Tripura hasteni kaisa Tiprasa amchani bisingw kaisa laibuma thai hi sinijagwi tongw Raima saima. O Raima saima ni khoroksa sikla bw chwrai phroni siminw sakni yakbai kaisa kotorma baniyan khaiwani mwchwkma imang tongmani, Bo tini o imangnw mwkthang khaiwani chengkha sakni yakbai Chanchur swnamwi. Bw o Chanchur swna thanio bw bomo hai jwngjalni bisingtwi yogwi bw omo hai yapri nw bw sakni imangni thai swnawi nakha boni sakbaithangni khwk bai tini saiwi manlainai.
Bikram Jamatia sakha bw bahai khe Chanchur swnawani rwngralang - boni khoroksa baiya bw Tripura hasteni phataro thangwi swrwngwi phaijak tongma bangwi nw bw o samwngnw charowi mankha. Bikram ni baiya Sero Jamatia ni yak rowinw bw swrwngwi bw tabok Hati nogo twlwk twlwk boni chanachur nw sorogwi roikha. Tabok boni tongrama thai Atharabla Kami amchai rogni hati nogo bw o chanachur nw rohorwi tongw. Aghi kisa phanu bw Chanchur swnamna rwngya tongmani phiya bw Sero Jamatia nw swnama nwgwi nw bw swrwngwi mankha. Bw boni Chanachurni mwngnw “KHUM” hinwi mwng narwk kha. O mwng ungkha Kokborok kokbai Khumbubar. Bikram bw sakni Bwma o ha sakani mwtai chalangma yakulo bw sakni bwmani mwngbai nw boni yakbai swnamjak Chanachur nw khum hinwi mwng narwk jakha. Phiya boni bwmani mwng ungkha Puspa Jamatia, Bikram wanswkha Puspa hinwi rokhe kaisa film ni mwng hai ungwi thangnai hinwi nw bw Puspa nw kokborok bai pharkha Khum hinwi.
Bahai khe wanswkmwng phaikha Chanachur swnamnai hinwi?
Bikram sakha bw chwrai phrani siminw Business khaiwani imang, bw Business o nw jotoni sai khanangjagw. Bw o samwng hwmwngnw Corona bemar akarma kate mani yakulo khenw chengwi manjakha. Corona ni sai swkang bw Kaisa Business khaiwi tongmani “Rubber” ni business kahamnw cholei tongjamani. Phiya kwpalo swijak tongma bai bwma bw kwma jakna nangjakha Bikram. Je rang aji wi manjamani thangwi paijakha bwmani hamkham naikol thanio. Omo haikhenw bw o Rubber business o tesa kiphilwi manjaliya. Tangwi humale o business Haino hai khaina thang khe belaino rang mari nangwi thangma bai bw o business nw tesa khai majaliya. O Rubber business khaina thangthani 5-6 lakh rangmari nangwi thangw.
Bikram o chanachur nw chengphijama 6-7 Tal ungwi thangkha. Bw sakni yakbaino o Chanachur swnamwi phalwi bw tongw luku rokni thani. Chanachur nw salsao nw 20K.G swk swnamo yak bai swnawi phanu. Samwng tangnai khoroknwi khoroktham tongkhe tei bw bw kwbang swnamwi manu. Boni Chanachurnw Wholesale ni bisingtwi o puila rohor mani phiya o wholesale ni nikhungw bw jwngjal phaima bai bw paiwi manliya. Bikram sakha Tiprasa rokni bisingw tabok phanu Marketing o belaino kebengmwng tong khw hinwi. Boni yakulo khe sak baithangnw Hati hati o thangwi sakni Chanachur tuna thangkha Bikram. Sani borokni manwi ungwi saknio borok tei bw boni chanachur nw Hatio phalna bangwi yachagwi narwk o. Bw bwi hati phalanai rokno kwlai rangmari baino Hatio phalnai roknw bw rowi kwlangw, Sakbw ajimwng phaithung Phalnai rokni bw Ajimwng phaithung hinwi.
Bikram Jamatia luku rokni bangwi sakha jepha manwi nw no khaiwi thangkhe tabok hai jorao kebo twiya hinwi. Tabok bw tei swnamna wanswgwi tongw - Chip chamwng kwtal swnawani bangwi bw. Phiya omo kisa jora nangwi phanu mao tomani hukhe kaisa manwi swna thani bw belai swrwngmwng tyei rang Puisani naharmwng naharwi ma tangw samwngno hinwi. Chanachur swnamwi Bwswk kwbang ajiwi manu Hinwi swngmwng bw sakha belaino ajewi manu hinwi 100% rangswbaiwi khaikhe tei 100% nw ajimwng manwi tongw. Bw o boni Business nw tei bw kotor khaiwi tulang wansogwi tongw. Phiya ora kisa misa jwngjal o bw tong Borok manthok yani bangwi. Tripura Tiprasa bosangni bisingw omo hai samwng rokni bangwi koibo aswk samwng kwrwini bangwi manthokya borok.
Bikram ni kaisanw wanswkmwng boni imangnw tei kwchwk o twlangwani tei thinangw tei bw kotor samwngw Yapri naharwnai. Omo haikhe waswgwi nw samwng tongwi khorok Tripura hasteni sikla.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"