top of page

Twisa ni twi bai samung Kotor chukmani tamkhe naidi

Hapung hathaini kwnwi kwcharo Twisa chikonsa twimuk yormani bagwi twisa ni lama kolokma naithokhe twi yorwi bakhwlai thangma bai kheto khwlai mai borwi chana bagwi moikwthwng khwlai chana bagwi twi tukuna twi nangma bagwi Paliabanga Twisa ni Kotor chukmani samungrog tabokni molbrummo tei mungsa yapri phasing semani bo nukjakha, aborogno karwi Twisha ban thewi twi narwkgwi kheto lama khwlai twi biyal khayake rohorwi mai borma jora rohothani aboni sumungbo kwdwkma jora bai gwdalwi tabok phano khwlaijakgwino tongkho abono karwi kwtal yapri khe samungo Kotor o chukjakgwi tongma nukjakgo aborognobo chwng saimanna chaitoknai khamani kokthairogni bisingtwi chini chakra okrarogni samabaikhe.


Twisa

Paliabanga Twisa mung tamkhe achaikha tei o Twisha ni Kotor samung bophro nangkuk?


Mung Narendra Debbarma (70+)"chini kamini mung asol hinkhe Birbal Choudhary Kami hinui hwnjakgo, phiya sinijakmani mung hinkhe Paliabanga hinui kwbang borokrog salaio tei o Paliabanga hinkhe Twisa ni mungsi kwlaio. O Twisa ni bokhrok bwswk kuchuk hachal abo chwng sasokmaya tobokhe omo Modi Kami molsom bari bokhrok abohai hinui sasok mano. Tabok o Twisa bo bisio yorna chengkha chwng amorogbo sasokmaya phiya Paliabanga Twisa hinui pharma hinkhe chini kami kaitham bodolrog pharwi rwlaikha hinui khwnao abo kaitham kamitwi tei kheto kinar Bolong mura kwchartwi twi kochokma lama khopjakgo haini bagwi Paliabanga kaitham kami khopjakgo,kaisa wngkha palia banga abo hinkhe asol kami hinjakgo Gulsadhu Kami, tei kaisa hinkhe yethek kolok hinjakgo aboni asol mungno ani kami Birbal choudhary Kami, tei kaisa bo tongkho abo hinkhe Paliabanga bokhrok Kami Kotor hinui sinijakgo.Tei oro saimano O Paliabanga Twisa ni mungwi school khungsa bo tongo Paliabanga SB School hinui tei o school ni mat kinartwi o Twisa kochokjak tei bini lamatwi twi kochokgwi thangjak.


Orowo Twisa ni mungsi Paliabanga tei o Paliabanga Twisa kaitham kami bai gwdaljak aah kamini mung asol tongphano chini borokrogni khukgo chwng Paliabanga hinui kami salaio tei joto borokrog asol kamini mung mayaphano wngwimano tei o Paliabanga Twisha ni laibumano bo saimaya wngwimmano haini bagwi jotono saimanna nango o laibumarogno.


O Twisa bai samung Kotor chukmani rog, Ingraji ni June tei July tei Bangla hinkhe aaasar tei shraban khobjakgo aphuru chwng o teino ban thewi narwklaio kheto khwlai phuru twi manna bagwi.Tei chini para hinkhe o Twishani kwcharo kwlaio chini sakani hinkhe Paliabanga bokhrok eba Paliabanga Kotor hinlai tei chini tola hinkhe Gulsadhu para,nydi tabok chini tola song ban theka hinkhe chini yango chwng twi Maya wngu kheto twi manna bagwi phiyaba chwng kwchar Paliabanga song ban theka hinkhe tola ni borok manwio tangwi hinkhe twi kisa kisa choromani abobaino ban theka hinkhe twi thumsa khe pukhiri haikhe tongrwkpayo tei abohaikhe nu chwng bisibrum twi narwklaiwi kheto mai borlaio tei moikwthwng rog khailai chalaijao.


Tei khaksa phasing o Twisani hashing bwswk jora nahajak tong tei buphuru ni siming chengjakha?


O Paliabanga Twisa ni paithak manjoima thai wngkha kosom para thaio abo Tufania kami paithakgo bini lama tongo tei aronino chini borokrog o Twisa chikonsani motor machine baikhe Hashingsa tisalai phalma nukjak tongo. Samung Kotor nu tei samung kwbang o nu chukgwi tongo tei swkang kaisa thaio kisisa khe tisama nukha phiya tabok twrwk twrwk obohai khe nukha kainwi kaitham tei teibo kwbangkhe tisajak kha Hasingsa phiya ani mokolo hinkhe ang nukgo Hasingsa khurwi najakmangno tongmani Twisha kwlwkgwi thuk kwlai thango tei kwbang belaino belai najakgwi tongkhe abo olo tamo wngnai saimaya.Tei Twisani twi kochokgwi nu Hasingsa rukung bo mano tei o chikonsa twisabai samung kotor nu chukmani nukjakgo.


Chini nangmani thangwi tongna bagwi Twisa chikonsa bai Kotor chukmani samung tei teiboni swlai teibo kotor nangmangnu tongwi tongo o Paliabanga Twisa ni Hasingsa khor swnamwi najakmanibo haino. Abono sanai chini nangma chini muchungmani paiphwlaiya khe nu tongnai tei chini thangwi thanani lama bo o Twisa ni jarwi tei chini kaham nokthai tongwi thanani bo o Twisani Hasingsa ni jarwi Kotor chukmani samungrog tabokni molbrummo manwi tongo tei amoswkno kok kwcharjaknai Lukurogni bagwi o hayung Naithok nokbar twibar baikhe Bolong mwchangjak o Twisha chikonsa thwiyasakni umor manwi tongjak o borokrogni umorni swlaibo kwmai ta thana wngthwng chini o Naithok hayung Twima twi Twisa rog.


O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.


Comments


bottom of page