Corona Virus Disease 2019 (Covid-19) belai kirimasinsa tei wanamasinsa. December 2019 ni paithak bisi bwkhak o Virusano puila siniwi manmani China Wuhan Cityni simi hwnwi kwbangma koktwma habanok tei kok bwlaihni simi awaimung wngjak tongmani. Aphuruni simino hayung haa kotor gwnangwi pirsajago o bemar. Virusni yakni bahaikhe yoknai eba hakchal wngwi manai abono twiwi sapung-hopung bithi beraini amjokmungbo khwlaimani saknairog (Doctors) tei soisiphangrog (scientists). Covid-19 bahaikhe siniwi manai eba bahaikhe sak sak amjogwi naiwi man, abono twiwi World Health Organisation (WHO) samano rwksawi naikhe, aborog wngkha kisa kisa luma, haichukmani, bokhorok samani, langma naharwi manya wngma, sak tongthokya wngma, bahai manya wngma tei thokma thokya saimanya wngma akorog. O bemar sana thangkhe kok thaisabai belai kirimasinsa tei wanamasinsa. Tei khaksa bwkhak borokni langmabo sachui mano.
O bemar ni bwthi kwrwi, phiyaba, vaccine nakha khe, borok rok thaang nani raida wngwi phaiwo. Abono buchimabai no chini TTAADC no naikolnai rok vaccine nabaikha tei jotto borokno no koikha borok bo vaccine nabaithung hinoi.
O virusno puila lukurog social mediani bisingtwino nuklaimani. Ah jorao kebo wansukya o virus hayung haa kotor gwnangwi aswkhe pirsajaganw hwnwi. Phiya jeswk sal bangrwrwk aswkno o bemarbo hayung ha kotor gwnangwi pirsajakha. Abohaikhe Indiaobo o Covid-19 Virus twrwk twrwk pisarjakna chengo. Khursathai kwlai, Bharat Haa Kotorni lukurogbo kwbangma samungni bagwi kubuni hayung haa kotoro samung tangnairog tongo tei thanglaisu khwlainairogbo tongo. Abohaikhe pisarjakna chengo Indiao o Covid-19 Virus. O virusni kokno wansugwi eba coronani kokno wansugwi Indiani kendra haphangbo krakhe yapri naharna chengmani. Tei khaksa bwkhak kendra haphang joto hasteni mantri okrarogno twiwibo koklam kwrwngmani tei bwskangni salo bahaikhe tamo tamo khwlaijaknai aborogno twiwi wansukmungbo naharkha. Kendra haphangni bwkhaktwi sakhwlaijakmani, mask tei sanitizer samungo thepanani.
Phaidi tabuk salka babai haste eba Northeastni kaichar hasteni bisingo Tripurani TTAADCni bwkhak naiwi nailaianw tei je kokthum manma jora swrai swrai khwlaiwi phunuknani chaitoknai. Jeswk kokthuma manma joratwi kubun hastebai baksa haste Tripuraobo Corona Virusno twiwi dakti dakti bahaikhe hakchal khwlaiwi man abono twiwi sakhamni joto raida rakhoknani tei haphangni raidano maninani abono silainai. Lukurogno o vaccine naharthani mungsa kebengmung kwrwi hwnwi sakha TTAADC ni CEM Purna Chandra Jamatia.
Corona Virusno twiwi hojak tei sakhamni raidano rakhoknani bagwi TTAADC (Tripura Tribal Areas Autonomous District Council) joto raida haphangni bwkhak awaimung sakhwlaijakmano rwksawi Tipra-INPT bodolni adongrog Vaccine naharmani nukjakha. 1st May 2021, TTAADCni CEM tei EMrog Kherengbar sakhamnogo Corona Vaccine naharkha. A salo jotowi tabukni kwtal CEM tei EMrogni bisingo khoroksni (7 Person’s) rwngthwngni adongrog vaccine naharkha. Aro tongo TTAADCni Purna Chandra Jamatia(CEM), Suhel Debbarma(EM), Rajesh Tripura(EM), Sadagar Kalai(EM), Debajit Tripura(EM), Animesh Debbarma(EM) tei Kamal Kalai(EM). Abono karwibo a salo tongkosong lukurogbo thinangni kokno wansugwi Vaccine naharlaikha. Koktwmao sawi mankha baksa baksa Vaccine naharnairog vaccine naharmani ulo kisa misa kulum kwsamani nukjakha phiya mungsa kebengmungni koktwmabo kwrwi hwnwi sawi mankha.
TTAADCni Kherengbar CHC sakhamnogo CEM tei Emrog puila Dose eba Vaccine naharwi sakha 42nd days eba nokha salbrwichinwini yagulo teiwaisa 2nd Dose naharna nangnai. sana thangkhe Covid-19 puila-o jeswk kotor nukjakmaswk tabukni Covid-19 2nd wave bemar teibo kirimasinsakuk. TTAADC-o kwplai wngjak rwngthwngni adongrog sakha, jeswk mansak sakhamni raida maninani tei vaccine naharjakyarogno naharnani bagwibo sakha.
Coronani bagwi TTAADC o khungsa Nuai Hallo Centre phiyokjakha. Abono karwibo juda juda ADC amchairogni Sub Health Centreni simibo naharwi mano o vaccine. Laithangjak 2020 bisio ADC Area-o kwbangmano Centrebo phiyokjakha. Phiya hasteni lukurog hojakni bisingtwino ah jora Corona bemar twrwk twrwk helengsasa wngmani. TTAADC amchairogo tongnai tongkosong lukurog baksa baksa hojak kwrwikhu. Saknaikwrwngrog samani ulobo mungsa yapri naharya eba hojak kwrwikhu. Abohairogno sakhamni raidano manina nangnai Corona bemukbai hakchal khwlainani hinkhe. Tabuksak jora eba 2021 bisi TTAADC amchairogo corona positive manjakphano baksa baksa sakhamkha hwnwibo koktwma. Haiphano nini hojakno thinangni thangsanani lama. Aboni bagwi hojak tongthai lukurogbo. Paithago TTAADCni sakhamni barjao tongnai Kamal Kalai swrai swraikhe sakhwlaikha joto naikolmung eba Covid-19 no twiwi haste haphangno joto naikini khwlaio hwnwi sakha. Tei Khumulwngo Oxygen Centre khungsa tonijaknai haste haphangni bwkhak hwnwibo sakha.
TTAADCni bisingtwi naikoljak sakhamrog jotowi khungtham tongo. Aborog wngkha Kherangbar sakhamnok, Twikarma sakhamnok tei Sikaribari sakhamnok. O sakhamnokrogo joto Coronani hakchal khwlaina bagwi sakhamni raidano rakhogwino joto sep sab rwjagwi tongo hwnwi koktwma eba naikini khwlaijagwi tongo hwnwi sawi mankha.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.