Chini borok bosongni chamung nungmungbo boini sai juda nukjakgo tei sak saichungno achai phaimani moikwthwng akorogno chwng kwbang chana hamjakgo. Chini borokni sak kaham wngui thangna bagui chini chamung nungmungbo kwbang naikoljakgo.Tei nukhungo jwngjal tei pailaya eba samung kwbangmao tei jora kisao chwng khel khwlaijakyarog wngui thango,abo chini chathani chabrum chhwng chini kothok tei thokya basiwi chamarogno bo kahamkhe nairwk maya wngma bagui tamo chamung chawi ba bohok dukha eba gas wngkha hinui saimarwkya,ah jorao chwng bithi kaisa bwlai jatiyo abono chakhe bohok dumarog logi logi nw hamwi thangma saimankha abo wngkha "Moching buphang bwlai" eba " Moching bwlai " hinwi hinlayo.phaidi chwng tini khamao saimanlainaio bithi bwlai no sukrupbwi saimana thanglainai.
Khoroksa Gunamani Debbarma bo hug tei kheto khwlai chajao tei bini hukbar tei kheto khwlaijakma thaio tongo bini khatiwi narwkjak buphang phangsa abo wngkha, Bithi nangmani buphang tei bini bwlai abono nangkukmani bithi hinui sinijakgo.
Bini o khatiwi narwkjak bithi buphang phangsa tei aboni bwlai boro boro samunggo phwnangjak aborogno Gunamani Debbarma sawi khwnarwkha-
"Ani huk tei kheto khwlai chama thaio swkang jorani Simi o bithi buphang nangmani achaijak tongo tei o buphang no Ang naikolwi taboksak jora romwi tonjakgo, tamoni hinui sakhe abo agi phuru nana dai songbo oro jaga huk khwlaiphai phuru oro o bithi buphang no nokgui siniwi chawi nai saimankha obo sakni hamya no kaham khwlai rwma nukjakma bagui saimankha obo bithi nangmani o Moching buphang bwlai hinui tei jotono obono Moching bwlai hinui sinio."
"Teibo chwng o bwlai no moirogo rwi Chao eba moi songui chama rogo o belaino rwi chao,tei Mai kumun kotong saka rogo rwi chao,hinkhe moi turu moi chakhwi abohaikhe kwbang chao.Sana thangkhe chini borokrog wngkha bolongni moikwthwng akorogno naitokgui chaiphaimani obohaikhe no o Moching bwlai no bo moi songphuru rogo rwwi chawi no saimankha tei chaipai bini kaham no saimanwi omo bohok dumarog tei bohok samarogno logi logi eba chawi pai swrapsa ni bisingonu komorwi mansokgo hinui samankha."
Bwswk joratwi lukurogle saimankha o bithi bwlaini tei bini sinimungrogno?
Gunamani Debbarma,"ang ani saimanma o hinkhe ani nana dai songbo jora aphuru joto sinibaina hinui mano nukhakaino,phiya chini tabokni molbrumni chalai ni bisingo baksa saimayarog tongo eba borogni phasingo manthokya hinkhe borog saimanya tei sawi kwlangnaibo krwi hinkhe saimamgwlak."
Moching bwlaile bwswk jora bomohaikhe Bithi wngui samung khwlaiman tei bini thokmani bomhai kwlai?
Bo saphiro,"bwlai laisa chawi naimani obo logi logino sung khwlaima nukjakha,salsa ani o kheto khwlai lelama thaio ani dolrog bathak phaio borokno ang phunukha obo bohok samani tei bohok dumano hamrwo hinui, aphuru borok bwlai laisa kholwi chawi naikha tei aboni swrapsa hinkhe khupui rohokha hinkhe borog bohok dujakgui tongmani kisa aram mankha,aboni bagui borog bo ano sakha omo buphangno ta komorrwdi hinui tamoni hinkhe manthokya ni bagui. Tabok bwlai laisa no ahaino chawibo Mano tei moi rogo bo rwi chaimano.Bini bwlaino eba Moching bwlai no moirogo rw phuru Baha'i manmani lebu bahai hai wngo.Tei kwthwng chawi naibo kisa lebu bwlai hai kwkhwi tei kisa rimi thoro thoro abohai, phiya kwkha wngya abagui phatwi bwlai chama haikhe chawimano.
Khoroksa Gunamani Debbarma bo huk tei kheto khwlai lelama thaio Moching bwlai hinui bithi nangmani tongo.Bini lelama thaini bisingtwi bo lukurogni bwskango sawi tei sinirwi rwkha o buphang phangsa ni kaham nangmarogno.Sak saichung achai phainai buphang bithi bwlairogni mari tongrwkna bagui chini chakra jora rogni kokthai kaham pharwng mung bai kwrwngwi tongjak lukurogni sinimungrogno chwngbo saimarwkthai.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"