top of page

Tripura 1433 Tring bisi kwtal no twiwi rwchapmung tikhwlaikha

SONG TITLE :


Bisi khonchorwi kiphilkha,

bisi kwtalbo sogphaikha(2)

Talhing Talo maising horo

Tongthokmani kulpailiya chwng

Tring Tring Tring palaio Tring


Rwchapmungni Title “TRING”. 1433 tring bisi kwtalno twiwi “DUGWNANG” Youtube Channel o tikhwlaikha kwtal wansukmano twiwi kwtal yapri. o rwchapmung thangnai bisiono tikhwlainani kok tongmani. Phiya jora gothokyani bagwi ah bisio tikhwlaiwi manliya. Tripura o bisi brum brumno rwchapmung tikhwlaijago dalbidal youtube channel o tei bisi kwdwkma romwino Tripura o bisi kwtal palailaio lukurog. Khursathai kwlaio taklaini bisi kwtalno rwksawi jotoni swlai dakti tikhwlainai rwchapmung wngkha “DUGWNANG” Youtube channel o. aro twidulthani tongo rwchapkwrwng tei swikwrwng Arun Debbarma, Bipasha Reang, Amar Debbarma, Gobin Debbarma. O youtube channel phiyokjakha 5th December 2022. Tei khaksa bwkhak o channel ni bisingtwi puila Music Video album tikhwlaijakmanibo “TRING”. O rwchapmungno Music Director & Mastering Suzit Debbarma, Mixing Sankar Kalita, Vocals Record Suz’s Studio. Aro rwchapnairogni bisingo tongo Arun Debbarma, Nilima Debbarma, Amar Debbarma, Bipasha Reang tei Gobin Debbarma. Producer wngkha Arun Debbarma, Amar Debbarma, Bipasha Reang tei Gobin Debbarma.



“DUGWNANG”

Tring bisi kwtal ni o rwchapmungno kha khwlaio ani rangchakni palsong bwkhabai hamjaganw hwnwi. O rwchapmungno puila chwng rwchapkwrwng Gobin Debbarma bai Duet rwchapmung khwlaina hwnwi wansukjak tongmanisi. Ah jora Northeast ni Shillong o tongmani khoroksa saknainai wngwi. Jora kesep ni bisingtwiphano yapri gwdalwi chaitogwi naikha o rwchapmungno pairwnani bagwi. Phiya jora gothokliya. Haiphano ulo chwng wansuklaikha o rwchapmungno Group song khwlaikheno chakuknai hwnwi. Paithago Group song khwlaiwino tikhwlaikha. Tei khaksa bwkhak tabukni simi “DUGWNANG” Youtube channel o kwbangma Video norogno kaham kaham nugwi manai. Aboni bagwi kha logwi naisigwi tonglaidi palsong. Tei abono karwibo chwng chini group no twiwi bwskangni salo Tripura kokborok Industry no teibo kuchuk eba hayung ha kotoro phunuknani bagwino krak yapri selaijak hwnwi sakha Tripura Playback Singer Dr. Bipasha Reang.



“TRING” rwchapmung video khwlaimani joto thumasakhe sana thangkhe bugrakhor Agartala no joto khwlaibaikha. Haiphano sathaio kwlaio bugrakhorni IGM sakhamnokni kwtal Building o shooting khwlaikha tei Nuyungma(Ujayanta Place) joto video khwlaiwi paikha. Khao chongjak tongmani chwng o video Tripura ni chini Tiprasa mwsanairogno logio kwbangkhe twiwi khwlaina hwnwi phiya jora gothokliya bagwi chwng borogni mwsamungno norogno phunugwi manliya. Haiphano khao khwlaio chini “ TRING” rwchapmungni video no norog hamjaganw hwnwi. Tei paiphwlaiya hambai Tripura hasteni kwcham rwchapnai eba swikwrwng Arun Debbarmano aswk kaham rwchapmungno ano sep rwma bagwi tei lukurogbai kwrwngwi manmani bagwi. Hayung ni jotoni lukurogno 1433 Tipra Era Tring bisi kwtalni hambai hwnwi sakha Tripura Playback Singer Gobin Debbarma.


Puila ang khoroksa Tiprasa rwchapnai. Hano hamjgwi, dophano hamjagwi rwchapmung swiwi dophano lukurogno khwnarwo tei dophano tongkosong lukurogno rwchapmungni bisingtwi sicharwnani bagwi yapri naharwi samung tongwi tongo bisi kwdwkma romwi. Aboni bagwino teibo kwtal achaisongbo rwchapmungni hapharo gwdalnani nango. Kok hinkhe haisi taklai bisibai 1433 Tipra Era Tring bisi kwtal chwng Tiprasarog palailaiwi tongo. Tei paiphwlaiya hambai Tripra ni TTAADC haphangno. Tangwi hinkhe aswk bisi kwdwkma romwi rwchapnairog tei hukumu mukumuo gwdaljakrog chaitokmani yagolo o Tring no twiwi salsa lelamung sal hwnwi chongjakha. O rwchapmung swimani bisik ba wngjak tongmani. Jora no naisigwino rwchapmung swnamna nango aboni bagwi kwcharo kisa paisuknanibo lerjak tongmani. Phiya jeswk mansak kha kuwar khwlaiwi tabuk ni Tripura hukumu no naisigwino o rwchapmung swimani. Abono karwibo jotono paiphwlaiya hambai bwskangni salo o Tring bisino haste haphangni bwkhaktwibo gosimung mana wngthun hwnwi sakha Tripura ni Playback Singer Arun Debbarma.

Tripura kwbangma rwchapmung tikhwlaijagwi tongo salbrum brumno. Haiphano bisi kwtalno twiwi rwchapmung tikhwlaima kisa judakheno nukjago kokborok industry o . bwskangni salo Tring bisi kwtal eba o kwthar salni hayaungni lukurogno saimana wngthun tei Tripura haphangni wngwibo Holiday eba Lelamungni sal mana wngthun hwnwi sakha rwchapkwrwng tei swikwrwng Amar Debbarma.



"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"






Comments


bottom of page