top of page

Sak bithang bithi swnamwi chama naidi


Bithi bwrai nangmani manthoknai thaio tongo chini Borok dopha rog bini sinimung obobaino saimano tei twrwk twrwk swnamwi rohonai borokbo umor rawi thango obohaikhe no bithi manthokma thaibo sejakgwi thango.Tei mol kwtalni raidao Thai bolong komorwi hapung hathai sokomorwi kwtal samungni bagwi chengsanani nango hinui naitok manthok thaibo sejakgwi thango.Kwcham kabiraj khoroksa khoroknwi ni khukgo o kok mungsa sama khwnao tei manthoklia nangmani bithi swnamna hinkhe bolongo bo nuklia naitokbo hinui sawi tongma bagwi khoroksa kabiraj ni kwcham swiwi narwkjakni bithi ni mung baksa tei Imango manmani hinui bithi mung baksa khwlai kwtalkhe banokjakmani o bithi tei tamo bemarni bagwi tei bwswk jora kaham nukjakha phaidi nailainai.


Mwkhra latha
Mwkhra latha,Jeerai,biskuchuk

Bithi banoknai nokni borokrog wngkha,"borok khoroksa kabiraj hinui mung Kotor maya phano kami amchai kwrwngsa kwrwngnwi khwlai sininai tongo o bithi bwrai mano hinui bemar kaisa kainwini bagwi hamrwi mano hinui sinimung tongnai bini thani swiwi rohojak bitini mung abono naitokgwi swnamlaikha yakung jura dwng dwngkhe samani bithino.Je borok bithini mung swiwi rohoka kami Jong para ni khopjakgo mung Bishurai Debbarma hino tei umor rakha hinui nokgo nu tongo.Bo Imango manmani bithino samaya mung obohaikhe lukuno charwi kulum hamrwo tei Imango manwi swiwi tonmani bithi phano tabok swnamwi manlia ni bagwi naijakna hinui thangnai borok rogno sak bithang swnamwi chana kok kwcharwi rohowo tei twda hamno amoswk sasokmaya tangwi hinkhe chini kamio bithi manairog bithi swnamna yagolo borogni bukhukbai montro bo subu tei abo nangkukgo hin sao bithi bai simi samung paya obo kubui borokni thani simi o montro tongo. Sao Bishu Laxmi Debbarma.


Elachi, jeera
Elachi,gulmorish,jeera


 Kamranga
Kamranga bwtwi

Tamo tamorog bithini mung tong?


1.Mwkra latha

2.Jeerai

3.Biskuchuk

4.Risom

5.Haching

7.Elachi

8.Gulmorich

9.Kamranga


O bejor eba kainwi khwlai wngya wngna nangnai him sajakgo bithi swnamwi chana hinkhe tei o bithi no Hulu tei bebakno hului gura khwlaio tei biskuchuk mungsa hor hokio murwi nao tangwi hinkhe abo kwmal abagwi.Joto mungsa koroyawi khe hului naipai paithakgo kamranga mungsabo bwtwi sokorwi narakgo kwbang khwlai.


Amoswk jora samung paima yagolo karai kutungo moi chama thokbaikhe songna chengo tei swkang songwi khamrwyatwikhe khwlai kolmang muphunna namgo tei paithakgo kamranga bwtwino rwirio abo rwipai teisa jora songwi kolmang kwrankhe muphunno.Bithi songwi muphunwi chama bai kwchang wngkhe badul dulwi abono katiwi narwkgwi chao salo wainwi khwlai mai chabai chao tei bithi ni mung swijak rohonai 7 din jora chana kok kwchar rohowo. Sao bithi banoknai Nani gopal Debbarma.


Bemar kaham wngmani bwswk jora nukjakha tei tangwi o bemar haphaika?

Sanai Nanigopal Debbarma, bemar haphaima tamo hinui sanai umor lamokmanida wngkhwna eba jora maya sak ni bagwi mungsabo khwlaijaklia phung asiri siri bo himjaklia oboni bagwida wngkhwna hayakhe wana chinta tongkhe bo bemar dakti kolop paio hinu.Tei o yakung jora samano chawi naikha tei kisa komikha hinmano bithi chawi da komikha hayakhe ahaino jora balokgwida komikhwna wansokmaya ani bagwi bithi chawi nu komikhana hinmani tei chawi naigwna twda hamno hinuinu swijak bithiniung simi tubui phaimani tei sak baithangno saktharwi bithi banokgwino chakha.


Sakbaithangno bithi naitokgwi swnamwi chamabai saimanmung kahamni mankha tei nini hamwi bachamabai kubunni lukurogno bo chubamung jora phirok phaimano tei bohaikhe nu bemar katirwi tonmano chini kami chaio manmani manthokmani bithi ni mung saimankhe joto lukurogni bagwi kaham nukjaknai.



O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Comments


bottom of page