top of page

Maharaja Govinda Manikya jorani kwbwi kothoma

Tabok ni salo Udaipur ni Nayungma Tripura haste ni Rajnagar amchaio kwlaio. O Udaipur aghio Rangamati hwnwi bo sinijagw. Nayungma ni gana salthang babai digi purbo duwar khe Maa kali ni Bhuvaneshari mwtai nok tongo. O mwtai nok Maharaja Govinda Manikya bai naikol jak mani bisingwi 1660-1675 A.D phru swnam jak kha Udaipur Nayungma ni ganao. O mwtai nok wngkha kha twima Gomati sakani haplogw. Mwtai nok Tripura ni capital Agartala bai 55 km chal lai go. Sui kwrwng Novel awarded Rabindra Nath Tagore 1900 bisi bi siming 1927 bisi ni bising go 7 bar Tripura haste go Phailang kha, O jorao bo Tripura haste Bhuvaneswari mwtai nok ni laibuma no haste ni luku rokni khuk o khwna kha tei belai kheno wana jakgwi naituk gwi swngkhrup gwi bijap tei natok suijak kha , Bijap ni mwng wngkha Rajarshi bai Bisharjan. Phiya o Bijab ni kisa misa karjak kha, o karjak kothoma tong rwk mano chini lukuni okra chakra rok sukhrup gwi sagwi kwlang kha. Phaidi o kokbwkhal ni bising twi Novel awarded Rabindranath Tagore ni suijak (Rajarshi tei Bisharjan) bai lukuni okra rok samanino sabul gwi Maharaja Govinda Manikya ni laibuma Bhuvaneswari mwtai no twigwi kaham khe sai manlai nai. Tripura haste ni rajtontra wngkha belai kheno kwcham tei o raj tontra no hayung ni second paithak rajtontra. Ha haphang Maharaja Govinda Manikya wng kha belai khe khagwnang maya gwnang Maharaja. Bo wng kha khoroksa hindu raja aboni bangwi salthang Phaiching purbo duwar khe bo kaisa Bhuvaneswari mwtai nok tang rikha. O mwtai nogo rangchak ni maa kali swnam jak no achok rijak kha tei o maa kali ni murti no mwtai kwthang hwnwi bo sini jak o.


Agini sal o chwng jotto saimano haa Phulok na bangwi haa seklai gwi Chuba wngo kaisa haste ni Raja bai tei kaisa haste ni Raja, aro kwbangma nasre laimani tei jole laimani phai o. Chuba wnglai kha hinkhe kwbangma naisre laimung rok no raja rokchupwi swnamwi romwi rok ma narwk o haste ha nonarwkna wani bangwi. Bijab go suijak bisi go ek hazar jona tann jak o phiya abo khakawi namani si, lukuni borom gwnang khoroksa okra tei Padmashri Beni Chandra Jamatia ni sajwk Purnini Jamatia bo sakha okra rok bai kothoma sai kwlang jak mano mwito khaiwi sai khwna rokha. sakha O Bhuvaneswari nogo Chuba bondi sotru tei mwisli rok no simi se tann jako. Tamoni homale aswk kwbangma Chuba bondi sotru rokno charowi kharowi tongani sal kwdwk jora ni bangwi aswk kwlai ya charowi kharogwi tongani. Haini bangwi Maharaja Govinda Manikya ni jorao Chuba bondi sotru rokno ma kali le Ha ni amai ba o bondi rokni atma no ma no yachak jalang thwng hwnwi se o Bhuvaneswari o borok tann jako. Phiya o Bhuvaneswari ni pandit eba ochai Ragunath ni bodol rok o borok tan mani tongmwng no bophru ni siming salbwrwng no borok mase matan nai raida khlaigwi paikha Maharaja Govinda Manikya sagwi se manrwk liya. Olo hinkhe omohai jora sok fai kha juttdo bondi ni badei bo borok manya hinkhe rutuk gwi tann nani raida ma kali borok sago hwnwi. Koktwma go tongo Maharaja Govinda Manikya emang go ma kali bai sajak kha, ang thwi nang ya joba barsa mankhe si soi go hwnwi. Aborokno wansok gwi Maharaja Govinda Manikya bororok tann mani raida no mwthak na bangwi chaitok kha. Borok tan mani raida no mwthak gani thang thani go Maharaja bai pandit Ragunath sotru wngwi thang lai kha. Tamoni hinmale pandit wansok go ma kali borok ni thwi nang jak go tei sano hinwi , Raj dorbar bising go teibo kokbanglai mani tong na Phiya abotei sajak liya. Haini bangwi Ragunath Maharaja Govinda Manikya no haya khai gwi bwthar gani bangwi kwbang ma chokrato khai laha.

