Tiprasa dopha ni kwbangma sikla siklirog mwnakgo kwlwkgwi tongo eba cha hamya chalaiwui, phekjaknai manwibai kobol lai tongmani nukjago. Omohai jorawo kwbangma dophani sijak nukjak takhuk bukhuksong, rwngthwng bodolrok (Political Party), rwchap mwsakwrwngrog tongmung chaya no kasuna bagwi sichalai phaimani bo nukjagwi tongo. Tei khaksa bwkhako kami amchairogni kwbangma NGO motharogbo bwskango phaimanibo nukjagwi tongo
Drugs chama eba drugs naharmano kasuna bagwi Tripura o kwbangma NGO motha khajakrog tongo. Aboni bisingo kisa juda khwlaiwi puila Tripura o yapri naharjakha “Yak bai Yak Foundation” mungwi kaisa NGO. Aro tongo naikini khwlainaini bisingo America o sebuk khwlaiwi tongnai Doctor Swarnalata Debbarma tei kuchuk beremni adongrogbo. O NGO sikla siklirog phekjak manwi chawi lama korojak bororokno o drugsni yak kaknani bagwino yapri naharkha eba kaisa workshop khwlaikha.
Teibo thinango chini hani bagwi eba chini bwsarogni bagwi samungo yak rwnai hwnwi sakha twidulnairog. Yango khorok saraniswlaiphano kwbang Tiprasa sikla phekgwi tongnairogno saknaimanibo nukjakha. Borogno bahaikhe tongnani kok kwcharmani tei bahaikhe tongkhe yak kaknai aborogno sawi saknai bithi berairog rwmani yagolo Dr. Swarnalata Debbarma sakha dophao phekmungno chai tongnairogno sikiri sokorom khaiwi bu tok khaimabai jwngjal kakgwlak hwnwi. Kami kami amchaio motha khawi phekmung manwino chamani kasuna kok pirmani belaino kaham. Drugs chanairogno buma tokmani swlaiphano kotor samung wngnai borogno drugs chamani lamano kasunani.
"Chini Tripura haa o drugs chanairogni bagwi ang wansukha ani Foundation kaisa kwtal Yak bai yak Foundation, aboni bisingtwi kaisa aro workshop hai drugs awareness buma buphasongrogni bisingtwi ang sanai medicine no karwi bahaikhe drugs chanairogno manage khainai," hinoi sakha Dr. Swarnalata. Bo teibo sakha, "Drugs wngkha joto jagano hamya: brain, sakni bagwi tei joto jaganno hamya, actually drugs no twiwi government rok bo case nana nangkha, aboni bagwino angbo wansukha kaisa Social Workshop khaikha tei kwbangma thainino phaikha hakchal sampani. Anibo tei chini Foundationibo kaisano naharmung o deramungi yakni bahaikhe katirwui mano, serious passion borok active user rogbo phaikha."
O workshop o Doctor Swarnalata drugs tabukbo nawi tongnai tei kwbangma borogno kaham kaham kok sawi rohorkha. Bo sakha je drugs nanai rok bohamwino tongnani muchungjakgo. O foundation bithi beraini bagwi joto kotor kotor company baibo koklam salaikha. Tei borog chubawibo tongo. Aboni swlai teibo nangkukjak wngkha Drugs naiwi tongnairogno prescription swijak tongmani abono naiwi charwnani nangnai bithi berairog.
Drugs chainairogno bu-tok khwlai yawi, borokno romkhe kisa misa kutukmani ulo bono kahamkhe kokrog sukurubwi sathai eba swngthai. Tei sikiri sokrom khwlaikhe borog khani kokno khulugwi sagwlak. Chwng borogno swngthai bahaikhe Drugs naharkha ? Nwng hamnada muchung? Aborog khwlaiwi kok ma swngnai. Kami kami Drugsno twiwi motha khamani abo belai kaham kok. Phiya borogno roma simibai borogni samung paiyakhu ani wansukmungo romani yakgulo borog tamo khwlaina nang Drugsni nukhungrogno chubachu khwlaina nangnai. Borog tomung Doctorogo thangna nangkhe tei rangni jwngjalrog tongkhe rangni chubachu rwkhebo belai kaham wngnai. Abohai khwlaikhe nukhungni bororok lachimarog kirimarog kisa khaikwlaijaknai. Drugs chanaini nukhungni borok hodani bororokbai milithaya hai wngwi thango abohairogno bwskango tubunani nangnai Tripura ni sijak nukjakrog. haikhe bwskango tubuyakhe chini hoda teibo chikonwi thangnai. Hainosi chini borok kisa wngjak, aborog belai nangkukjak. Say no to drugs.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.