top of page

Takhuknwi Garia 12 bisini yakulo malai laikha

Garia ungkha Tripura hasteni Borok dopha rokni jotoni sai mwtai kotor. O Mwtai kotorno Tripura hasteni kokborok sanai bosong rokno palaima nwk jago. Ora tongo Jamatia, Tripura, Debbarma, Kalai, Reang, Uchai tei bw kwbangma. Jotoni sai kotor khaiwi palainai ungkha Jamatia bosang. Jamatia Garia palaima hokhe takhuknwi Biya kwrwi tei Biya gwnang. Biya kwrwi ungkha Bwta okra tei biya gwnang ungkha kusu haiya kheba bwphayang. Tei kubun dopha rogni borok rok hokhe Garia no kwthar wasok wa no palai laio. Wa hinwi bo jepha wano palai maya - watwi wa nango. Omo haikhe no tini chwng Jamatia rokni Garia takhuknwi malaima raida rokno twi tei bw swrai swrai khe salainai.


Garia mwtai khoroknwi malai phroni mangpli, thai Sorbang amchaini Swkchwima Kamio.
Biya Kwrwi tei Biya gwnang takhuknwi malaimani mangphli, 2023

Laibuma:


Jamatia ungkha Tripura jotoni sai kwcha tei kwrak motha hi sini jagwi tongo - Jamatia Hoda ni mung bai. Tabok phanu Bubagra rokni molni simi no Ha hoda khaiwi phailaikha Jamatia rok. Baksa salaio Garia mwtai ni bangwi no tabok phanu kwrak Hoda khaiwi tong laio Jamatia Bosang rok. Garia takhuknwi malaima no twi kwbangma borok rokni kwbangma kok kiphilmung okharwi phaikha. Garia Mwtai balainai lenglajak Gulang Padha Jamatia Hakwchak Kamini sakha boni je sai mama twi takhuknwi malaima ma boni je saimansak wanwi wathamno ung khona hinwi. 12 bisi ni yakulo bwta bwphayong no malai rao. Phiya aghio bwswk bar malaikha kebo saiman laijaya. Bw tei bw sao “ang chwrai phro Teliamura Hodrai dighi malaima jana mao” tei Atharbalao waisa taklai Amarpur swkchwima o.


Taklai boro takhuknwi Garia no malai ro Garia mwtai kaisa kami kwbang tong khe 7 bisi jora tong ya. Haiphanu kwbangkwk kamio no bisi tham tei bisiba no tongma nwk jak kwk o. Taklai biya gwnang hokhe Killa amchaini Kami kwtal o tei biya kwrwi hokhe no Sorbang amchaini Swkchuima Kamio. Taklai Kami kwtal ni phaiwi Biya gwnang bwta ni ora phaiwi malai phaikha Garia puja ni tei ni din o tarik ungkha 15-04-23 Amarpur sorbangni Swkchwima Kamio.Ora malaimungo Hor sini tongnai rok yathei lam hingwi phaibai jakha 1500 ni sai kwbangma Garia ni loge tongwi Hor sini tongnai rok. Taklai Takhuknwi malaima salo bw aswk no borok kwthuma nwk jakha Kherphangni nokhlao. Omo haikheno tabok 12 bisi ni yakulo Garia takhuknwi no malai rao.



O Garia no twidulwa bangwi swbha barja yachak


Garia ni barja yachakwa bangwi Jamatia Hoda ni bisingo no kaisa bisi kokmalaima panda haiya kheba Hoda Kokmalaima panda ni bisingtwi no kwbangma samung humung bak jagwi tongo tei barja bo yapha laiwi tongo. O Kokmalaima panda bisi o waisa khulai jagwi tongo. Ora ni bisingtwino Hoda okra swbhano ronai tei Kherphang swbhano ronai tei Panchai swbhano ronai rok tei bw kwbangma kokchaplaio Jamatia Hoda ni bisingtwi. Phiya Chokdiri hokhe Kami kaisa ni bisingo nw chongwi nailaio. Garia biyang biyang berai nai tei Garia bo kamio tulangnai omo rok Hoda Kokmalaima bisingtwi no chongjako.


Jamatia Hoda ni bwkhaktwi tabok kwbangma samung humung nahajagwi tongo School no naiwani bangwi Garia Mission tei Students rok bangwi Jamatia Hoda Students Association tei Jamatia ni bangwi Working Committee ako rok.


Phanai jorao taklai bisino karwi Takhuknwi tei 12 bisini yakulo haino hai malai laiphinai kubun kami kubun thai, kubun kherphang tei khubun Hoda okra ungwi thang sinai. Garia ni mung phaikhe no kaisa kwrak wanswkmung tei kwrak Hukumu bai kwrwng jak Tripura ni Laibuma khursa jagwi phaima hai matongo Tripura hasteni Borok Dopha rokni.


"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



bottom of page