top of page

1997 simi rwchapkwrwng Goutam Debbarma yapri semani

1997 Chongpereng Choir Group bai kokborok hapharo gwdalma. Goutam Debbarma Tripurani kokborok rwchapmungni hapharo belai sinijak mwkhang. Kubui kok sana thangkhe agi chwraini simi bo rwchapna muchung manliya kisaphano Interested kwrwi. Bo jephuru Tripura ni mungwnang Hostel Umakanta rwng swrwngo eba aro tongwi tongphuru hukumuni programrog wngo tei jephuru bo class Eleven pariwi tongphuru salsa bo school ni belai lengwi phaimani jorao khoroksa bini pal Satya Debbarma, bo tabuk BSNL ni khoroksa Technical Engineer hinkhe bo salsa Guitar tamwi tongo. Bini guitar tamano khwnawi Goutamni bwkhao belaino hamjakmung phaikha. Hinkhe bini gana thangwi swngkha Guitar swrwngnani sal bwswk nang? Hinkhe Satya sakha abo swrwngnairogni sakatharmano depend khaio hwnwi. Hinkhe Satya kaitham Chords swrwngdi hwnwi kaitham chords phwrwngkha. Nokha saltham ni ulo (3 days) ni Goutam swrwngkha abobaino twrwk twrwk rwchapmungbo swnamkha. Rwchapmung hinkhe Nwng naithokma mwtai bwsa hai. Hinkhe aphuru Town hall ni kaisa programbo present khaikha aphuruno puila damsao kamani Goutam Debbarma.Ah jorao kokborok tei modern rwchapmung rwchapnairog belai kisa tongmani Tripura haste o. Goutam Debbarma ni kaisa rwchapmungni bijap tongo aro jotowi tang saraswkni swlai kwbang rwchapmung swijak tongo. Abono karwibo tabuk kwtalrogbai akobai jotowi tang saranwichiswk wngkha rwchapmung. Kokborok rwchapmungni hapharo kwbangkuk sana thangkhe Romantic, Sad tei haa no lobwi rwchapmung kwbangkuk rwchapkukha tei rwchapmung swikha. Rwchapkwrwng Goutam Debbarma jephuru 1997 Maharaja Bir Bikram College o First Year swrwngwi tongphuru TSF Town Committee ni Secretary chongwi rwjakha. Hinkhe ah jora joto program khainani bagwi Goutam ni thanino barja tongmani.




Ah jora tabuknibai sunani thangkhe Tripura hasteobo kaham tamjaknai manwi kwrwikuk hwnwi mano. Abohai joraono kaham khwlaiwi program khwlainani bagwi Sound System bara naharwi Tripura haste tabukni sinijak mwkhang Kwplai Jamatianobo Keyboard bara naharwi tamrwkha pandao. O jorani simino lukurog chini rwchapmungno hamjagwi twrwk twrwk kokborok hukumuni hapharbo twrwk twrwk warwi phaimani hwnwi sakha rwchapkwrwng Goutam Debbarma. Ani kok nini kok rwchapmung tikhwlaimani wngkha 2016 bisi o. sana thangkhe o rwchapmung Kok Tripura koktwma habanokni nokphang Kamal Kalai bo tabuk Tripura ni TTAADC haphangni EM, samani ulo swinani bagwi yapri chengmani. Ah jorao wansukmang wansukmangno tamo khe swnamnai hwnwi bokhorog hiliksai tongmani. Twrwk twrwk bisa laiwi bisiknwi laiwi thangkha.


Channel swnamya sani swkangno sanmani rwchapmung. Phiya channel nongkhorwi thangkha. Ulo atomsa wansukha “ Ani kok nini kok mani kok khani kok swng jotoni kok” aboto chini kokborok no twise chini je hukumu mukumu je kwmajak tongmani aborogno joto naitugwi karinai chini channelni bisingtwi phunuknani ah naharmungno twiwi video khwlaiwi phunukha. Tripura hasteni rwchapkwrwng thwiwi thangjak Bimal Debbarma ni paithak rwchapmung abono. Ah jorao bo belai sakhamya wngjakbo tongmani. Bo Goutambai kahamkhe sinilaimani hinkhe 1993. Aphuru programrog khwlaina thangthanino malaimani. Ah jorao Tripura hasteni puila Guitar kaisabai rwchapmung swnamkha . aborogni bisingo tongo Nwng naithokma mwtai bwsahai, Oh Naithokti . o tangnwi rwchapmung bugrakhorni agulini Motor stand o phaljakha kwbangkuk khwlaiwi. Aboni ulo Tripurani kokborok rwchapmungno bahaikhe teibo phuwarwi man yang bwkhak wansugwi yapribo sekha. Ah jora tongo thwiwi thangjak Bimal Debbarma , Usha Debbarma , Jayanta Jamatia, Kwplai Jamatia no khobwi tei kwbangma rwchapmung kwrwngrog hwnwi sakha Goutam.


Tripura hasteo kwbangma rwchpmung kwrwngrog tabuk twrwk twrwk achaiwi tongo. Aborogno nugwi kha belai tongthogo tei kung chuksao. Tangwi hinkhe rwchapmung abohai kaisa manwi. O manwini bisingtwi chini laibuma kwrwngjak, chini mukumubai kwrwngjak, kokthai-koktangrog pirsajago hayung ha kotor gwnangwi. Aboni bagwi rwchapnairogbo dophani yakhwrai. Bo sakbaithang tripura no karwibo phatar hasterogobo panda akorog khwlaikha. Abono karwibo Tripura o aswk hakchal hakchal panda akorog khwlaio aro thangwi lukurogno abohai hwnwino kok kwcharma jora jora muktwi kuplwng kwlaiwi sakmang kwlwipwrawi swilai swikong kwlwio swijao rwchapmung. Phiya o rwchapmungno norog haino ereng hwnwi ta wansukdi. O rwchapmungno dophano salsa phiyoknai tei hodani samungno tangnairogno kha bacharwnai.

"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



Comments


bottom of page