Protein kwbang gwnang Dragon Fruit hukbar khwlaiwi bwskangni salo kwchwng pohor naharwi nuhurjak Tripura haste ni Teliamura Twisundwrai amchaini bolong bedekni o sebuk yakarjak Udai Rai Kalai. Nokha talchichar(18 Month) o Dragon buphangni bwthai-athairog thaina kok tongphano phiya nokha talchisa o bwthai akorog thainani chengkha twrwk twrwk. Aboni bagwi khatungjak Bolong bedekni sebuk yakarjak Udai Rai Kalai. Jesa Hukbar khwlaithani kisa misa rang thangphano eba baiphano thinango o bwthaini bisingtwi hasteo rangni bwkhak belai hamari phaiwi mano eba rangmarini bwkhak belai swlaimung kotor tubuwi mano o Protine gwnang Dragon bwthai. Tangsamung kwrwi sikla siklirog o bwthaini bisingtwi yapri thong ragwi mano. aboni bisingono hasteni kaichar hangkhorogni juda juda kami amchairogo tabuk twrwk twrwk kainani chengjagwibo tongo. Hasteni sikla siklirog tangsamung kwrwi wngwi tongnairogbo Dragon buphang kaimani bisingtwi thinango kwchwng pohor nugwi mano. kok hinkhe abosi bisiknwi (2 Years) swkang Forest Range Office ni achukthai yakarmani Udai Rai Kalai. Tabuk yapri sejak Dragon bwthaino naisigwi. Udai Rai Kalai Sebuk yakarwi haino ereng ereng nogo achuk tongna naiya. Tangwi hinkhe thinango bo mungsaya mungsa samungbai gwdalwi eba kwrwngwi tongnani muchungjago. Aboni bagwi 2019 bisini kwchar majaro baithangni nok ganano phangsa phangnwi puila kainani chengmani Dragon buphang. Nok gana kaimani buphangrogno hamsama nugwino teibo kha bachamani Udai Rai Kailai ni. Jorao kubun samung tongphano o buphangrognobo kahamkhe naikini khwlaina nango tei khaksa bwkhak kami amchairogo joto malmatarogbo phiyogwi rwjak athani hamya wngwino mano. aboni bagwi kisa saktharwi naikini khwlaina nangkukgo hwnwi sakha Udai Kalai.
2020 bisi August talo Khowai-Teliamura lahar ganani Trisabari amchaini kanik ba thaio baniyani bagwi hwnwino phang nwiraswk kaimani Dragon buphang. Oram oramno dalbidal khwlaiwi naikini khwlaio Kalai babu. Kaimani nokha talchichar nangliya, nokha talchisa ni bisingono mwkhango mwnwimung phaijak Udai Rai Kalai ni. Buphango bwthai akorog thaimano nugwi kha swrangwi phaimani. Phiya puila bwkhak wanajak tongmani o buphangni bisingtwi bwthai athairog thade thaino thaiya? Tabuk phiya khapang kha swrangsawi phaimani kokrog sakha. Nokha taltham o waiba(5 Times) bwthai thaio Dragon buphang. Tripurani baniya hatirogo sana thangkhe kahamno choliwi tongo o bwthai phalthanirogo. Jephuru Dragon buphang bisik ba bisikdok wnganw aphuru teibo bwthai kwbang thaikukgo. Aboni bagwi chango ri khawi teibo khapurumjak Udai Rai Kalai. Tei khaksa bwkhak Tripura ni hatirogo tabuk kaham khwlaiwino phalmani nukjagwi tongo. Bwskangni salno simino tabuk naisingjak Udai Rai Kalai.
O Dragon buphang kaithani aswk kwbang rwna nangya twirog. Hachuk mura thairogo kaikhe belai hamkugo o buphangno. Haphang tomung abono twiwi yapri naharkhe sirisitini simi huk haba khwlaiwi phainairogni talikha teibo hamkuknai tei rangmarini hamkwraio teibo bangkhamu hwnwi khakajak Kalai babu. Abono karwibo Khursathai kwlai Dragon hukbar khwlaijago kwbang khwlaiwi Mexico, Southeast Asia, India , The United States, The Caribbean, Australia abohai ha kotor thairogo. Chini ALM ni koktwma thumnaibai teibo swngmung tisajakma ulo Udai Babu sakha, Drogne buphang kaithani joto kanik ba thaio rang thangkha khok dokchi sai( 60 Thousand) . phiya o rang thangmani nokha talchisani bisingono aboni swlai kwbang ajiwi mankha. tei Tripurani haiyakheba hayungni joto tong kosong tongnai lukurogbo Drogne buphang kaiwi nukhung hamkwrai khwlaiwi mano eba mwthangmung manwi mano hwnwi sakha.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"