top of page

Tripura Republic Dayni Tableau Wa-no Sinimung Riui Swnamjak, Mankha 2nd Prize


Wa no promote khaijago, Twitter image.

Tripura Northeast Indiani bwsasa state. Tripura haste tongkhorbai gwdaljak tei mwchangjak. O haste bwsasao jotoi 19 tribes tongo. Belai naithothokni bisingtwi kwthalaiwi tongmani halokbo belai kaham. Environment tei naithothok Walwng, Bolongbai o tripura haste jottobai sinijago, bolaijago tei sinimung manwi tongo.


Bisibrumni ahaino taklaibo 26th January, Republic Dayni Tableau represent khwlaimungo 'Wa'bai swnamjak Tripura mankha ulsa Sokat eba 2nd prize. Tripura Tableau eba Kaya 'Wa'bai khwlai swnamjak aro tongkha 'Lampra wathop mwtaino surimungni sinimari tei lukutong raida riui swnamjakkha. Tripura tableauni logio tongkha 'Lebang Bumani' Tripuri lukumwsamung tei lukurwchapmung. Abohaino Taklaini 26th Januaryni Tableau represent khwlaimao puila beremni sokat mankha 'Sri Ram mandir'ni sinimuno swnamwi Uttar Pradesh haste, Ulsa beremni sokat mankha Tripura haste tei ulnwi beremni sokat mankha Uttrakhand.

Tripurani wngwi taklaibo 72nd Republic Day o tableau represent khwlainani bagwi Tripura, ICA eba Information and Cultural Affairs Departmentni sakaono jotto barja rijago ebakhe o samungo ICA departmentno tango. O tablueau represent khwlaina bagwi 12nos tripurani tableau artistrokno saiwijakkha tei aroni bisingo chwla artist 6nos bwrwi artist 6nos khwlai borogno 1monthni bagwi Delhi o rohorjakkha. Tripurani Tableau artistrok 1st january o tripura haste yakaro. O artistrokno naikolnai wngwi thangkha ICA departmentnino officially khoroksa sebuk khwlainai Mr. Adhiraj Debbarma. Tripurano karwibo tei kubun hasteni jotto tableau represent khwlainai artistrokno tonina bagwibo Ministry of Defenceni kaisa camp swnamjakkha. New Delhinino kaisa jaga Gurgaon townno a Camp khwlaijago o 26th January purposeni bagwi, a Camp mung RR eba Rashtriya Ranga camp hwnwi sinijago. Camp o Tripurano khobwi jottoi 17 states Indiani tableau artistrok tongphaikha represent khwlainani bagwi tei abono karwibo podrepot ministry departmentrok tongphaikha. A camp o tongwino tableau swnamnanibo samung tangjago.



Tripura haste ni Delhio thaangnai artists song

Tripuranni wngwi Tableau designer wngkha Tripura ICA Departmentnino Mr. Suraj Datta. Tripurani Tableau Wa'no twiwi swnamkha tei Wano twiwi tripurani lukurok bwswk samungo phwnangwi tong, use khwlai tong, langmabai kwrwngjak obono phunukna thangwino Mr. Suraj bini idea kahamno soi jagao thepakkha tei tripurani tanleauno naithokkhe swnamwibo tisakha. Tableau swnamthani, chubathanibo ahaino wa kwrwng, swi kwrwng 12nos artistrok tongo swnamnairokbo jotto tripura hasteni mangno. O tablueau swnamna bagwi nangmani materialrok delhi o jeta manthokya aborok Wa, Buphang, Waruk, Son abohairok tripuranino kwbangkuk twlangjakkha.


Taklaini 26th January, 72nd Republic Day o jottoi 17nos state participate khwlaikha tableauni representni bagwi. Oroni bisingo Tripura ulsa eba 2nd prize manwi Tripura hasteni mungno kuchugo karikha Tripurani wngwi thangnai jotto artistrok. Tripurani tableau Wano twiwi bolaimung, sinimung riui swnamjakkha. tableauo phunukjakkha sirisitini simi mwtai khulumwi phaimani wabai "Lampra wathop mwatai" ni symbol. Tripurarirok achaiphuruni simi thwima jorano wano samungo phwnango abono rwgwino o tablueau swnamjakkha tei aboni logio artistrokni kanmung, chummung mwchangsajak jotto Tripuri traditional dressbai. lama himmungo tongkha hukumu- mukumuno rwksajak rwchapmung 'Lebang Bumani' tei mwsamung mwsaui naithothok khwlaibo phunukkha. Tripura tableauni wngwi theme rijakkha- "Eco - Friendly Atma- Nirbhar". Tongkhorbai tongthanio tripurani lukurok belai tongkwrwng hwnwi borom rijago tongkwrwng. Hoda, Dopha khaui bwsasa hasteo naithothok culture twiwi tonglaio.


India hakotorni northeast o khopjaknai bwsasa state wngkha Tripura. Tripurani 19 tribesrok jottono baithangni hukumu mukumubai langmano bwskango twilaio. Mo hai jorao india hakorni 26th January, 'Lukuraida sal'o Tripurahai bwsasa haste hinjakphano jottoni bwskango represent khwlai manmabai tei baithangni rich cultureno phunugwi manmabai belai khatungo tei kha swrango tripurani borok wngwi. Bwskangni salo teibo Tripura haste sinijakthung, bolaijakthung, sinimung manwi hakotoro borom manwi tongthung hwnwi tini chwng jotto tripurirokno kha swtanglaio.


This article is created as a part of the Adivasi Awaaz project, with the support of Misereor and Prayog Samaj Sevi Sanstha.


コメント


bottom of page