Sukuram Debbarma ni nok Balaram kami, Tripura. Abo kwlaio Jampuijala R.D Block ni bisingo khobjak. Nukhungo jotowi borok tongo khoroktham. Sukuram ni tangsamung wngkha samung khwlaiwi chanai. Bihik nukhung ni samung khwlainai. Tei Sukuram ni buma wngkha Bishu laxmi Debbarma. Bini ama rwngnokni barja manjak mai-mui songnai. School ni mung Ujan Ghania Mara.
Bisi 2003 ni kok ano eba chwngno yakarwi kwlangmani ani pha Samendra Debbarma. Bo thwiphuru ani omor tongmani bisi chichuku(19 age). Pha thwimani ulo chini nukhungo belaino biyal kotor achaikha. Angbo class VII jorasi poriwi manjasio. Sukuram Debbarma sakha ani amabo ah jora buini nok nok thangwi samung khwlainani nangkha tei tangwi hinkhe samung khwlaiya hinkhe nukhungo chana hinmani mungsa kwrwi wngwi thango. tei khaksa bwkhak ang sakbaithangbo swrwngmung yakarwi samung humungrog khwlainani nangkha. Phiya pha thwimani yagulo chwng amabai khoroknwi jeswk mansak chaitoklaiwi chini thai tongmao Rubber buphang kaikha phang sa sai buphang. twrwk twrwk nukhung kebelni bisingtwiphano naikini khwlaiwi buphangno tor rwkha. Khao belai muchungjak tongmani rwng kwrwngkuk wngnani. Haiphano kwpalo je swimani abono manthai. Rwng kwrwngkuk wngkhe hoda dopha jotono bwskango tubuthani samungo chuklaikhamu.Tabuk kisa misa nukhung rakdrop wngkha. Chini Balaram Kami tongkosong lukurogni kwbangkuk khwlaiwi Rubber buphangno kwbang. Aboni bisingtwino tabuk nukhung ni thongor akorog ragwi tonglaijao. Abono karwibo Rubber khwlaimani bisingtwi chikon mikon baniyabo khwlaiwi tongo.Phiya kok wngkha taklai belai satung tungmani tei nobar watwi phaiwi ani rubber bari belai deramungo kwlaikha.
Kubun Article: Yakhrai Kami si Yakhrai Kaham kwrwi - Borog bwswk jungjalo
Jotowi ani phang saraniswlai kwbang rubber buphangno baiwi thangkha. Aboni bagwi ani bwkha belai tekto nangkha. Tangwi hinkhe o jora naisigwi naikhe ani nukhungo rubber buphangbai simi nukhung choliwi tongjao. Tei thaisa kok wngkha chini Tiprasa kami amchairogo eba 6th schedule area tongnai tongkosong lukurogno Rubber buphang eba Rubber bari deramungo kwlaikhe eba hor khamkhe hor bwtharnai bedek tongphano abo belai hakchal. Lama kolok phaite phaiteno rubber khamjak hinkhe joto khamwi thapla chawi thango. aboni bagwi chini Balaram kami hindi eba Tiprasa kami amchairogo hindi joto thaiono hor bwtharnai bedek achukrwna kwlaio.
Abono karwibo teibo nangkukjak wngkha tomung nobar watwibai rubber buphang deramungo kwlaikhe haphangni bwkhaktwi mungsaswk sep khwlaiwi rwkheba belai hamkuknai. Phiya ani langmao jeswk tongsak angle kwbangkuk khwlaiwi ajimanile Rubber buphangbaino ang ajikugo. Aboni ani langmani tei nukhungni chati.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.