top of page

Tiprasa rogni bisingw sakbaithang swnamjak jotoni sai kotor School Garia Mission

Tripura hasteo Tiprasa luku rokni wanswkmwngw kwbang kwknw swlaimwng nwkjagwi tongw. Tabokni simiya aghini siminw – kaisa nukhungw sak rwngya phanu sakni bwsa sakni sanw kaham kwrwng khaina ni Bwma bwphani emang jotoni nw. Omo haikhenw Tripura hasteo English Medium School o phwrwng wani bw bwma bwphani emang. Kwbangma school tongw Tripura hasteo Baksa ba English baksa ba bangla podrepor – baksa ba Christian Missionary school chalok rowi tongw Tripura amchai rogo, Phiya omo haikheno kotor chikon sakni yakbai bachajak School bw tongw Tripura hasteo Tiprasa rogni bisingw. Omo haikhe Tiprasa rogni yakbai swnamjak jotoni sai kotor School nw twi tini chwng swkrwpwi saiman lainai – bw ung kha Jamatia Hoda bai twiduljak Garia mission bai naikoljak “Garia Academy” School.

Baba Garia Mission School
Garia Academy - Jamatia Hoda

Jamatia Hoda bai twiduljak Garia Mission bai naikol jak Garia Academy Model nw sungsa jagwi tongw Killa amchaini Atharabla Kami o. Tabok Garia Academy Model o rwngswrwngnai roknw class KG ni simi class 12 jora phwrwng rojagwi tongw. Omo simiya aghini simi nw Garia Academy ni bisingtwi Madhyamik Dropout rwngswrwngnai bw Garia Academy ni bisingtwi phwrwng jagwi tongw.


Garia Academy Model Jamatia Hoda ni bisingtwi kaisa School nw CBSC Board swnamna bangwi belaino masakthar laijakha. Waisa ba omo ung yakhw baksaba omo ungya khw hinwi sajak ma bai. Phiya Jamatia Hoda ni kaisa kaisa kamini Tex haiya kheba rangjoma khailai mabaino tabok Garia Academy thungjwngjalnw methe laiwi tonglaio. Aphro ba o phana chuba kha aphroba o phana chubawi nw tabok phanu chuba mani bisingtwi nw School nw kwrwng rowi tongo. Garia Academyni kaisa kaisa manwi luku rogni chubamani manwi khuknwi mangnw bangkwkma nwk jagwi tongw.


Jamatia Hoda ni wanswkmwng bai 2001bisi ni simi yapri seplaikha School kaisa swnam laiwani bangwi Jamatia Hodani bisingtwi. Yapri sepamani yakulo khenw 2002-2003 bisini simi kheno rwngswrwng nai roknw School admission yachakna chengkha. Puila 21 jona rwngswrwng nai rogno twiwi nw Garia Academy Model chengjak mani tabok khe 617 jona class 12 jora swrwngwi tongbaio. Eyang Garia Academy Dropout coaching centre ni koknw sakhebw 21 base passed ungwi thangbai kha. Tabok ora passed ungwi thangnai rok kwbangma kaham kaham kwchwk baremo nw samwng manwi samwng khai tongbaio hinwi sawi khuna rokha Baba Garia Mission ni lenglajak tangphang okra Ratan kanti Jamatia.

Jamatia Hodani bwkhaktwi kaisa kotor wanswkmwng ungkha o Garia Mission nw bahai khe University jora twlangwi thangwi manai bw no naharwi Jamatia Hoda ni ungwi samwng tangwi tongw. Garia Mission Head office ungkha Atharabla kamini Garia Hathaio – o thaionw Garia Mission University swnam wani wanswk laijak Hoda ni bwkhaktwi. Baba Garia Mission bai cholejak tabok bebagwi 13 thai chalok jagwi tongw Garia Academy Model School. Garia Academy Udaipur tei Amarpur bwkhaste rogo nw kwbangkwk nwk jagwi tongw. Tabok Jamatia Hodani bwkhaktwi Dhalai hankhor rogo nw Garia Academy nw swnam thanio yapri sepjak. Phiya kaisa kha khamjaknai kok Head office haiya kheba Atharabla Kamini Garia academy o simi nw class 12 jora rwngswrwngnai rok nw phwrwngwi mankhw. Tei kwbun School rogo hinkhe tabok phanu Senior basic joranw phwrwng jagwi tongw. Omo corona hai bemar phaiya hinkhe kwbun thai rogobw class 12 jora twlangwi mankhamw. Tabok phainai bisi rogo teibw kubun thai rogo bw class 12 jora de khaimanu sakthar laijak Jamatia Hodani bwkhaktwi.



