Hachwk harung hapung hathai bolong bulung kwkhrang chawi harep bwpra lama joto thaibai kwrwngjak kuplung chini Bithi bwrai nangmani sakhamni bagui katirwi manai manthokgui tongo abohai kwrwngthai rogo chini Naithok hai nu manthokgo.Buphang 'Olta Lengra' mung kahambai gwdaljak yarwng bwlai bedek bubar bwchlwi bebak khopbwi samungo nangmani bithi hinui sinijakgui chini chuchurogni thani sawimanna mano. Chini chuchu songni khukkwtwi kahambai o bithi bwphang no twiwi chwng saimanlainai abo bwswk kaham tei bo kwsao tei bo bemarno hamrwi man aborogno.
'Olta Lengra' omo wngkha nangmani bithi buphang bwsa' tei omoni bithi nangma belaino nangkukmani kwlai. O Olta Lengra bwphang ni simi khwlai yarwng tei bwlai bedek bwchlwi jotono buphang phangsa bithio nango.Kami amchaio tongwi tongnai chini sak chalairogni Amal jora rogo omotwi bithi bwraini nu nawi kulum kwsarog hamrwbaio.Sakham thani Olta Lengra ni bwlaino buwa saphuru hinkhe bwlaino tokgui bini bwtwino buwa sama jaga tulabai khe buwa kosokgo sinno hinkhe buwa samarog hamo. Tei Olta Lengra ni yarwngno hinkhe musukrog himwi maya wngui yakungo kwsarog wngui tongkhe yarung phuichai dwkhwi mwsakgui kanwi rwkhe bo hamo tei wakrogno bo obohaikhe nu totra kanwi rwkhe hamwi thango.Tabok Olta Lengra ni bwchlwi no hinkhe kwra wngphuru bwthai' bedek khakgui bwchlwi swkrai narakgui bono songui kwrankhe chini rwi chakhakhe bo kaisa bemar hamo abo bemar wngkha je borokrog maimang chana muchung jakgui tongphwlaimang tongo borog obo bwchwlwino salo wainwi khwlai kisa kisa khe chakhe betlai laiwi okhuimani bemar rog hamo.Tei mungsa nangma bobtongkho bini bedekno bonhaino khibina kwrwi kaisa samungo nango abo chini borokrog baksa buwa kwchwng wngyani bagui buwa hokhe bo buwa kwchwng wngo tei bupkhukbo mwnamya swrai swraikhe komor thango aborogbo."sao Banamali Debbarma.
Olta Lengra buphangno buphuru jora manthoknai?
Taktwi masing jora hinkhe bwchlwi kwra rwna thangkha obo rawi painai January jora rogo manai bwchlwi naraknarog hinkhe ayang March April rogo hinkhe Maya wngui thanai tei bini bwchwlwi je thaio kwrai kwlaikha abo watwi kwlaima jora teisa buphang bwsa' wngui achaiphionai.Bini tongma Thai hinkhe bari khaiwi chama aro rogo achaio tei lama ganagini bolong wngui achaio,achaimani kwbang thaio nu haino achaio biyal kwrwi phiya chini borok rog obo khel khaya bithi hinui bo amoswk saimanyana hinui ani saimanna amoswkta."
Siniya tei saimaya buphang bithi ni bagui khibina kwrwi manthok mani nokthai bari ganao nu manu chini sakhamni bagui samungo nangma 'Olta Lengra' mungui kaisa nangkukmani haino hao peplai achaiphaimani buphang phangsa bithi.
Borokrogni bagui hamari wngui achai phaio borokno hamrwna bagui kamio tongnairogni mukumule sinijakgui phaiwi tongo bithi bwraini saimanmungbai gwdalwi mwchangui tabokbo tongkho kubui tei kwthang chini Tiorasa bosongni lukurogbai saimanjak bithi bwraini hukumurog.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"