top of page

Baithangni hao 6th Schedule tongmabai chukliya, boro o thai?

Hayung ha kotoro naisigwi naidi joto bwkhakno ubrum jabrum eba orai porai wnglaijak. Khao chongmale thaisano, thwiyasak kahamkhe tongwi thangnani. Sal phaio hor wngo teisa samungo kwrwnglaimani nukjago. Nwngle tamo chongwi naharkha khao? Phaidi chwng mokol kaichomwi mukphiliksa khwlaiwi wansukgwi nailaianw hayung ha kotorobo jora kaisa o Raja Maharaj tongmani eba sana thangkhe rajtantra tongmani.


Tripura TTAADC Headquarters

Abohaikhe India haa kotorno karwibo kubuni hayung hakotorobo tongmani jora kaisao bubgrarogni mol. O molno rwgwi naikhe belai amang chanani kok tei kungchuknanibo kok 6th Schedule Area eba ah hasteni lukurog. Ah haa o khorok saracharchibrwi Maharajrog borogni naikolphango tonikha, tonilangkha tei nabonaikol langkha lukurogno. Jora kaisao eba bubgrarogni molo o ha yokjak haa hwnwi sinijakbo tongmani hwnwi kokthum. O haa ni eba hasteni mung tamo? Phiya o haa India ni bisingo khobjak. Songsajakma sal 21st January 1972.


TTAADC Headquarters

Khaksa bwkhak 6th schedule Area tongnai aroni kusung kusung adivasirog eba Tiprasarog no raidano rwksawi rwngthwng, naikolphang, hukumu jotono borogno naikini khwlainani kok tei khwlaijagwi tongo. Phiya naikini khwlainai phano, rwngthwngni lama, haphang ni sep sabphano hindi joto bwkhaktwino norjak. Tomung muchungtwi khwlaina hinkhe 6th Schedule area ni rwngthwng kwrwngrog

thangwi sanmung tisana nango haste haphangno. 6th schedule haste swnamjakmani sal 15th January 1982 bisio. Hinkhe abo bobohai 6th schedule area? Tei bo hasteni bisingo khobjak? O tektono soilaiwi naikha bisi kwbang romwi. Bisikba bisikba khwlaiwi 41 years kajak tabuk 6th schedule area ni eba o council ni bororok. Ah haste eba adivasi eba kusung kusung tongwi phainairog tabuk jotowi 14 Lakhs population. Jora kaisao o haa ni bwsarog 90% tongmani phiya tabuk thangwi sogwijak 25 to 28%. Bo hasteni borok?


Tei mungsa lama kwrwi wngwi tabuk khorang tisakha ah hasteni Bubagra no tei logi tongo tongkosong lukurogbo. Kusung kusung tongwi phainai haa ni bwsa no mwthangnani nangnai tei hamkrai khwlainani nangnai. ayang bwkhak naisigwino thinangni lam sejak. 184 kings ah hastenino tei khorang tisanaibo aroni kungthai bara bosongno. Kokthum no rwksawi o 184 kings ni joto kothoma Rajmalao swijak tongo. O jora Paithago bubagra kwlaio o khorang tisanai. Sanmung, kusung kusung tongnai Adivasi eba Tiprasarogno Constitutional Solution rwnani. Bo bubagra tei bo hasteni?



O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Comments


bottom of page