Tripura Haste-o Bosor Brum Brum No Jagannath Mwtai Kailaijaakgo

Tripura o Ratha Yatrabo bisi brum brumno palaijagwi phaio. Mwtairogni bisingo tongo eba nukjago Jagannath, Balabhdra tei Subhadra. O mwtai bisio waisano khwlaijago eba palaijago. O mwtaio Hindu tongtharni lukurogno palaio eba khulumlaio. O mwtai taklaibo Corona Virusni bagwi haphangni bwkhaktwi kotorkhe mwtai rwnani gosimung rwjakliya bugrakhor Agulio (Agartala).

Tripura haste-wo bosor brum brumno Jagannath mwtaai suri jaago

Tripura o jotoniswlai kotorkhe banik eba ter khwlaijakma wngkha Melagarh o. Haiphano raidano rakhogwi chikonkhe mwtai rwmani nukjakha. Sathai kwlaio Covid-19 ni kobolmungni bagwi bisik nwi (2 Years) romwi Ratha Yatra mwtai khwlaiwi manliya. Phaidi hinkhe Tripura ni kaicharni hangkorni bisingo Sepahijala hangkhorni Jampuijala RD Block Deb Charan Parani Shri Gouranga Sebha Mandir Ratha Yatra mwtai rwmung, bahaikhe khwlaijak eba palaijak tei bisi bwswk wngkha o Ashram aborogno twiwi sukurubwi saimanlaianw.

Chini borok rok no waa bai khe rath swnaamo

Ratha Yatra ni mwtai nok swnam sokbainani bagwi jora nangkha nokha saltham (3 Days). Tei o mwtai nok swnamthani nango wachur wah kong nwichisni, wathwi wah kong sara, gogori thaibrwi, khum, paat-ni dwkhwi akorog. Ratha Yatra mwtai nok swnamnai khorokthamrogni bisingo tongo Bishwa Mani Debbarma, Mundai Debbarma tei Dilip Debbarma. ALM bai swngjakhe borogbo sakha, chwngbo aro cheraiphuruni simi nugwi phaimani mwtai tei khatung khajani bisingtwi tabukbo palaiwi tongkho thinangobo khwlaijaknai hwnwi mwtaini thani khulumjago. Abono karwibo Jagannath, Balabhdra tei Subhadra o mwtaini bisingtwi Covid-19 bemarni yakni yokna wngthun hayung haa kotorog tei kami hamkwrai teibo bwskango wngthun hwnwi chwng khulumjago.

Shri Gouranga Sebha Mandir Ratha Yatra mwtai haiyakhe o Ashram 1832 bisini simino khwlaijagwi phaimani. O Ashram o mwtai achukrwjakmani Odisha hasteni Puri ni. 2021 eba tabukni o jora o ashram tei mwtai twidulnai Sachin Kalai. Bisi brum brumno tongthothok khwlaiwi hohom dodomkhe palbaksakhe bayap sakbaksa malaiwi khulumlaimani nukjago. Mwtai twinai Sachin Kalai khoroksa rwngnokni phwrwngnai okra tei kami amchairogo hoda hamkwraini samung tangnai hwnwi sinijak mwkhang. Lukuni jwngjal tongma eba Tripurani beser basar kami amchairogo bahaikhe teibo hamkwrai tubuwi man abo kaisa bini naharmung. ALM bai kwrwngsa malaimao Ratha Yatra swngjakhe Sachin Kalai sakha, Deb Charan Para jotowi khung nwiraniswlai kwbang nukhung tongo. O kami joto tongtharni (religion) lukurogno tongo. O mwtaino kitingwi bisi brum brumno lukurog phailaio kuru kuthumkhe. Tei thaisa nangkukjak wngkha abohai chini kami Ratha Yatra khwlaijakma bahaikhe hinkhe Comilla haa (Present Bangladesh) khwlaijago Ratha Yatra mwtai. Ah jora Comilla haa kotor Tripura o khobjak tongmani. Aro nugwino chini kamini mwtai twinairogbo swrwnglaimani eba mwtai songsalaiwi khulumlaimani nukjakha.

Rath swnaam nani sal thaam nango (three days)

Phiya taklaibo Covid-19 ni bagwi kisa borok khaikwlaijakha eba kisa phaimani nukjakha. Jagannath, Balabhdra tei Subhadra o mwtaino khumlumna bagwi kamini lukurog o ashramo phaiwi ratha sotonlaio. Taklaibo abohaino nukjakha chini Ashram o , phiya coronani kisasa kebengmung phaikha mwtai rwthani. Abono karwibo mwtai rwmani paithago mwikwthwng thaikwthwng, bwthai athairog sarjago. O mwtaini bisingtwi abono surima eba khuluma bwskangni salo kaham kwrwng tongnani wngthun joto tongtharni lukurog abono naharmung.

O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.