19th century simi Tripura tokey swnamjagwi phaimani. Films kwbangmano nongkhorkha Tripura o. tinini kok bothoma wngkha Tripura o Tokey eba Films ni thinang biyang? Kusung kusung piri laiwi phaio thango phiya swlaimungle boro sokphaikha kokborok tokey. Sakni rang khibiwi bisi brum brumno kaisaya kaisa video album haiyakheba tokey(Films) swnamwi nongkhorwibo tongo hasteo. Khursathai kwlaio Northeast 8th state ni bisingo Tripura o simi industry o samung tangnairog kebel haikhe nukjago. Tripura o kwbagma Artist tongo. Baksaba Khao muchungma eba lukurogno phunukna muchungwi simi o industry kwrwngmani nukjago.
O industry ni naharmung eba yapri belai kotorkuk. Phiya Tripura hasteo aboni bwthai belai helengsasa. Tei thaisa kok wngkha o Industry o kwbangma bororokno eba kwtal achaisongrogno khasrangwi samung tanglaimanibo nukjago. Tripura ni kokborok Industry o khaksa bwkhak chethorowi naikhe kubui mangpili nukjago abo wngkha thuphuru imang nukmahai. Jora thango phaio kokborok rwchapmungni version kwtal khwlaiwi tikhwlaio. Aboni logi logi kwtal kwtal video swnamnani bagwi technical part akorogbo kwtal khwlaiwi nongkhorwi tongo tei video akorogbo kwtal kwtal khwlaiwi swnamlaiwi tikhwlailaio. Abono karwibo video no mwchangrwna bagwi kwtal kwtal Tripura hasteni tokey eba thwngnuk mwsakrwngrogbo o industry o kwrwngmani nukjagwi tongo. Phiya kok wngkha arosi o industryo samung khwlaikhe nangsugo rang ri. Tomung rang ajimarini bwkhak naisigwi naikhe mungsa kwrwi. Aboni bagwino o industry tomung kwrwngkhe tabukbo nukhungni bororok ta kwrwngdi hwnwi khorang tisalaimani nukjago buma buphasongni khuktwi. Tabuk ni e 20th Century ni molo nukjakha Youtube kaisa platform hayung ha kotor gwnangwi baksa baksa rang ajiwi tongo. Abohaikhe Tripura ni kokborok Industry producerrogbo aboni bisingtwi simi rang ajimani twngsasusu lama nuklaiwi chango ri khawi nongkhorwi samung tanglaiwi tonglaio. Tei aboni bisingtwino tabuk o industry ni samung tangnairogbo kisa misa ajimung manwi tongo hwnwino khasranglaiwi samung khwlaimanibo nukjago. Khursathai kwlaio jora kaisao Tripura jephuru kokborok rwchapmungni eba kokborok music video akorog tikhwlaikhe CD(Compact Disc), DVD(Digital Versatile Disc) choil tongmani. Phiya tabuk jotono CD,DVD mwthakjak hatio. Aphuru o industry ni artistrog abohaikheo ajimari khwlaimani nukjakha tei jora lairwkha. Films eba Tokey khwlainairogni bisingo ajimari nukjago tabuk Youtube haiyakhe Hall bara naharwi Projector ni bisingtwi rang ajimari khwlaimani. Ulo Tripura ni kaichar hangkhorni bisingo kami ni sikla chalairogni bisingtwi kwrwngwi phunuklaio tokey tei aro kisa misa ajimari khwlaimani lama Tripurani Producerog ni. Paithago kisa misa kami kami moyal thwgwi phunuklaimani ulono Artistrogbo rangrog rwui mano hwnwi sawi khwnarwkha Tripura ni Director Ruhi Debbarma.
Tei kaisa jwngjal kotor nukjago kwbangkuk Production house eba Producerrog rang khibiwi swnamani videorog baksa baksa Youtuberog juda lama khwlaiwi video upload khwlailaijak. Athani soi soi Producer eba nokphang hinjaknairog mungsa khwlaiwi bo manya wngjak. Abohai khwlaijakhe soi soi nokphang eba Producerrogni yaphao munga marwkya wngwi thango. phiya aborogno kasuna bagwi copyright khwlaikhe simino kaisa nangkukjak lama. Haiya hinkhe mungsatwiphano banchinani lama kwrwi. Aboni bagwi o lama chwng joto producerrogno thansakhe o lamno sainani nangnai hwnwi sakha Tripura ni Music Director Milton Debbarma.
Kusung kusung bisi romwi Tripura ni Tiprasarog abohai hukumu mukumuno romwi narwknani bagwi sakni kolomtwi khikwlaiwi jemansak yapri selaiwino tongo tei bwskang eba thinangobo teibo nangkhe yaprini tanglogisong wngwi samung khwlainai. Tei tabuk teibo koktwma kaham o Industry samung tangnairogni bagwi tangwi hinkhe Tripura haphang kwtal khwlaiwi TFTI(Tripura Flims & Television Institute) phiyogwi rwkha. O Institute o tabuk Tripura hasteni siklarog teibo kaham swrwngmung manai. Chwng o Industry o kwrwngnairogbo bwskango teibo bahaikhe kungchuksaruwi man ayang bwkhak naisigwino khorog tisawi samung khwlaithai tei haste ni mung chukrwthai hwnwi sakha Flims Director Mrinal Debbarma.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.