Kwbang ma swina kwrng tei pore kwrng rog sao aige ni borok rog kheto haba khaiwani swrng ya kho swkang kaisa haphar o khe nogthai khaioi tong ya. Kheto haba khai wani rwng mani ulo si kaisa haphar o khe tong lai wani cheng jak o. Omo hai khe kaisa hapharo baksa khe tong lai manino kami hinwi bwmug rijak kha. Tota Kami haiyakhe Tuta Mura hinwi sinijaakmani para bw haikhe nw bwmwng maankha. O kami ni achaimani koktwma no silainai.
Tabok ni jorawo Tota Kami ni amchai o mamblai sai okra wngkha borom gwnang Niran Chandra Jamatia (achai ma sal 1926). Bini khuktwi no o koktwma no chwng silainai. Bo sakha bahai khe mwkthang o Tota Kami achai kha.
Puila swkang o Jamatia kami ni haphar o huk khainani hinoi sok phai nai rok ni bwmung ongkha Kripa Sindhu Jamatia, Bancha Mani Jamatia tei bini bodolrok. Borokni bosong ni bedek bupra rog nw tabok kwbang ma khe erwi luku koto kha bai kha. Borom gwnang Niran Chandra Jamatia swkang kaiba generation ung kha. Bini yagulo Tota Kami amchai ni borok rog samung tangoi cha lai baiwo. Samung o dol jag o kheto khai mani, huk khai mani, muswk, pun, tog, wak rog ri mani rog. Afro luku o 11-khan nukhung si tong mani. Kaisa nukhug ni borok kaisa nogonw tong lai o tei chalai o. Joto nukhung nw kha thansa khe baksa khe tong lai o. Niran Chandra sakha, “Bini yagulo samung chuba chu khai wani bangwi yagu swlai lai o. Kami o joto nukhung ni nog nw haa ni kutha bai tangjakgo (mud house) tei nog ni nukung khe ba son (straw) bai ri jak o.” Tabok ni saalo kwbaangma nok pakka bw wngphaikha.
Naai-chuchu sorok bai sajakmani koktwma tongw Tota Kami-o aige kwbangma mwsa tongmani. Aige parani muswk tei pun roh mwsa bai baaljagwi thango. Tabuk khe tei kwrwikha.
Tota Kami o kwbang ma mwtai nw palai mani bising o Baba Garia nw kotor khe palai jak o. Mwtai bal nai bosong rog nw khe ba kherphang ni bosong hi sajak o. Kami ni luku o aigeni simi nw okra chakra ni bising o kami nw naikolaii kaham hamya sanai nw chong jak o. Bono nw chokdri hinwi bwmung rijak o. Chokdiri chong mani yagulo chokdri nw chubachu khai wani bangoi khandol hi kharok nw chong jak o. Kami o porei sui nai kisa phanw buma bufa rog cherai nw phwrng wani sakthar mani kwbang hai ni bangoi chwng nugo kami o borom gwnang Lt Nagendra Jamatia( minister, writer, activist tei kwbang ma parichoy ) hai bokok achai kha o haphar o.
O mol pher oi thang kha tabok hapha nw ma wansog tong go o bwskang o chwng joto kha baksa khe sakthar lai phi nai o kami nw sini ro phi nai.
O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai.