top of page

Dopha eba nukhung hamkrai o bwrwirognino yak tongna nango?

Agio chini chuchu-bora rachi eba agio chwng saimanmani tei khwna mani abo hairog kisa misa khursawi sana nangnai. Oh kok sanani thangkhe chwng kwbangma agio chini chuchu bora rachi bahai khe khwlai phaikha tei chini bwrwirog bobohaikhe samung khwlaikha ang je saimanma jora twikhe ang abono sawi khwnarwnai. Agioto chini Tiprasajwk bwrwi bwsarogno chini dophao bwrwirogni tomung chamungrog hinkhe bwrwirogno belai khe bwskango tonijago eba priority rwjago. Chwng ah jora khwnao tei ani amasongni jora haikheno chamri Ompa kamarog. Ah jorarogo bisa, bisiknwi bisiktham hairog chamri narwkgwi tonijago. Tomung chajakya, bini samung tangmanibo chaya hinkhe kiphilwi se rohorlaio. Ah jora rogo belai kheno bwrwirogno kuchukgo tonijakgo.


Priyanka Debbarma
Priyanka Debbarma Mangphlio

Nok nukhungo samung tangthanibo bwrwirogno belaikheno bwskango khe nukjago. Tabuk twrwk twrwk nai naikhe chwng nukgo buini dophani raida no chwng naharlaio kha. Abo haikhe bwrwirogno teisa chwlarogno pom rwna nangwi tongo tabuk phiya tangwi? Agini salo abohai tongmaniya bwle Tripura hasteni Tiprasani raidao. Aboni bagwi ang sanani muchungo bwrwirognobo lekha pora khwlai rwna bagwi nangsugo. Tabukni o jora bwrwirono pori rwya wngkhebo kaisa nukhungphanosi naithok khe tisana rwngya wngnai, bwsa bwtwino phwrwngna rwngya wngnai, bwrwirogkhe tamo maya tongnaba Mother Teresa no chwng nukgo bo khoroksa lekha pora khaiwino bo khoroksa world(Hayungni) bo belaikheno mung kotor khai kwlangkha. Bini samung tabukni kisa sijak nukjak eba kisa lekha pora khaijakrog bebak no saimano maya kotor gwnang tei borokno hamjakna kwrwngkuk hwnwi. Aboni bagwi bwrwirog mungsa manya manwi hinmani kwrwi. Chini dophano nai naikhe chwng bwrwirog agini simiphano tolao tonijakya.


Tabukbo chwng buini tomungno swrwngo hinphano chini bisingo nukhungo hamjwkrogno horbai sogwi bwtharlaimani abotwirog nukjakyakhu tei kisa chini hamjaklaimani tongkho hwnwi ang khao chongwi naharmano. Tamokhe kaklaimani abo jora kaisa wngwi thangkha tamo ni hinmale ah jorarogo buma bupha khoroksa chwlabai bwrwi hamjaklai tongmano gosilaiya aboni bagwi kaklaimarokbo jora kaisa laikha. Phiya tabuk abo kwrwikha. Tabuk bwsa bwtwi tomung khoroknwi chajaklai tongkha hinkhe abo gosiwi naharlaio buma bupha. Tabukto abohairog aswk nukliya tei kisa chwng lekha pora twibo teisa silaikhaba tamo bwrwi tamo chwla chini Tiprasarogni bisingo tabuk kahamno nukjak tongo. Haiphano bwrwirogno chwng officially phano je manthai sokthai rwjagwi tongo chwlarogbai equality hwnwi saphano mungsa swrai swraikhe nukjakyakho. Jorao chwng nukhungo hamna chana thang thani bwsano borok khwlaina thangthanio bwsai tomung abono coverage khwlaimaya hinkhe bwrwi phano aro coverage ma khainai. Abohaikhe khwlaimani bisingtwino chini dophao tabuk Doctor, Engineer tei Scientistrog twrwk twrwk nukjagwi tongo. Aboni bagwi chwng bwrwirogbo mungsaya mungsa mano hwnwi khathonwi samung khaina nangnai. Bwrwirogno Identity bwrwirogno dophano sinimung eba jaiti-sandai sinimung khwlaikukgo. Phiya chwlarogni khe mungsa Identity khajak ma kwrwi, tabuk romdi bwrwirog puisa ni mala kanmarog, tei chini rignai borok chini chamthwirog tei kaisa Religionno nasik horkhe bwrwirog mathia ma kanai, songko ni churi ma kanai sindur ma phulnai abo hairog chini dopha khwlai tongmani abo kanmani meaning hinkhe bo kaijak. Abo khe buini Culture no nahar mahai kwlaijago angkhe. Agio chini dopha abo hai kwrwi. Hinkhe sudu bwrwirogno twi simi se jesa nini dopha sinimung nukhungo bwsa bwtwi no kolok kotor khaithani agini simino bwrwi dopha, eba nukhung ni samungo sinijak mung Identity bwrwirogno twino khajagwi tongma kwlaio. Abono teibo kuchukgo twlangnani thangkhe bwrwirog simiya chwlarogbo yapri ma naharsinai.



Tabuk twrwk twrwk chwlarogbo tabuk jesa pandarogo washcoat rog kanwi baithangni Identityno phunuklaiwino tonglaio. Tamokhe chwlarogni khe kanmungo aswk phunukjakya wngwi tongo.Tabuk ni o mol hinkhe chini borokrogbo chwng siya hinphano kisa sichai phaima jorao tamo chwrai tamo chakra, sikla, bwrwi jotono. Aboni bagwi bwrwirog tabuk kebel hinkhe chuglak, bwskangosi phainani nangnai tei khwlainani nangnai samung humungrog je chuktwi. Teibo nangkukjak wngkha chwng swrwngni pohor lamno sainani nangnai tei bwrwirogno dopha hamkrai ni kuchwng talpir rutugwi tubunai sakha Priyanka Debbarma.

O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Comments


bottom of page