top of page

Tripura ni Takarjala amchaini lukurog Agartala thang-laisu khwlaithani jwngjal o ?

Agartala bai 27.2 KM chalmani. Tripura ni Sepahijala District ni bisingo khobjak tei Jampuijala R.D Block o kwlaio Takarjala. Kami amchaini eba moyalni lukurog salbrum brum Agartala, Jogendranagar wngwi Takarjala thanglaisu khwlailaio tongo lamatwi. O lama twngsasusu belaikhe jora kisani bisingono thangwi sogwio Agartala. Aboni bagwi lukurog o lamnono kwbangkuk khwlaiwi thang-phai khwlailaio eba laisulaio uram uramno. Phiya o thanglaisu khwlaithani jwngjal belai kotorkuk lukurogni? Tangwi hinkhe jorao manya malkhungrog. Jotowi Agartala tei Takarjala malkhung tongo khung char. Aboni bisingo Agartalani simi khung brwi tei Takarjalani simi tongo khungbrwi malkhung. Jora kaisao Agartala ni simi Takarjala thangnani bagwi Bus malkhungbo rwjak tongmani o lamatwi thanglaisu khwlainani bagwi. Phiya tabuk o Bus malkhungni servicebo muthupjak.



Phiya tangwi muthupjak o malkhung thanglaisu khwlaimani servicerog, swngmung lukurogni? Tripura ni kusung kusung tongwi phainai Tiprasarog amang chalaijak, hakchal khwlaijak joto bwkhaktwino Takarjala amchaini lukurog malkhungni sep sab. Abo Takarjala amchai simiya Tipiura ni Tiprasa kami amchai haiyakheba kungthai bara amchai hinkheno kisa joto bwkhaktwi hakchal hwnwi khao chonglaijak Tiprasa lukurog. Tei khaksa bwkhak abo simi kwpalni dosaya jwngjal joto bwkhaktwi. Kokthum no rwksawi sana thangkhe Sepahijala bwkhaste ni bisingo khobjak Takarjala ni thanglaisu khwlainai lukurog habanogo phungni damchi ni bisingo habwi manphano eba swrwngnairog haiyakheba private company samung tangnairog nogo kiphilphurukhe jwngjalo kwlailaijak. Uram uramno malkhung Reserve naharwi nogo suda kiphilna nango. Amchaini sijak nukjakrog salaikha Takarjala ni simi sana thangkhe College o swrwngwi tongnai haiyakhe private o samung tangnairog nok khil tongna nangya, thanglaisu khwlaiwino laisuwi poriwi mano eba samung khwlaiwi mano. khaksa bwkhak o sepno naharwi malkhung sonairog raida chayatwikhe rang naharwibo tongo.


Takarjala ni simi Agartala thangnani bagwi damsa romwi achukna nango malkhungo

Bus malkhung 1991 simi 2002 jora cholijak tongmani ulo haino hai 2018 bisio choliya wngphikha. Phiya hainohai mwthakjak o service. Tiprasa kami amchai haiyakheba TTAADC Area bisingokheno tangwi abohai wngnani nang khorang tisalaijak. Abono karwibo salbrum social media o Takarjala kami amchaini lukurog ni koksilsamung tisalaijak. Jora buphuru lama kaham manani, malkhungni sep sab kaham wngnani, muchungjago takarjala thanglaisu khwlainairogbo kahamkhe laisuwi manani.


Abohai hwnwino sakha khoroksa hoda hamkrai ni samung tangnai Amitab Debbarma. Jampuijala R.D Block ni bisingo khobjak Gabordi Amchaini hoda hamkwraini samung tangnai khoroksa Sentu Debbarma ni koksilsamung Takarjala amchaini lukurog jora kaisao thanglaisu khwlainani bagwi mungsa kebengmung tongmaniya. Hoda jeswk sijak nukjakrog phairwrwk teibo kebengmung kotor phairwrwk. Aboni bagwino tini malkhungbai thanglaisu khwlainani suda sep kebel wngjak tabuk Takarjala simi Agartala laisunani. Aboni bagwino ang tabuk teibo swrai swrai khwlaiwi sanani muchungo jephuruphano agartala thangnani bagwi malkhung kwsakha hinkhe damsa jora romwi achugwi tongnani nango. Sal bwswkle haikhe tongwi manaiba haino tong kosong tongnai lukurogni bagwikhe kebo kok tisanai kwrwi.


Phaidi pal baksakhe khorang tisawi malkhungni service choil khwlai rwlaianw teiwaisa kahamkhe. Tei haste haphangni rwkakhung tei malkhungni bedekni adongrogbo yango Takarjala amchaini bwkhak kisa mokol kaichomjasidi. Haiya hinkhe takarjala amchaitwi thanglaisu khwlainairog bwskangni salo mwnakni imang simisi nuksinai. Kha khwlaio bwskangni salo daktino mwnakno mechenwi pohorni lam nuganw.

"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



Commentaires


bottom of page