top of page

Khu khari toma - nirok tide si bai?


Tripura Haste ungkha kaisa kwrak mwtai hamjaknai luku rokni haste. Ora kwbangma bosangni borok roknw tongw baksa ba hindu baksa christan tei baksa buddhist baksa ba muslim. Phiya kwbangkwk borok nw Hindu mwtai pujinai tongma nwkjak kwk o Tripura hasteo. Ora tongw Tiprasa bosang rokni bisingw bw kwbangkwk nw Hindu mwtai pujinai rok. Mwtai puja rothani hinkhe nangw kwbangma kwthar khu, Chwng ora Tiprasa Hindu hamjaknai rokni bwkhaktwi silainai Khumkhari nw twi. O khum khari bai nw khum kholwi puja rojagwi phaio srisitini siminw Tripura hasteo mwtai hamjak nai rokni thani.


Khu khari/KhumPhoto by Chandrika Jamatia
Khu Khari - Photo by Chandrika Jamatia

Khum Khari bahai khe swna jak


Tripura hasteni kok sawani thangkheno Wa ni kok jekhe phanu kasawi phaio. Tripurani Tiprasa rok mwtai kaima bw kwthar wa ni mwtai nwnw puji mani nwk jagw. Kwbangma mwtai nw tongw ora kwbang kwkno wa bai mangno swnawi palai jagwi tongw. Tiprasa rogni bisingw mwtai kotor ungkha Garia mwtai tei bono Karwi bw tongw ker mwtai tei nukhungni samwng humwng ni mwtai tei Twi mwtai thungno Wa bai mangnw mwtai swnawi puja rojagwii tongw. O khum khari nw bw Wa bai nw swnam jagw - kwthar wanw khum chakdrap khaiwi tei logeo kaisa twijaknai bw narwk jagwi tongw.


Kwcha - Khum Khari, Mangphli - Kamal Jamatia


Khum Khari boro kwbang samwng phunang jak


Jamatia Bosang rokni mwtai kotor ungkha Garia mwtai - O mwtaini kokthoma belainw kotor tei belainw kwbang. Ora kwbangma tongw laibuma. Omo haikhe nw Khum Khari bw kaisa o laibuma tei Srisitini simi samwngw phunang jagwi laibumao thai Khum Khari bw kaisa mwng. Kherphang kamio khoroksa kherphang ni barja yachak khenw kherphani logeo tei bw kwbangma barja mayachak o. Baksa ba bogla ochai, baksa ba mwtai balnai baksa ba Ochai okra baksa ba Dhariya ako rok. O Dhariya roknw sal bwrwngnw Kwthar Garia mwtai nw puja rowani bangwi sabwrwngnw khum khari bai khum kholwa nangw. Omonw karwi bw kwbangma kami ni aghini bura burichwk rok mwtai hamjaknai rok tabok phanu Khum khari no samwngw phunang tongbai jakhw. Tei Jamatia Hoda okra bw salbwrwng Kwthar Garia nw khum bokthanio bw Khari nw jekhe phanu samwngw phunangwi ma tong khw.


Khum nw kwthar tei kerwi tongwani bangwi Khum khari belainw kwrak kermwng bainw samwng maphunangw. Haiphanu tabokni jorao belai khenw Khari eba khum khari samwngw phunang laima komolwi nw thang ha hi hulaimao. Omo bw Tiprasa bosang rokni bangwi belai kheno mwito narwkthai kaisa kokthoma ungwi thangwanu. O khum khari thung thai aswknw nangwi tongw. Phiya tabokni jorao kisa sinimwng komol thang ha hulai manu. O koktwma nw Kwcham kerphang chawi thangjak Braja singh Jamatia ni kokphangbai nw saiwi mankha. Tabokni jorao khe Tiprasa rok mwito narwkwa bangwi o Khum kharinw sakni sajwk rokni mwng rok Khari hinwi pharlai mani bw nwk jagwi tongw.



O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Comments


bottom of page