Pwila chokranto wngkha bwta buphayong Maharaja Govinda Manikya bai Nakhatra Rai ni bising go kok kwkhwi sagwi buphayong no nasre rokha bwta ni phaiching. Buphayong nakhatra rai hinkhe borok suja haini bangwi Ragunath Nakhatra rai no sakha nwng bo khoroksa raja ni bwsa bile nwngle twmani raja chamaya khanai , Nini dada mang thung pairoi jaga nwng le mwngsa jaga chukya omo hai tei kwbangma kok sagwi bwta no nasre rokha Ragunath. Aphro ni siming Nakhatra Rai bwta no bwthar gwi raja chana bangwi sujuk rutuk wi tong kha. Maharaja Govinda Manikya wngkha belai kheno bokhorok gwnang tei khakaham raja. Bo omohai khe buphayong pandit Ragunath bai thwng jak gwi tong mano saimangwi thang kha. Hinkhe ba din salsa maharaja Govinda Manikya buphayong Nakhatra Rai no sakha phaidi Nakhatra bolong go sikar khai lai nai. Aphru buphayong hinkhe belai kheno khatung jak gwi tong kha bolong go thangwi bwta no bwthar gwi raja chagani sujuk manai laha hwnwi. Bwta buphayong no lama hingte hingte kwbangma kok sagwi bujok gwi twlang kha, Maharaja sakha rajmukut bwswk hwlwi nwng twde si? omono twigwi tong gani aswk kwlai ya o, rajmukut ni bising go kwbangma poja(barja) tong go, Proja ni sukh dukho kosto manaikol nai, sotro ni akraman no rokha makhai nai. Kwbangma kok sate sate bolong kuthuk kakakbon digi sokwi phru hinkhe maharaja sakha buphayong no nwng o poja no ruju mankhe nwng raja wngsidi, ang sigw nwng raja chagani muchuk jak go hi, nwng ano rajdorbar go bwthar gwi raja chakha hinkhe bwi nono seleng nai, hamjak ya wng nai khanai bwta no bwthar gw raja chago hwnwi, haini bangwi ang nono bolong kuthuk go tobo gwi failaha, oro nwng ano bwthar khibigwi kwlang phano bwi kesa siya wng nai tei nono bo bwi seleng ya khanai. Kwbangma kok khwna mani yagulo bufayong nakhatra rai sakni chaya bwi bai thwng jak mano manju gwi bwta maharaja Govinda Manikya ko nakar sankha tei haino hai bwta buphayong kaham khe tong lai phikha. Haikhe no pwila pandit Ragunath Maharaja Govinda Manikya no bwthar gani ni chokranta chaliya wngwi paikha. Aboni yagulo haino hai Ragunath tei waisa chokranto khai Phikha mwtai nogo tong nai khoroksa boni sitso Joysingh no sakha maa kali Maharaja ni thwi sago hwnwi, Joysingh nwng Maharaja no mabwthar nai. O kok khwna mani yagulo Joysigh belai kheno dukho nang jak kha aswk maya gwnang borok kaham Maharaja no bahai khe bwthar nai. Joysingh maa kali ni yakung tola thang gwi ama kali no swngsa gwi kapkha tei sakha ama nwng aswk thwi nang jak kha hinkhe ani thwi le thwiya de twma, ama nwng ani thwi bai no soi janai hwnwi sak sak no suri khaklap go yogwi thwigwi paikha. O Joysingh ni mang khwthwi no nukgwi bono hamjak nai bwrwi Aparna bo Joysingh ni suri yomani no nw sokhwlai gwi sak sakno yokgwi thwi gwi paikha.

O khoroknwi joysingh bai Aparna wngkha pandit Ragunath ni belai kheno gana ni borok jaiti gusti, brokno bo belai kheno hamjak go. Aphoro hinkhe Ragunath buchikha sakni borok no kwma jak khe bwswk dukho nang. O khoronwi nwi mang kwthwi no nuk gwi Ragunath kwbak gwi chirik gwi kapkha tei saimankha tamoni bangwi Joysingh sak sakno bwthar kha. Aphoro ni siming hinkhe Ragunath buchigwi namakha bo je khaigwi tong mani kaisa hingsa ni lama si, borok boli romano torjakya gwi boni hingsa no boli rogani no bo tor jak kuk kha, haike no bo Bhuvaneswari mwtai no bisarjan rogwi phunuk kha loge loge sak sak ni hingsa no bo bisarjan rogwi paikha.


Maharaja Govinda Manikya ni chaitok mwng bai kwbangma jwngjal phaimani bising twi phano o boli ni rada paisok gwi thang kha. Haikhe no Maharaja sakni haste ni bangwi kaham yapri segwi proja rokbai hamjak gwi motom jak gwi raja chalang kha.

(Kha khlaigo o kokbwkhal ni bising twi kwbangma swrwng mwng mankhwna hwnwi , karjak gwi rok tong kha hinkhe nakarjabai di tamoni hinmale aswk koloma laibuma karjak gwi fano mano tei chaya samani rok tong khe bo nakar jabai di )





Comments


bottom of page