top of page

Sena ni horo Debbarma rok bahai Garia Mwtai palai

Updated: Dec 18, 2022

Hayung ni kwbangma ha kotor ni bising Bharat ha kotor kaisa kubuni ha kotor ni swlai sak ni hukumu-mukumu tai sak ni tong raida kubuni haa kotor bai belai juda hinwi chwng saimano. Bharat haa kotor o jotoi 138 crores borok tongo, aboni bising joto jat borok ni juda juda hukumu-mukumu bai gwdaljak. Haino hai North-Eastern region ni chikon sa haste Tripura. Tripura haste ni Tiprasa rog ni bo haino kubuni dopha ni swlai hukumu-mukumu ty tongthar(religion) juda hinwi chwng saimano. Tiprasa dopha Hayung gwnangwi sak sak ni hukumu-mukumu, chamung-nungmung, ri-chum buini swlai juda hinwi joto haa kotor bai noh sinijagwi tongo.



Tiprasa dopha ni bising o bo mwtai-atai rilaimung chamung nungmung, ri-chum aswk pherlaiya hinwi chwng saimano. Bisi kwtal ni simi romui teisa bisi kwtal phayasak chini Tiprasa dopha o kwbangma tongthar raida palai laio. Hangrai jora ni simi romui Hojagiri ni jora payasak joto tomung raida chini Tiprasa rog ni langmao kwbangma hukumu-mukumu bai gwdaljak.Tiprasa dopha o kwbangma ter eba mwtai-atai ni bising Garia bo kaisa chini dopha ni mwtai kotor. Puila boisakh ni simi romui saal sini jora twiwi palailai jao o ter noh. Phiyaba Debbarma bosong o palailaimani teisa juda hinwi chwng saimano. 'Buisu' ni salo aswk tongthothok chathothok khai palailaimani nukya phano 'Sena' ni salo kotor eba kwthar khwlaiwi mwtai-atai rimani nukjago. 'Sena' ni salsa swkang joto noh mwtai-atai rilaina bagwi je nangmani manui-khunui kwthar khwlai pailaio, sirisiti ni simi 'Sena' ni salo joto takhuk bukhuk nok kaisa ni borok rog miliwoi awan chuwan chalai nani bagwi baksa ba awan sukthani samung pailaiya baksa ba rondok gola sulai thani samung pailaiya. Joto noh nok ni samung o kwrwng laijak.


Phiyaba Debbarma rog 'Sena' palaimani joto nok nukhung o noh juda juda hinwi nugui mankha tamoni hinmale Bimal Debbarma mungui khoroksa takhuk bo bini cherai phangsini ni simi nugui phaimani bini nana thagu ni jora ni simi noh borok ni nok nukhung o rondok gola noh kwthar khai pujilai mani. Sena ni salo eba phung o rondok gola noh ty mwtai ni bagwi je manui nangmani abo kwthar khwlaiwi suwoi satung phwran laio. Abo ni pore mwtai rina swkang randok gola o nukhung ni mairum kwthar dalaio. Abo pykhe rondok golao sindur kwthar bai khe maya kaya akok laio. Randok o mwtai rina bagwi Rondok ni bagwi Tokjwk mangnui tei noksu mwtai ni bagwi togwla masa nango, phiya ba o togwla bosolok eba kochikya sani togwla wngna nangnai. Tei logi mwtaio nangkuk mani manui khunui rog. Tokjwk mangnui tei togwla masa noh rathar mwtai rilai mani yagulo aa tokjwk bai togwlak noh teisa siniwoi kwthar khai ma songo. Abono mun khe teisa awan chuwan ni logi teisa mwtai rilaio. Mwtai ribai mani yagulo nok nukhung ni borok rog miliwoi joto pal baksa khe achuklai awan chuwan bagui chalaio.


Sarik sanja jorao teisa para ni cherai-khonai rog pal baksa mililaiwi Garia bir laio. Kami ni joto ni nok nukhung o thangwi nokhwla o Garia mwsailai o. Mwsa bai mani yagulo nukhung ni borok rog je yak chuk manmani tui baksa awan baksa mairum baksa thok, piyaz je manmani abo rohor lai jao. Abono twlangwi teisa kaisa nogo je Garia mwsanairog pal baksa khe songwi chalaio.


Phiyaba takhuk tebo sai khwna rikha chwng randok gola noh pujilai phano sarik jorao Garia mwsanai rog tabuk ni dino komor tongkha hinwi, tangwi hinmani le joto kami achai rog yakarui phatar haste o baksa sebok khaina thango eba baksa porina thama bagwi o tongthothok sanja jora ni mwsamung nukliya hinwi. Hai khe noh takhuk Bimal Debbarma kok kwchar kha chini sirisiti ni tong raida hukumu-mukumu rog noh chwng khati narakya khai twrwk twrwk chini langma ni kwmai thamai nai.



Comments


bottom of page