top of page

2022 ni Tring - kwnwi Hakotorni Halok hamlaima Tring


Tripura hasteni Bubagra ni sakni borok - Borok dopha eba Tripurani bwsa Tiprasa rok ni bisi kwtal nw Tring palaiwi tongw. Omo haikhe nw taklai bisio bw kwbang thangwi phaijak srisiti ni simi palaiwi phaima haikhe palai jakha Tripura hasteo Tring dalbidal thai nw. Phiya Tiprasa rok simi nw Tringnw palai laio. Omo haikhe taklai bisi kisa kwrak halok kwrwng laimani Tring hinwi chonglaio Luku rok, Taklai Tripura hasteo phai sokphaikha Bangladesh Hakotorni rwchapkwrwng hinwi sinimwng manjak Payal Tripura. Bw Tripurao phaiwi Tring bisi kwtalnw boni khorang kwtwi bai luku rokni khano khok phaikha. Omo haikhe nw Bangladesh ni kwbangma thai bw Tring nw bisi kwtal hinwi palaima nwk jagwi tongw. Tring December talni 22 tarik o palai jagwi tongw phiya kaisa kotorma ter khaiwi luku rok 21 tarik sarik simi nw bisi kwtal palaima nwk jagwi tongw taklai bisio kheno 1433 T.E phaiwi sokphaikha.



Tring nw tabok phanu kaham khe saimanya tongw - baksa tabok phanu kwbangma swngmwng swngsai tong khw. Phiya Tripura hasten bubagra rogni bosang tabokni Tripura haste ni Montri okra yakchu Jishnu Devvarman swrai swrai khaiwi khuna rokha Tring nw laibuma nw. Phadi Jishnu Devvarman ni khukbaithang samani kok nw khunai nailai wanu. Tripura ni rajdhani aghio Udaipura o tongmani swrapsa jorani bangwi aghio boni mwng Ranghamati tongmani phiya Raja Udai Manikya ni yakulo orani thaini mwng Udaipur ungwi thangkha (1566 -1572 AD) oh. Krishna Kishore Manikya ni jorao hinkhe 1830-1849 A.D.) kwtal Tripura swnam jak phikha Agartalao Rajdhani swnamwi.




Jajur fa 590 A.D engraji bisini simi kwtal Tripura swnam thanio yak tongw hinwi nw boni bongso ni mwng Tripur hinwi Tripura narwk kha.


Tripura ni mol no nw Tring hinwi sini jagwi tongw,Tei singhasong achok mani simi kheno lekhmwng nahar jagwi tongw. Tripura hani bwsa rogni mwngsa kokthai swijaknai kwrwini bangwi tei Bharat hakotorni bangla kokthai belaino sinimwng manwi thangma bai bono Tripura hakotor (Aghio Tripura kaisa Hakotor) haphangni kokthai haikhe yachak jagwi thang ha. Tripura mol eba Tring boni sinimwng kisa phanu komolna thangya khw, Tomani hokhe haphangni raida tei Laibuma srisiti ni siminw palai jagwi phaimani.


Bharat hakotor ni aghio sashan khainai Mughals British rongni thani phan yaphai ma raphro, Bharat hakotor Christian mol belaino samwng phwnang jagwi thang ha, Phiya aphro phanu Tripura hakotoro khe Tring nw no phalai jagwi tongw. Tripura Bharat hakotor bai gwdal mani yakulo 1972 bisi o hokhe nw kaisa bharat hakotorni haste hinwi sakhlai jakma yakulo kheno mwthak jagwi thangkha “Tring” ni mol. 590 AD nisimi 1971 AD bisi jora Tring palai jagwi phaikha aphro 1380 T. E o phaiwi sokphaikha. Omo nw Tring ni laibuma romwi tisa phunuk kha Bubagra rokni bosang Jishnu Devvarma.


Omo haikhe Jishnu Devvarma tabokni jorani sikla rok nw kha thangsama nwgwi laibuma o kiphil tong baikha hinwi khathangsa jak. Tei Tabokni molni Tripurao simi Tring palai jagwi tong liya Banglasesh hakotor o bw aswk nw Bubagra rokni hani bwsa Tiprasa eba borok bosang aswknw tongbai jao tei borogbw khatung khajani bisingw nw Tring palaimwng nwk jagwi tongw.


Bangladesh Singer Tripura Tring bisi kwtal phai manjak phaima mangphli, Mung Payel Tripura

Sininai nwk nai rok chonglaio tabokni kwtal molni kwbangma sikla tong khw Tring ni laibuma siswk ya rok. Teibw borokni omni laibuma nw sithai tei sokthai kwlai laio. Omo haibw tongw khw tabok phanu April ni talo nw bisi kwtal hinwi palai lainai bw tongbai jakhw. Ora nw sathai kwlaio Tripura ni laibuma Tiprasa rokni belainw kwthwk, Haini bangwi nw Laibuma saimanjak rok salaio Jishu Christa achaima sai swkangnw Kokborok achaijak hinwi.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.


Comments


bottom of page