top of page

Jamatia Hoda okrani barja tei raida

Hoda ungkha Tripura ni jotoni sai thansa tei kwrak, Chwng saimanu Tripura o Borok Dopha rokni bisingw jotoni sai kwrak tei baksa eba thansa khe tongnai rok ungkha Jamatia Hoda. Jamatia Hoda kaisa haphang haikhe nw tabok phanu samwng khaiwi tongw. Haphang khai thanio kaisa bokhorok eba Okra nangw omo haikhe Hoda chalok thanio bw Okra tongw. Jamatia Hoda rokni bisingw khorknwi Hoda okra tongw, Hoda okra rokni bisingw bw okra tei kwshu hinwi tongw. Jamatia ni Hoda okra joto Jamatia ni samwng hwmwng boni deghemwng bainw chengsawi rojagw. Jamatia Hoda ni kok sawani thangkhe chwng sathai kwlaio Garia mwtaini kok, Garia mwtai ungkha jotoni sai mwtai kotor. O Garia mwtai nw Borok dopha eba je kokborok sanai bosang rok jotonw Palaiwi tongw. Omo haikhenw Jamatia Hoda okra bw barja yachak mani yakulo Kwthar Garia mwtainw salbwrwng ker kwthar ni bisingtwi puja rowi tongw. Phaidi tini tei bw Hoda okra ni barja tei raida roknw swkrupwi silaiwanu.



Hoda okrab bahai khe chongjak?


Jamatia Bosang kaisa khe bisi bwrwngnw Jamatia Hoda bisi kok malaimung panda sungsa jagwi tongw - Annual Confarence. O kok malaimung pandani bisingtwi kwbangma samwng humung rokni twi kwbangma moyal tei kami ni luku kuthu laiwi kok chaplaio. O Kok chaplai mani bisingtwi nw kwbangma samwng bwtang rok nahar jagw. Ker phang hudi Panchai hudi Hoda okra hudi tei mwtai selaimwng hudi thung Hoda kokmalaimwng ni bisingtwi nw chongjagwi tongw. Hoda okra chawani hokhe balainw sijak tei nwkjak, mwngsa samwng hamya tangbwjak kwrwi borok tei jolei kwrwi borok roknw naiwi nw rojagwi tongw. Hoda ni okra chakra rok Hoda okra rothanio hinke belaino naicherwi nw rolaio. Bebak bwkhaktwinw kaha hwjak phainai tei samwngntangwi phainai nw no Hoda okra ni barja yapha jagw. Hoda okra hw Jamatia Hodani jotoni sai kotor.


Hoda Okra rokni raida


Hoda Okra ni barja yachak mani yakulo kwbangma omo hai raida tongw bono belai kwrak kheno kerwi tongwani nangw Hoda okra rok. Puilao hikhe koibanw chengra sanw thwngwi maya, Haya bwn hwjak maya tei bwrwi khonai rokbai dalbidal kok rok hwjak maya belainw kwrak ker mung twiwi ma tongw. Tei bw Lukun rok Humung Humung raida roknw twibwi tei gwdalwi ma tongw Hoda Okra. Bono karwi bw salbwrwng Garia Mwtai nw puja rowani nangnai tei Hoda okra khoroknwi rokni bisingw Okra ni okra hinkhe salbwrwng satrai ma soknai tei khum barsa maboknai tei saptao waisa wanwi puja ma khwlainai tei Okrani kwshu hokhe salbwrwngnw puja ma ronai. Jamatia Hoda okra rok raida rok kwrak khe narwgwi ma tongw tei moyalni joto panchai rokbainw koklam rok narwgwi eba kwrwngwi ma tongw. Omo hai samwng hwmwng nangphro hokhe Kamini luku chokdri bai phanu nangkwkma samwng rokni koklam manarwk laio.


Luku rok bhai khe Hoda okra nw siniwi manai


Hoda okra nw jepha thai nw siniwani thangha hokhe borogni kotogw twijak tongnai ri kotok. Ri kotok ungkha risa haino nwkma khe phiya chwla rok timanw hokhe ri kotok hujagwi tongw. Jamatia Hoda okra rok ri kotok twima hokhe kisa kormo lulu tei rikotok gadaro kwkhurang gwnang. Tei Panchai rogni hokhe kwchar kwphur gwnang tei chokdri hokhe kwkhrang gwnang rikotok o. Hoda okra rok waisa ri kotok nw twiha hokhe tei mayakarya tei jepha thai thangphanu logeo twiwi ma thangw.


Hoda okra rokni kaisa manwi kotor tongw bw ungkha rai dhang. Raidhang nw no borog salbwrwngnw puja rowi ma tongw. Tei bono logeo twiwi beraikha hokhe tei bw kaha khe ma ker nai tei jepha thai nw ma beraiya, tei bwni nogo thangha hokhe bw yathe soyasai mahaya. Omo nw Jamatia Hoda okra nin barja tei Raida.



"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



Comments


bottom of page