni bwkhaktwi thinango tamo tamo khwlaijakno?


Mithun- Bwskangni salo Rubaru Mr India ni bwkhak ang khoroksa kwplai wngjak wngwi dalbidal project o samung humungrogni sep manai. Abono karwibo ang khoroksa Tiprasa wngwi bwskangni salo aboni bisingtwi bahaikhe chini kanmung chumungrogno hayung kotoro teibo kahamkhe phunuk manatwikhe yapri senai. Tei khaksa bwkhak Mister Tourism World Philippines batainani bagwi thangwi tongo. Hayung ha kotorni kaithamchi ha kotorni chongjak bororokbai batainani bagwi thangwi hainohai norogni chubachuni bisingtwi ang kwtal sal tubuphinai tei norogbo ano khabai surilaidi tei chubachu khwlaidi.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



bottom of page