top of page

Tiprasa ni chamung no hayung ha kotor o tunsanani naharmung

Tribals Research and Culture Institute ni bwkhaktwi Traditional Tribal Food Festival 2022 khwlaijakha. O chamung ter nokha saltham romwi khwlaijakha. A salo chamung terbai baksa baksa tokey phunukmung tei rwchap mwsamungbo phunukjakha. Abono karwibo a salo National tei International Level ni bisingo yapri sejakrognobo borom tei sokat yapharjakha. Sokat manwi khatung khaja wngmani nukjakha.Chamung wngkha podsa luku ni nangkukjak manwi. O chamung kwrwikhe bororokni langma mungsa kwrwi. Aboni bisingtwi kwbangma dophani lukurog hayung ha kotoro sinimung manwibo tongo. India ni bisingo Northeast ni kaichar hasterogni bisingo dalbidal chamungrog tongo. Aboni bisingo Tripura ni Tiprasarognibo kwbangma chamungrog nukjago eba tongo. Aborog wngkha Chakhwi, Awandru, Gudak, Bangwi, Mosodeng, Hangjak, Pengjak, Awan sokorang, Chatang akorog.Traditional Tribal Food Festival 2022 panda puilani salo kwrwngkha Hon’ble Minister, Tribal Welfare Department, Govt of Tripura Shri Ram Pada Jamatia, MLA, Tripura Dr. Atul Debbarmano khobwi tei kubuni samung tangnairog. Abono karwibo agartalani dalbidal rwngnokni Hostel tongnai swrwngnai swrwngnaijwkrogno tubuwi rwchapmung mwsamung tei tokey phunukjakha. Tei khaksa bwkhak swrwngnairogno a salo tongthok chathokni bisingtwi nokha saltham romwi songjak panda gwdalwi teibo chini panda tongthothok wngkha hwnwi sakha Tribal Reasearch & Cultural Institute ni Director A.H Jamatia.


Indigenous Food Festival

Abohai Festival khwlainani belai nangsugo chini Tripura hasteo. Ayang bwkhak naisigwi naikhe Tripura ni kaichar hangkhor thwgwino eba beser basar kami amchairogo suda abohai Chamung ter khwlainani nango. Aboni bisingtwi chwng joto swrwngmung mano tei palbaksa khwlaiwi thumsakhe malailainanibo kaisa sep kotor. Tei nangkukjak kok wngkha chwng chini Chamungno bahaikhe teibo luku ni bwskango tunsai man ayang bwkhakbo saktharlaithai. Ang sak baithang sanani muchungo Chini Tripura ni Tiprasa hinjaknairog eba kungthai bara bosongrog chini chamungno hayung ha kotoro sinimungni tunsai rwithai kwlaio. Aboni bagwi chubachu nango haste haphangnibo hwnwi sakha Maitang Production bodol ni adong Nanti Debbarma.



Abo bisi brum brumno songsajagwi tongo Tribal Research & Culture Institute ni bwkhaktwi. Jotowi khotol tongo khungchisa. Chini Tiprasa ni chamungno tamo? Bobobai chwng sinijak chamung, kanmung, koksamung, rwchapmung mwsamung, haikheno hukumu mukumuno romwi narwkna bagwino o yapri naharjakmani. Hakchal o tongnai lukurog ni bagwibo kami bisingobo abohai khwlaikhe tei yapri thong rakroro wngnai. Tei rang puisa ajinanibo kaisa lam nuhurnai. Tomung sikla chalairog abohai chamungrogno twiwi yapri naharkhe bwskangni salo manwi hamya chamarogni kisale yak kaknai. Abohai songmarigono cherairogni simi eba rwngnokni simi phwrwngwi tubukhe teibo chakuganw hwnwi khakao hwnwi sakha Tripura ni rwchapkwrwng Santa Debbarma.

Godak waswk - Food Festival o phalijagwi tongw
Godak waswk

Chini borok ni chamung nugwino baniya khwlainani bagwi belai muchungsugo. Chini borok chamung ter hinkheno ang kwbangkuk khwlaiwi kwrwngnani chaitogo tei kwrwngwibo tongo. Kok kwcharmung chini bukung bara je thaiophano chwng thangkhe eba berainairog phatar hasterogo thangkhe kwbang kwbang rang ruiwi painani nango mui tei chamungrog. Aboni bagwi chini chamungnobo bahaikhe 5 stars Hotel hairogo manthogwi man ayang bwkhak naisikthai. Tei thinango abo 5 start hotel o manthokna wngthun hwnwi khorang tisakha Bwrwi bodol ni moisong kwrwng Malati Jamatia.A salni phalnokni achuknairogni bisingo mungrog wngkha Gogra Bodol, Chamungkothok, Bwrwi bodol, Chukhani Khorang, Chakothok, Maitang Production Bodol, Isiri Kamalapati akorog. Chini sirisitini simi Tiprasa bosong chawi phailaima tei o chamungo mungsa thok akorog kwrwi aboni bagwino chini chamungni sakni bagwibo belai kahamkuk. Baksa baksa bororok chini borokni bisingono tongo chini chamungno bahaikhe songnai eba chakhwi, godok, hangjak, pengjak, ikmani akorog bahaikhe songnani nang aborogno chwng narwkthai kwlaio eba chwng aborogno sinithai kwlaio hwnwi sawi khwnarwkha Chakothok Traditional Food ni khoroksa songkwrwng Swapan Debbarma.



"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"




Comments


bottom of page