Je Regional Branch tongmani bebaknw Garia academy ni mwngbai mangnw chalok jagwi tongw, phiya aghio kwtal kwtal jora kwbangma schoolni mwngnw podrepor mwngbai pharjak tongmani – baksa ba pohor,baksaba yapri, baksaba Hamari rok hinwi. Ora Jamatia Hodani bwkhaktwi kaisa kotor swrwngmwng mankha kaisa kaisa branch nw mwng juda juda pharwi le chwng kaisa thaio si CBSE board raida bai chalogwi mania hinwi tabok khe joto branch no nw kaisa mwngbai khaiwi paikha.

Kaisa luku rogni khugw swmwng kotorma kasajak Jamatia Hodani School o ba Jamatia simide ma swrwngnai hinwi? Omonw Ratan Kanti Jamatia kaham khenw sawi khuna rokha Garia Academy School o bebak dophani borok roknw swrwngwi tongbaio hinwi, toma kokborok sanai toma bwini koksanai, ora wansa dophani borok roksanu swrwng tongphai baio hinwi.


Garia Academy o tabok rwngswrwng rogni bangwi chhep rojagwi tong Hostel, Girl Hostel tei hostel tongya rogni bangwi bus service ako rok. Omo nw karwibw chukjaya nwkhung rogni bangwi bw maghunang phwrwngna yapri naharjagwi tongw. Thangnai bisi tham romwi bebak branch o nw khorokbwrwi khorokba khaiwi phwrwngmwng rojagwi tongw. Tabok phanai bisi rogo bebagwi 50 jona rwngswrwngnai haiya kheba student chwkjaya nukhungni borok roknw maghunang phwrwngna nahar jakphinai.

Atharabla kami ni Garia Academy nw karwi Amarpur tentui kamini Garia Academy kotor khaiwi swnam wani yapri nahar jagwi tongw, ora tabok phanu school-Hostel swnamna naharmwng Jamatia Hodani bisingtwi. Phiya Garia Academy Atharabla nw karwi Amarpur amchaini kaphro onw tabok rwngswrwng nai rok nwkjagwi tongw.

Garia Academy bwkhaktwi kaisa kotor achievement omonw Orani rwngswrwngnai rok bisi bwrwngnw 100% passed khaiwi thangma nwk jagwi tongw, baksaba 1st Division manwi baksa 2nd division manwi. Orani bisingw jotoni sai kisa percentage ungkha 52% manwi passed khaiwi tongw. Garia academy o tabok kainwi Stream nw phwrwng wani sep rojamankhw kaisa hinkhe Arts tei akisa hinkhe Science, Phainai bisi rogo Commerce stream tobowani bw saktharwi tongw.

Garia Academy ni Hostel tongwi swrwngnai roknw swrwi horo special class bw nahar jagwi tongw. Phwrwngmani thaio Schoolni raida bai Hostelni phwrwngmani raida kaisa nw –je babe school principle naio omo haikhe nw Hostel ni Superintendence bw bo haikhenw naio. Phiya aswk daity CBSE board ni affiliation manliya – haiphanu CBSE dash khe nw phwrwng jagwi tongw Garia Academy. Jamatia Hoda ni kwbangma saktharma baino mankha 2012-13 bisi o CBSE Affiliation. Garia Academy o laibuma rokbnw wansogwi Tripura hasteni bubagra rogni mangthang rokbw swnam jakha.


Omo haikhe nw sakbaithang bachawi mankha Tiprasa rogni bisingw kaisa kotorma School haiya kheba Baba Garia Mission. Jamatia Hodani kaisanw kotor naharmwng bahai khe University jora twlangwi manu.

O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Comments


bottom of page