top of page

Nok ganagini ni Bithwi wathi rok saimandi

Chini songduk bosongni lukurok bisi sai sai romwi bolong, buphang-waphang bai gwdalwi langmani bagwi choba riwi phailaikha, bwskango bo riwi thangnai. Bolong-halong chwngno tongnani bagwi nok, chathai-nungthai, rwchap-musunp khaina bagwi kol(musical instruments), chini salbrumni samung nangnai manui-khwnwi rok, bwsak bemarno Katina bagwi bithi-wathi rok, abo hai chwng chini langmao khorok tisawi kwthang tongna bagwi kwbangma nangmani manwi-khwnwi rok riwi tongo. Tiprasa hinjaknai ‘Tripura’ songduk bosongni lukurokbo haino hai bolong-halongbai gwdalwi hachwk hathaiyo langmani choba riwi phaiyo. O dophani lukurok sakni bemar hamna bagwi bolong-halongni arono sakbogwi(depend) phaimani. Tabwk kwtal molo bo bolong halongni bithi snamnani sawi mano bohrok. Kwbangma bithi ni kokno bohrok generation to generation pass khailai phaiyo. Phiya bemar kotorni bithi rokni kokno khe Tripura dophani lukurok joto borokno satharya. Nukhungni khoroksa khoroknwi borokno simino okrarok sawi kwlango. Aboni bagwi kwbangma bemarni bithi-wathi rok twrwng twrwk kwmawi thangbaikha. Mwthang narwknai bithi wathini kokno chwng luku rokno sawi kwlangna nango. Mamata Tripura sakha bini buma-bupha bono samani bithi rokni kokno sakha oro. Phaidi hingkhe chwng tabwk Mamata samani bithi buphang phangbrwini kokno twi-wi salaiyanw.


Chirata -P1

P-2

A) Chirata : Tripura kok bai omono ‘Chirata’ hino. Omo Tripura hasteo tongnai lukurokni nok gana-gini rogo achaiyo. Omoni buphang aswk torya. P1 -o nugwi mano bini bwlai kisa kolok kolok tai milik milik khe nukjago, buphang loksokkhe bwchang jora rok wngo P 2 -o nugwi mano. Aswkno toro ah buphang.


O bithi bai tamo tamo ham: Mainly omo wngkha bohok deramani bithi. Omono karwibo bohok samani, bohok warmani roknobo hamrio. Ang cherai phuruni simino o bithino bohok derakha hinkhe machao. Belaino samung rio abo.

Bahaikhe chanai: Omoni bwlai mochomsa nadi(bedekbo nawimano), kahamkhe suwi paste swnamwi nadi. Oboni yagulo o paste swnamjakno sebwi bwtwi nawi paikhe abono nwngdi. Omo belaikhe kwkha, ah bithi nwngwi paikhe kwtwi chakhe khamani komio. O bithino swnamnani tai kaisa lama hinkhe bwlai mochomsa nawi, suwi twi kahamo chomwi tondi 8 hours ni bagwi. Aboni yagulo bwlaino khibiwi aroni bwtwino nwngdi. Tabwk je bithini kokno sanai omo khe dalogwi(mixed) swnamjaknai. Aro bithi pod kaitham nango. Sam munui, Tulisi/Tulsi(basil) tai Durba. Abo rokno norok jotono sinikhwna. Abo bo chini nok gana ginio no achaio.

P3

P4

B) Sam Munui: Sam munui wngkha malaria bemarni bithi swnamna bagwi puila nangkukmani kaisa buphang. Omoni buphang chikon. Bini lokmani 6-7 inches rok wngo. Bini bwlai khe thentruini bwlaino solo P3 bai P4-o nai mano, samsonti(Shameplant)no bo solo. Samsonti buphango khe busu tongo, Sam Munui-ni khe kwrwi. Abono chawi naikhe kisa kisa khwiyo. Nok gana rogo, mui bari rogo achaiyo abo. O buphang bwthai thaikha hinkhe bini bwlaiyo no thaiyo chikon chikon khe.


P5

C) Tulisi(Basil): Tulisi ayakhe Tulsi-ni bwlaibo nango malaria bithi swnamna bagwi. Bini bwlai bomo hai Picture 5-o nai mano.Bharat haa kotoro tongnai kwbangma lukurokni nogo no manthogo Tulisi buphang. Hindu rokni mwtai-atai rithaiyo bo samungo nango abo. Tulisi buphang kwbangma typeni tongo. Ama je bithi swnam, aboni bagwi je kunu typeni Tulisino no riwi mano.


P6

P7

D) Durba: Durba khe malaria bithi swnamthani paithakni nangkukma bithi buphang. Buphangbai-bwlaibai chikon chikon khe kolok kolok wngo, P6 bai P7-o nugwi mano. Abo bo kamio tongnai lukurokni nok gana giniyo no achaiyo. Abo Tripurani songduk bosongni lukurok mwtai atai riphuru samungo nango. Tripura bosongni lukurok chwla bwrwino kaiywi borda riphuru khul, mairung tei Durbakhe bokhorogo bogo. Amo kwbangma bithibo nango. Borok munuisono karwibo sui, aming, tokrokbo kulum kajakkha hingkhe ah durba bwlaino chamani nukgo.


Malariani bithi bahaikhe swnamwi chanai: Puilao sakao nuknai Sam Munui bwlai kangdok-kangsni kholwi nadi, Tulisi bwlaibo mochomsa swk nadi, tabwk Durba bwlai mochomsa swk nadi. Jotono twi kahambai kahamkhe suwi nadi. Aboni yagulo ah bwlairokno baksakhe hulwi paste swnamwi nadi. Tabwk ah bithi bwlairokni paste swnamjakno sebwi butwi nadi. Abono ri kaham bai tolwi ah butwino directno nungwi mankha. Abo kisa khwima hai tei mentholni taste hai khe wngo.


Norok sawi mankha Bohok deramani, bohok samani, malaria wngmani bithi swnamnani bwswk se kwlai. Chini nok gana gini rogo tongnai buphang rok se bwswk samungo nang. Bemar bai milikha hinkhe je buphang phano bithi wngwi chini langmano mwthang mano. Chini Tripura bosongni bisingo bithi swnamnai rok tongo, bohrokno ‘Boido’ hino. Bohrok teibo kotor kotor bemarni bithi sawi mano. Podrepod bithi buphangno dalogwi podre pod bithi swnamo. Bohrok bithi swnamphuru buibai nukjakyatwi khe swnamo. Tangwi hikhe agi rogo boido rok abo bai se ajewo. Obono karwibo kisa mwnakjak puitorok bo tongo chini bosongni bisingo. Aborok wngkha bithini kokno buino sakha hinkhe aa bithi nangya wngwi thango hinwi wansukmung, tei bemar kotorni bithi sawi mankha hinkhe bithi sawi mannai borok aa bemar manjago hinwi wansukmung tongo kebo keboni khao. Boido rok bura/buri raswkkha hinkhe se bini puito chanai borok khoroksaswkno aa bithini kokno phwrwngwi kwlango. Waisa wuisu khe Boido rok kebo no se phwrwngwi kwlangmanya wngo. Aboni bagwino chwng aa mwnakjak puitu rokno yakarwi borok munuisoni hamkraini bagwi je sinimani bithi rokno sawoi kwlangthai klaiyo.


"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"




bottom of page