top of page

Chwla ungwi bw MakeUp artist ungwi bachamano omo nw phunukmari Tiprasa Sikla rogni

Updated: May 8, 2023

Tripura hasteo belainw jwngjal nwk jagwi tongw samwng hwmwngnw twiwi, Omo hai jwngjal Tripura hasteo simiya. Thangnai bisinwi bisitham romwi hayung gwnangwi Corona bemarni akarma nwk jakma bai belaino baniya khainai rogni thani jwngjal achaiwi phai ma nwk jakha.Omo haikhe nw Tripura hasteo tabok bw jwngjal kak sokya khw baniyan khainai rogni thani. Omo haikhe nw Tripura hasten sikla rok je borok Agulini collage rogw swrwngwi tongnai rokni koktwma. Tripura hasteo samwngni biyalni bangwi tabok baksa rwngswrwngnai rok sakni Talent tisawi phunukna tei sakbaithang bachana swrwngmwng nwk jagwi tong kha. Tabok Chwla ungwi bw Make-Up khainai haiyakheba Makeup Artist ungwi manu.


MakeUp artist Jugal Debbarma
Jugal Debbarma tei Eliza Jamatia

Thangnai bisa bisinwi o Tripura hasteo chwla ungwi kwbangma borok rok nw Make-Up ni samwng khaithanio kwrwngma nwk jagwi tonga. Borok tabok sakbaithang bachan swrwngwi kwbangma aji mwngni bwkhak thangwi tongw. Baksa Makeup Artist o ajimwng bai nw Collage ni srwngmwng rok yapri kaham sep thanio samwng phunangwi tongw.


Thangnai bisinwi bisitham romwi borogni ajimwng bw belai kebangmwng nwk jakha - hayung gwnangwi corona akarma bai. Tabok corona akarma kesepwi thangma bai tesa haino hai ajimwng lama phuwar jagwi thangma hai ungkha. Borog ni thani luku rokni swngmwng kasajak kwbangma samwng tongw tangwi o Make-up khaina hamjakha nirok hinwi? Borok omonw sao chwng chini Talent nw riphreo hinwi.


Jugal Debbarma tei Model

Tripura hasteni Jugal Debbarma mwngwi khoroksa sikla rwngswrwngnai takhwk bw tabok bw swrwngwi nw tongkhw Collage o - phiya rang puisani jwngjal, manwi khuknwi marokma bai bw jwngjal phaijakha langmao. Bw sakbaithangnw bachana okharkha - bw Youtube naiwi Make-Up khaina swrwng kha, tei kwlaibai Make-up kits rok online ni bisingtwi saksaknw saknai (Mirror) o naiwi salbwrwngnw swrwngna chengkha Jugal. Bw pwila kisa misa Kokborok Artist rogno rang puisa nangya khaiwi nw Make-up khaiwi photoshoot khairona chengkha tei Youtube Vlog ni bisingtwi sakni Make-up ni samwng nw phunuk na chengkha. Omo haikhenw sakni samwng hwmwngnw luku rokni bwskangw sok rowi mankha Jugal Debbarma. Jugal Debbarma bw tabok Kokborok Album hai rogw bw Artist rogno Make-up khaina sep manwi tongw tei Kalaibari panada sanda rogw bw Make-up khaiwi na ajimwng nw phuwarwi tongkha.


“Jugal Debbarma sakha omo nw ani Talent ang tei bw kwchwgw kana mwchwk jagw”

MakeUp artist Himen Debbarma

Omo haikhe nw tei khoroksa Sikla Himen Debbarma tabok bw omo swk khe Make-up khaina rwngkha sakni mwchangw Make-up khaiwinai Bwrwi okhar khe tongma chama nwk khe kebo phanu se siniwi manglak chwla hinwi. Hiren sakni Talent bai nw tini Tripura hasteo mwngswnamwi tongw Himen Debbarma bw. Kwbangkwk Kokkorok Album ni Artist rokni Make-up khainai hinkhe Himen mwng bw aswk nw naharthain kwlaio. Himen sakni talent bainw Tripura hastenw karwi tabok bw kubun hakotor Bangladesh o sakni yakni Talent nw phunukna thangwi tongw Make-up khaina. Himen Debbarma bw salonw Make-up ni bangwi 1000 ni simi 10,000 rangmari naharwi tongw. Bw Kalaipanda roknw karwi bw kwbangma Special Event rogo booking khaijagwi tongw. Tripura haphang bedek ICA ni artist rogno phatar hasteo tulang thani ba Hukumu Mukumu rwkjak panda sandha rogo Hiren bw logeo khaiwi nw twlang jagw Artist rogni hamjakma Make-up artist ungma bai.



Abo roknw karwi bw tei khoroksa aswk nw mwng swnam kha sakni Make-up phulnani Talent bai Mwng ungkha Nairwk. Boni kok sana thangkhe belai nw kwtal jorani kok hinwi manw chwng bw achaiphro chwla khe achaiphanu bw tongna mwchwk jagw bwrwi haikhe - boni mwng asol ungkha Aman Debbarma. Bw khoroksa Kamini Agulio swrwngna phaiwi swrapsani bisingw Make-up artist hinwi mwng swnam khibikha Tripura hasteo. Tripura hasteni mwng gwnang borok rokni Make-up khaithanio rwngmabai daity nw khao thai snwma nakha Nairwk. Bw tabok wedding rogo bw samwng yachagwi tongw bw salonw 10,000 ni simi 15,000 hajar jora rangmari yachagwi tongw. Bw luku roknw tabok phwrwngna bw kisa misa chengwi tongkha.


Nairwk (Aman) sakha - bw omo hai sakni mang swlaimano Hoda rok luku rok kwbangma kok khuna rao phiya bw sakni samwngw nw kharowi khwlainai hinwi. Nairwk tabok kokborok production swnam na bw sakthar tongw - bo boni Youtube channel ni bisingtwi bisi bwrwngnw hit hit kokborok video swnamwi tongw - Channel ni mwng Nairwk’s Production hinwi tabok boni Subscriber 98.8k manwi tongw. Nairwk sakni kisa misa ajimwng phaima baino tei kaisa thai o bw rang invest khaiwi tongw bw thinangnw naharwi.


Omo haikhe nw Tripura hasteo tabok Chwla ungwi bw Make-up Artist ungwi manu hinwi borok phunukmari phunugwi rolaikha. Teibw kwtal kwtal phaibw tongw o hapharo.




"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"






Comentários


bottom of page