Chini tripurasa rog ni chamung bisingo kaisa mui wngkha sikamuk mui borog. Sikamuk no naikhe bo naithok tai chai nai khe bo belai khe kothok. Bono mui bo songwi chawi mano tai mosodeng bo khai chawi manu tai bono chwng jesa mui kwthwng bai sapulwi bo songwi chai manu. Sikamuk no chwng baano twi tukunaa bangwirog thaangphuru kholwi maano. Kheto ni twio bo sikamuk tongo. Tai chwng twimao aa tai khangrai romna thangphuru bo kholwimano. Ang khe tini twisao thangwi sikamuk kholkha. Sikamuk haripek o tongo tei bono kholnani belai khe kwlai. Nije ni yaak twi kholmani bagwi aani bwkha bo swrang phaikha.
Twisani sikamuk kholwi nogo tubui aang bahaikhe song chakha sidi:
Maamblai swkaangkhe sikamuk no kahamkhe ma suwo. Bini bising tei saka ni haripek tei haa no maa sukhlaiwo. Aamoni porewo bini bwklap swkago. Te waisa som bulwi ma suwo. Tamo hinke bini aroni ha hamya bo kag nai tai bini aro yong rog chikon chikon tong mani abo bo thwinai.
Kaham khai chakrubui subai khai mui song na bagwi tiyar khai sinai. Ang tini sikamuk bai kuwaifol no mui borok song nai. Kuwaifol no khugwi, bwchlwi khibiwoi helep nakha.
Tabuk kaisa twgo sikamuk, kuwaifol, som, berma, moso kwthang rajak, swtwi gura, tei doniya bakhor rinai. Kisa twi riwoi twg no kholobwi song sinai. Dhoniya rima bai mui belai khe motom wng phaiwo. Swrabsa kutugrima porewo je somoiwo kuwaifol kisa peithethek wngphuru himkhe mui munwi thangkha hinoi gas mwthaakwi twk karwi maankha.
O mui belai khe kothok tai bahai bo motom. Chwng sikamuk no sudu kuwaifol bai simi chaya tai bo kubuni muikwthwng bai bo songwi chawi manu jemon hoog rogni chakumura bai. Amono yakawi bo chwng sikamuk no muya haiyakhe muitul haiyakhe bolong ni thaa bai bo sungui chai mano. Chwng sikamukno thok bai bo songwi chakhai thogu .bono chwng bokhong gwnang no rugwi bising ni bahan no suchi bai fano tikhlai mosdeng bo chai manu tai baja rog bo khlai chai nai khe belai khe kothok khai machao.
Chwng sikamuk no twimani kwbang khai rog kholkhe bazar rogo tikhlai faal manu. Abo bo kaisa income. Tabuk ni sal rogo tokhaan tei wahan rogo khe bithirok rijago. Phiyaba sikamuk o khe omotihai mungsafano bithi bwrai rok kwlaiya. Haini baang bo bai chini dehaaro khoti wngya. Nirokni gana gini wo twima twisa tongkhe nurokbo sikamuk kholwi sungwi chalaidi.
This article is created as a part of the Adivasi Awaaz project, with the support of Misereor and Prayog Samaj Sevi Sanstha.