top of page

Maswi (maisw) bahai khe cha saide man?


Huk wngkha tiprasarogni sinimung okra hukumu mukumuni mari eba chini huk nu hinjakgo hukumu mukumu.Chwng saimano hukgo maichwlwi kaiwi Mai achaikhe mai munma yagolo ralaio,phiya aro hukgo mai no karwi bo kwbangma dalbidal chajaknai moikwthwng no khopbwi teibo juda mung chini chalaimani bono bo kaiwi chalaijao.Moikwthwng ni yagolo moi songui chalaimani karwi tongo thaichumu,dorompai,hukni derso,phantok,hukni moso bilati,kosoi,lubia,socha, tei aborogno karwi tei mungsa bo tongkho abo wngkha 'maswi' o chajaknai awang ni tei mungsa chajaknai Mari hinui chwng saimano tei o 'maswi' bono Tripuri bosongni borokrog tamkhe chalai tei o awang maswi no twiwi chwng silainai.


 Maswi (Maisw)
Maswi (Maisw)

Maswi songwi chamani sooji songui chama hai, phiya chini hukgo kaiwii chamani maswi wngkha chini hukumu mukumuni chamung tei awang hinui sinijakgo.Songmung rog swkang karaio yokgwi pai tej patarog riwi yokgo tei twi kisa kwbang ma rwo tei twi kwbang ramani maswk chikon phano bo kwbangkhe erwi thango,tei Munna phasing erwi kwbang khe nukha hinkhe dud kisa rwi chao tei obo chini kothok chamung ni khopbwi sirisiti ni hukumu mukumuo awang songui chajaknai kothok hinjakgo.Tei dal kaisa khe bo awang swnam chao abo hinkhe lairu bai khopbwi awan sokrang haikhe chao phiya oro hinkhe maswi no 30-50 minutes suwi chomwi tonu tei som rwya karwi kwtwi ma rio gothokmani kwtwi rwkhe se kothok hinui. Maswi songui charwmano sai khwnarwkha,Manjirani Debbarma.



Chwng hukgo maswi ni logio tamo tamorog kailai tei maswi no bo jora Kai?


Masinga,tha borchuk,tha badiya,khundrupoi,banta,phantok rog bebak kaio tei babakno manthokgo hukgo chini chamung mai kaijakno karwi bo.Tei maswi no pain ma saru puila chotra eba March mas o kaikhe shraban eba October o rawi manwio.Tabok maswi no sinina hinkhe aming khitong hai khwlai miti miti khe bwthai kubung bupthup bwchrap khe thaio.Tei kaisa maswi hinui mung amo hinkhe sam maswi bo tongo amoni sinimung hinkhe Mai hai kuphur phiya aming khitong maswi hinkhe chaksuru suru khe tongo tei jotoni swlai kothok chini maswi chaksuru suru omono.



Hatio manthoklia aswk tabok sak jora manthokmani kwrwi tei hatio manthokgui bo belai morog kg o 250 omohai tei tangui morog hinkhe maswi no hukni tubui hatio phalna tubunani belai kosto,hukni rawi tubui yakungbai kaphikgwi swkraiwi aboni yakolo yakbai rwsammo romobai sukgui pai bailingbai chokgui bukubu ma swkraio,obohaikhe mang 7-10 bar chokgo tei shokgo khwlaimani yagolo hinkhe maswi bukubu kahamkhe swrai swrai khe ma swkraio.Tei agini bwrwichuk bwrarog salaio kosto kwbang wnguibo chanani kothokno machai kothok hinkhe kosto pokthango hinui salaio.Chini Debbarma rog dalbidal khwlai chana rwngphano chini chamung Chama awang khwlaimani lairu bai tei abono karwi chwng chanani wansokjakya,chajaknai hinkhe tabokni jora rogo maswi ni laddu rog bo khwlai chaimano."sao, Manjirani Debbarma


Bwswksi kothok chini hukumu mukumuni chamungrog belaino kothok hukbai si chini hukumu tei hukni chamung kaham manma bai chini mukumu wngkhana hinui khatungo.Sawi kwlangnairog baksa komorbaikha phiyaba baksa kwthang tongrwk tongnairogni jarwi tei swkang jorao' huk khwlai chawi phainai borogni jarwi maswi ni songmung tei chamungno bo sawimankha tei abono chini khakchangma.



Comments


bottom of page