top of page

Montang mankha beraikhri thaini borom

Updated: Jan 6, 2023

Tripura hasteo ungkha kaisa laibuma rwkjak Haste - Ora 184 jan Bubagra sung tonglangma kaisa hakotor phiya tabok Haste. O Hayungni Laibumao kaisa kotorma kothoma - Omo haikhenw tabok Tripura tabok o laibuma rwkjasawi nw kaisa beraikhri thaibw ungwi tongkha. Ora kwbangma beraikhri thai tongw Ujjaynta Palace, Unakoti, Neermahal tei Chhabimura hundi tei Jampuihill tei bw kwbangama. Phiya kaisa beraikhri thai swrapsani bisingw belainw mwng swnam kha-bw ungkha Montang. Montang hathai ungkha Teliamura amchaini Nitai Chandra Kami o. Amchaini jotoni sai kwchwk hathai tei Naithothok thai. Phiya tabok Montang bw kaisa beraikhri hinwi mwng swnam nakha.


Montang bahai khe beraikhri thai ungkha


Amchaini luku rok sakha Montang hathai puila luku rok Mon hathai hinwi sini jagwi tongw. Phiya aghi kebo siya kebo sogwi ya luku rok. Hachuk bisingwnw bolang chajak. Phiya kwtal molni jorao Kwtwal Sikla rokni phanbai nw mwngunang ungwi thangkha Montang hinwi. Mon hathai ni mungnw Montang hinwi social media hai rogo mwng awaimung ungwi thangma bai luku rok tei bw sini nangkha. Aghi phanu Montang hathai belaino kwchwk tei orani nakhlai kha hokhe belaino naithothok tei tongthothok. Aghio bwi hachwk kwchwk chwmwi sipsamani naiwa bangwi Jampui Hill thangwani nangw, Omo ungkha belai hachal tei thang laisoni jwngjalni bangwi nw Montang nw tabok Jampui hill hai swnam khibikha. Montang hathai tei bw mwng ungmani phunukmari hinkhe TTAADC haphangni EM Kamal Kalai bw amchaini Luku rogni chubamwng bai ora kaisa Gairing swnamkha tei Social Media o tei bw Viral ungwi thangma bai Montang nw bw bwi tei bw sinina chengkha. Boni Gairing nw mwng bw pharkha Montang Viewpoint hinwi. Montang thangwi bw Montang viewpoint Gairing hasoya hokhe kebosi kiphil ya. Phiya orani simi naikhe tei bw naitrhok tei ebi tongthothok haiphanu khoroksawi rangmari 10 ta khaiwi najagwi tongw.


Montang Beraikhri thai ungma yakulu Luku rogni toma hamkhrai phaiwi man


Amchaini luku rok Montang awaimwng luku rogni khunjuo sokmani yakulo belaino khatung laijak, tangwi hinkhe borog thinangni bangwi kaisa pohor hai thangna sep mankha. Ejit Jamatia sakha thangnai bisini simi taklai bisio belaino borok nwkjakha. Thinangw omo Development ungwi thangsinai hinwi wanswk jak amchaini luku rok bw. Ora bw sakbaithang bw sai marwk liya bahai khe aswk luku rok sai manwi thangkha hinwi. Phiya mangphli rok social media viral ungma baino tei bw luku rok saimankhana hinwi. Omo bai bekar tongnai rokni bangwi sep ungwi okhar kha, Ora tabok phanu kwbangma manwi phalwi tong phai nai bw tonga. Tei ajimwngw kaisa yak sosa jakma ungwi thangkha je baniyan khaiwani hamjaknai rokni bnagwi. Aghio orani mwi kwthwng simi si ora phaljakna bangwi thangmani, phiya tabok ora kamini luku rokni yaku bw phatarni rang hap phaina chengkha. Ejit Jamatia bw Teliamura hathi ganani ora manwi khuknwi phalphai mani, bw sakha Kami ni borok rok hinkhe tei phalna sokna kaisa sep kotorma mankha.


Nitai Chandra Kami belaino biyal kami ora mwngsa lama kaham bw kwrwi tei thanglaiso khaina lama tei twini kaham nungni sep tei kaham swrwngmwng. Belainw bising tei bolango ungma bangwi aghi karjagwi tongmani, School rogo thangna bw belaino hachal hing thangna nangw. Phiya tabok orani amchani luku rok tabok hachal naharmwng naharwi kaisa kaham wanswk mwngbai borok bw kaisa le imang nwkna chengkhe tabokle chini bw tabok pohor phaina chengsinai langmao.


Omo hai kaisa naithothok thai rokno thinango Tripura haphang tei TTAADC Hphangni bwkhaktwi kaisa samwng nahar jakhe belaino chasamung phaiwi manu luku rokni bangwi.


"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"



Comments


bottom of page