top of page

Bisi chinwi romwi Ajimwngo yakphlokha Gopal Sadhan Jamatia ni Korai


Khorogo thupi thubwi dipor khiring khiring satungno satung hinyawi phung aikheno mwtaino khulumwi nokni nokhorjago Gopal Sadhan Jamatia. Bini nukhungo jotowi khorok brwi adong. Nok Gomati Hankhor ni love story bazar o. phung aikheno 15 km himwi Tripurani mwtai kotor Ama Hakwchar eba Tripurishwari mwtai kotor o thangwi sogwio koraino logio twiwi.


Bisi chinwi(12 Years) romwi Gopal Sadhan Jamatia matabario korai no logio twiwino ajimani twngsa susu lama. O ajimani bisingtwino nukhung-hukung cholijago. Mwtai naina phainairog mwtai khulumani ulo bini korai nugwi khatung khaja wngjaklaio. Baksa bono phaiwi swngphailaio nini korai kasakhe bwswk rang rwna nangnai hwnwi? Aphuru Gopal ni thaisano phirokmung “Ani korai kakhe norog je muchungtwino eba norogni khao je muchungmani rangno ano yapharjadi”. Sathai kwlaio Gopal o korai rimani bisi chiba(15 years) wngkha. Nukhungo Kwbangma jwngjal tongmani ulo jephuru koraino samungo phwnangkha aphuruni simi mwkhango mwnwi mwng Gopal ni.



Abono karwibo Gopal teibo sakha tabukni o jorao haiyakheba tungbwlang molo mwtai naina phainairog kisa hinphano nukhungo mai khopsa chadorople ajiwi mano. kwbang ajiwi mankukmani wngkha kwchangma molo (Winter Season). Khursathai kwlaio Jamatia Hodani wngwi aro bisio waisa mwtai kotor ter palaijago. A salo nokha sal tham romwi Jamatia Hoda ni luajimungbai joto mwtai rwna hwnwi phainairogno naikini khwlaijago tei kotor khwlaiwi terbo palaijago. A jora rogobo kahamno ajiwi mano tei kami amchairog haiyakheba moyal rogobo bisio waisa wainwi kotorma ter akorog khwlaijak phuru bo bini o koraino samungo thepajago. Waisa wuisu kami amchairogo kaijak chamri kwtal nobo o koraibaino lamsokjago. Aphururogono wngya hinkhephano kisale ajiwi mano hwnwi sakha Gopal.Tripura ni khorok saracharchibrwi bubagra(184 kings) ni bisingo Maharaja Dhanya Manikya 1501 A.D jora swnamani eba songsamani Tripurani mwtai kotor haiyakhe Tripurishwari mwtai. Aro naina bagwi kwbangma phatar hasteni lukurogbo thang-phaio khwlailaio. Tei khaksa bwkhak Jotoni swlai kwbangma ajiwi manmani hinkhe Gopal ni ter kotor songsaphuru kwbang ajiwi mano hwnwibo kokthum. Phiya o tungbwlang molo lukurog chubachu khwlaimabai baksa Tripura ALM ni samung tangnairog Gopal Sadhan Jamatia no korai twijak nugwi khatun-khaja wngmabai baksa khakuwar khwlaiwi kisa misa chubachu rwlaikha. Abobai Gopal belai khakchangjakha.

Gopal Sadhan Jamatia joto lukurogno swrai swrai kok kwcharkha sana thangkhe tabuk Tripura korairog aswk kwrwi hwnwino sawi mano. haiphano angle logio twijak. Tomung nwng kwsrangkhe chana ni mungsa wanana kwrwi. Phiya anile o korai no langmani langma tabuksa jora.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.



Kommentarer


bottom of page