40 lakh hai lukurokni chikonsa haste Tripura. O haste juda juda bosongni lukurokni hukumu bai mwchangjak. Aboni bisingo no kaisa bosong Tipra. O bosongni lukurok bayapcharini halok boui mili kwthailai tongo.Tipra bosongni hukumuni mari bojak kerang kothoma bai O twikhor kwrwngjak hwnwi tabuk jotoni khugono omor. Tripura hasteni Gomati hankoro khobjak Dumboor twikhor. Sirisitini hukumu mukumu bai kwrwngjak Dumboor tabuk lukurokni bwkhao sinimung kotor manjak naibo naithothok. O twikhor hasteni twikhor amchaini bising jotoni swlai juda kaisa beraikhiri thai. Mung bai simino se joto lukurokni khao wansukmani logi tongthokmung bo juda khwlai nukjakgo o thaino rwgwi.
Dumboor Tripura hasteni naithok naithok beraikhiri thai rokni bisingo kaisa judakuk Twikhor beraikhiri thai. O twikhor amchaini tormari 41sq.km. Gomati amchaini lukurok O twikhor ni bisingtwino ajimung ni lam swnamwi salo mai phatisa chanani ajioi tongo baksaba aroni a romwi phalo, baksa ba a thaio beraina phainai rokno Rung chogwi berai rwmani bisingtwi. Dumboor twikhorni naithokmung no kubunni sai juda. Amchai kotorma rwgwi twikhor tei a twikhorni kwcharono bwsa bwsa chuksoro soro khwlai haplok bo tongo khwrangjiji ni naithothok. Twikhorni mung Raima-Saima. Sajago bibi-bahanok ni kothomano kitingwi no Dumboor ni laibuma hwnwi.
Kerang kothoma Khumpui barruru laibuma rwkjak lukurokni khao tongrwkjak kaisa kerang kothoma. O kerang kothoma Raima Saima mungwi bibi bahanokni kothoma lukurokni khao tabukbo kwthang tongkho. Bibi wngkha Raima hanok ni mung Saima. O kothoma twma bijap, twma toke jotoni bisingtwino lukurokni thani tunjakkha. Rwbai kwrwng rok borogni rwbai bai kokthai thaisa thaisano subui koktang koklob swnamkha. Phaidi khwnai nailayano o kothomano.
Kami kotormani Ochaini sajwk borog. Buma logio jugaliya wngwi tongma bai Nok-Hukni samung-humungo jora rwi manjaya. Sajwk khoroknwino Nok-Huk naikol tonglaijao. Salsa nobar kotor phaima bai borogni Huk ni Gairing baina nangjakha. A jora Bibi kha khamjak khorang bai "je ano Gairing tangwi rwphainai bono no Sai songnai" hinmani teini salono borogni Huk o naithok Gairing tangjak nugo. Gairingno nugui Bibi bahanok khatungjagwi dipor jorani mai chana bagwi bahanok bukumui no ringo. A jorao saimankha Chibuk Muisele se borogno gairing tangwi rwphaio hwnwi. Aboni ulobo Bibi kok rwma twi kok narwkkha Chibuk no no sai songkha. Bupha o kok sioi chibuk no tanwi dongor bokhorogo phobwi rwio aro khumpui phang achaioi motom bahai saro. O khumno kholwi Bibi bahanok khajuo borlaikha. Bibi ni khaju khe bukhurwi wngwi chwnaoi motom sao phiya hanok ni khe baburai wngwi thango. Ulo aro bwsaino phobma thai hwnwi sioi Bibi "Dongoiwi Dongoi kisa naisingradi" hwnwi ringwi bibi Dongor twisa twi lomwi kulugwi thango.
Kubun Article: Tiprasarogni bisingo Debbarma rog Kowai tanmani tamo?
Dumboor twini kwcharo tai kaisa thai Narikra buphangbai kuplung tei kaham sepni nogorai tongthai nok tangjak belaikhe naithothok. Abo lukurokni khano khokjak thai tabuk. O thai lukurokni thani Narikel kunj mungwi sinijago. Beraikhiri hamjaknai lukurokni bagwi dumboor o thangwi tongna bagwi kaham sepni tongjaknai thai tei twio beraina bagwi kajaknai Rung, Water Scooter tei helipad swnamwi helicopter bai berainani sepbo rwjakgano haste haphang bai. Abono karwi kubun kaiba twikhor kwcharni haplogo bo beraina thangnai rokni bagwi kaham tongthai rwnao nogorai tongthai nok swnamna bagwi chabjak.
Bisi brumno hangraini jora Dumboor o kaisa kotorma ter songchajago.Tripura hasteni joto bosongni lukurok o hukumu tero manjakphaio. Salnwi rwgwi hukumu ter songchajago O twikhor amchaio rwbai kwrwngrokni rwchabmung mwsamungni bisingwi naithokma khwlai. O terni jora aro lukurok mwtai khulum phaio tei nukhungni khoroksa swk thwikhe aro tukui kwtharkhe mwtai rioi bekreng khibiphaio. O ter ni banik o nok nukhungni manwi-khwnwi no khobwi kanmung chummungbo painani manthogo.
Dumboor twikhor hukumuni gwrwng bai kwrwngjak kaisa amchai. Bini kwcham kothoma jeswk lukurokno wansugmung rio aswkno o thai tabuk beraikhiri hamjaknairokni khano sotono. Lukurokni chaitokmabai nugui mankha jora bai baksa thaini goron swlaijakmani. O hukumuni bokocho wngwi tongrwkjak thai tabuk beraikhiri thaio swlaijakkha.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"