Tripura hasteo kwbangma borok dopharok media nogo samung tangui tong phanu kaisa phanu motha kaham sungsajakyakho. Kokborok Media wngkha kaisa dopha hamkhraini kotor yakhili—a wansugmung no narwgui o haste-o kwtal kaisa motha khalai jakha—All Tripura Kokborok Media Forum hinwi. Mamblai swkaang o motha 2017-o swnaamjaakmani. Afuru yapri kwtaal semani, tabuk khe raagui thankha. Haini bagui, April 18th o tei waisa khe Tripura ni Kokborok sanai Media ni samung tangnairok kuthumlaiwui kwtaal khe tei bo kaham samung tagna bangwi goselaikha.
Lukusong ni raida eba “Democracy” no kwcharwi tongnaini bisingo kongsa pala wngkha Media eba koktwma awainai. Soi soi lukusong raida ha sakao jai jaikhe samungo phwnangjakyasak jesabo luku chongraidabai twiduljak hani lukurok tongkwchang tongmaya. O khakchangma kwrwikhe hani hamkraibo wngya. Aboni bagwino Lukusong ni raidano kwrak khe bacharwi tongnani bagwi nango kwrak pala. Aroni bisingo Media jeswk kwrag wngnai aswkno hani hamari phainai. O kokno twiwi tongnai je hayung hakotorogo twiduljagwi tongo o haono kuchuk hamsamung manwi tongbaiyo.
Abo hamkrai khainani bagwino kaisa kaisa kokni wngwibo aboni media kwrak wngwi bachakhe hodani hamya kosok kusum swlaiwi kaham kaham lamni yapiri naharmani bisingtwi o hani eba dophani hamkrai wngwi manai. Hai hwnwino Tripura hasteo Kokborokni print mediao aswk thai nahorwi manthaliaphano 2010ni simi 2020 bising electronic media tei social mediani bisingtwi Borok dophani lukurok twrwk twrwk sakni hukumu, srisiti tangmung twimung, kanmung chummung tei rwchapmung, Laibumarokno sawi manani chengbaikha. Abohai samung khaithani jotoni swkangono mung khurchajakthai tongo Kok Tripura News and Entertainment Channelni. O hani bwsarokni mokolni swnal swkagwi kubui tai sakno sinani lama manwi tabuk twrwk twrwk channel tai social mediani bisingtwi silaimung, kokthum, patimung, chasana lama tei hamkraini juda juda dal bidal phunuklaimani bisingtwi sichawi phaimani jora kisaono kwbang hamari manna chengkha.
Phiyaba lukurok jeswk sicharwrwk, hayung hakotorni phan thaini sakao sinsereblaima, seklaimani, kolobmanirokbo bangrwrwgwi phaimabai o Media haparno twidulmani kaham lamatwi twlangnani tai koktwma awaimungbai gwdaljak samung tangnai adongrokni katimung tai swkangrwi twlangthani kebengmung kwrwi tai borokni samungrokni quality hamrwi twlangnanirokbo barja kotor twiwi wansuklaimani bisingtwi 23rd September 2017 Agartala press clubni phasingtwi All Tripura Kokborok Media Forum mungwi koktwma thumnairokni kaham hamyao samung tangwi phaikha. Hasteni mungwnang journalist Kamal Kalaino Convenor tonwi koktwma thumnairokni kaham hamya jorao samung tangwi phaimani. Koktwma thumna thangwi satok pitok khaijakmani, bwtharjakmani hai patimungrogni justice santhini ATKMF kubuni motharokbai baksano justice sanwi phaikha. Aboh karwibo Nobar kotoro nok baiwi nok kwrwi lukurokno chamung bagwimani, Kwchangma jorao bikhrarogno ri bagwimani, Coronani bagwi lock down jorao lukurokni samo tongwimani hai kotor kotor hoda hamkrai samungrogo yak chubachuimani laibuma tongo o mothani.
O mothani naharmung buini bai judakuk eba pherlaimani wngkha o motha lukuchongraidano kwrak tai kaham narwknani bagwi kebono kochoiwi tongya. Freedom twiwi awaimungni samung tangnani phan yapharjak tabuk o mothani joto house roknono. Tamoni hinba Tripura hani laibumao nukjakkha mokolbai nukjakya kisaswk phan mediano bohrokni yasibai kolmani. Abo haikhe kolmabai soi phobjagwi tatal khorok tisawi tongmabai kerong swbaijago tai lukuchongraida swbaijagwi tongmani nukjakkha. Abohrokno katiwi tongnani bagwino kubuino kubui hwnwi phunuknani bagwi Kokborok Media kebono kochoiwi sakni dophani laibumano swkwmaya tei kubui phunuknano kiriya khaiwi samung tangnani hai kotor yapiri romwi samung tangwi tongo. Abohai kubui samung tangwi kha kotorkhe hani lukurokni samung tangmabai ATKMFni convenorno lukurok luku twiphang swnammabai o mothani barja kaisa kotor kokmalai panda songchamani bisingtwi 18th April 2021 salmario Agartalani Dhaleswar rwbainogo hasteni Kokborok journalist tai okra chakra kokthumnairokni manjakmungbai kwtal committee songchajakphirkha. Aro manjakbaikha All India Radio Agartalabai Doordarshan Kendra Tripurani Snr Journalist, Kok Tripura tai Swrangchatino khobwi juda juda social media news production rwnairokbo tongbaikha.
Swkango convenor simi khoroksabai motha twidulhagwi tongphano tabuk o kotor kokmalai khaiwi mothani juda juda samung achukthai chonglaijakkha. Mothani khorokba Advisory committee tai khorokchiba adongrokno twiwi Exacutive committee swnamjakkha. Mothani kasku Mg Samir Debbarma, Tangphang Mg Sailen kalai tai Khukpang chongjakkha Bukhuk J.D Jamatianoh tai rangphang ngkha Mg Sujit Tripuranoh.
O motha tabuk taibo phan kwbang khaiwi samung tangwi tongo Koktwma thumnairokni elem bangrwnani bagwi workshop khaimung, Social Mediano authentic report khwlairwnani, Kokborok Mediabai kwrwngjak adongrokni hamkrai rwkjak haphangni manthai sannani tai Koktwma awainairokni kaham hamya jorao samo bachanani abohai samungrok khaiwi tongo.
15 executive members...join khaithankha.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.