Maitang Production Bodol wngkha Tripura ni kaisa Production House. O production 2016 bisi ni simi yapri semani. O production o tongo Tripurani belai kotorkhe sinimung manjak Artistrog. Alaida khwlaiwi o bodol Music Video, Tokey (Films) khwlaimabai baksa hoda hamkraini samung humungrogbo khwlaiwi tongo.Tripura hasteo kwbangma Production house tongo. Aboni bisingo Maitang Production tabuk twrwk twrwk bahaikhe lukurogno video ni bisingtwi sicharwi man ayang bwkhak naisigwibo samung tangwi tonglai joto members. Tei abono karwibo chukya nukhung tei sakhamya wngjak tong kosong lukurogno je mantwi rang puisarogbo kisa misa rwui tongo tei thinangobo krak yapri senai hwnwi sakha bodolni adong Debulal Tripura.
Puila yapri bahaikhe selaikha Maitang Production?
Sana thangkhe Maitang Production puila yapri selaima wngkha NERLP(North East Rural Livelihood Project) samung 2017 bisio tanglaima jora khoroksabai khoroksa kebo sinilaiya tongmani. Phiya jotono Music video eba entertainment hamjago. Haikhe tonglaimangno salsa joto thumsakhe malaiphuru kok salaikha chwng kaisa production swnamlainw hwnwi, aphuruni simino yapri selaimani tei thinango tongnai o production. Tei khaksa bwkhak Tripura ni o Production hwnwi sinijakma logi logi kubun haste akorogo tei hayung ha kotoro kahamkhe sinimungno twiwino chwng pal baksakhe yapri himlainai hwnwi khathonlaimani hwnwi sakha Maitang Production Bodolni President Arup Reang.
Also Read : https://www.adivasilivesmatter.com/post/2022-ni-tring-kwnwi-hakotorni-halok-hamlaima-tring
MPB tamo tamo music Video khwlaikha?
NERLP 2017 bisio Project samung khwlaina hwnwi samung chenglaimani. Puila haino chenglaikha kok salainani hwnwi. Kokchap panda khwlaimani ulono Album khwlaina hwnwi kok salaikha, baithangni rangbaino chenglaimani hwnwi. Puila sinimani music video ni bisingtwino sinimung manmani. aborog wngkha Yapri Barkha Music Video Album. puila films Tongkhor tokey. O films eba tokey khwlaijakmani chikonsa kokbothoma wngkha khoroksa baniya khwlainai tei huk khwlaiwi chalaimano twiwi tokey swnamjakmani. 2nd films Songdarisa ni chongpereng akorog. O tokey kokbothoma wngkha kami borok ni langmano twiwi khwlaijak tokey. Tripura ni Maitang Production Bodol hoda hamkrai ni samung bwtango yak rwlaijak. Corona Virus ni jora Tripura ni beser kami amchairogo eba moyalrogo thangwi chubachu rwilaikha. Puila bwkhak chubachu rwikha Tripura ni hathai kotor kamini lukurogno. Aboni ulo kubun bisio yapri sekha Hezamara, Sinai kami, Hathai kotor o. abobai simi achuk tongyawi hainohai sakhamnogo sakhamya wngwi kwlaijak tei kwrwija nukhungni bororoknobo chubachu khwlaikha. Borogno kwbangkuk khwlaiwi je mantwi rangni chubachu khwlaijakha bodolni bwkhak hwnwi sakha bodolni adong Harendra Debbarma. Chini o bodol kaisa music production bodol aboni bagwi chwng eba chini bodol video ni bisingtwi bahaikhe lukurogno sicharwi man ayang bwkhakno chwng krak kha thonlaijak. Tei bwskangni salo chwng naio norogni chubachu eba manjumung bahaikhe hinkhe chwng muchungo video naimani bisingtwi norogbo swrwngmung manthun tei thinango kokborok rwchapmung hayung kotor o pirsanani. Chwngbo naio chini kokborok music video eba films bahaikhe hayungni lukurogno phunugwi man sakha Bindi Debbarma. Khursathai kwlaio, Tripura ni kami amchairogo tongnai sijak nukjakrog kaham samungo yapri selaithai kwlaio. Tomung nwng khoroksa sijak hinkhe bwskango himwi samung chengdi. Nini bisingtwi uklogo kamini bororok phainai no phainai.
Chwng NGO khwlaimani bisingtwi kami lukurogno thumsa khwlaiwi toniwi mano tei songsa kami hayung ha kotoro sinimung manwi mano abo nini wansukmung tei naharmung pal baksa tongwi himlaikhe wngya samungphano haino laite sakhe samung chanai hwnwi sakha bodol ni adong Santa Debbarma.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.