Tripura kaisa Bharat ha kotor ni chikon sa naithothok haste,oh chikon sa hasteo kwbang ma juda juda kanmwng ,chunmung tei chamwng nungmwng bai gwdaljak, O chikon sa hasteo bebagwi chichuku (19)njuda juda dopha tongo hinui saimanjakha haste haphang ni swimwng blai ni bising twi.O bebak chichuku dophawi no tripuri dopha hinui chwng sini jago bharat ni Nwichichar(28)hasteni luku rok bai.
O chikon sa hasteo kwbang ma tripuri rok ni juda juda Ter tei Panda songsajago bisi brum no,tei joto Panda tei terwo no kaisa bwinisai nang kuk mani wng kha Chuwak bwtwk,hya khe ba Gora Bwtwk hinjago.Phaidi hinkhe chwng tei bo silai nai boro nangkuk o gora bwtwk tei bahai khe swnam jak o gora bwtwk .
Tripuri dophani khoroksa umor gwnang Bukhukjwk Pramila Jamatia tei khorok sa takhuk Jagat bandu Jamatia samatwi O Gora bwtwk kwrwi hinkhe Tripuri dophoni panda se chaya.O Dophani kaisa buini sai sini jak kuk mani Ter kotor, Garia Ter hya khe ba Buisu terwo bw O Gora bwtwk krwi hinkhe ter c Chengwi maya hinui sakha. Omo o haste ni sirisiti ni simi no wngwi faimani, o raida bisi brum brumno palai jagwi phaio, hukumu mukumu ni nokphang okra chakra rok ni simi tabok swk jora,O haste wo joto tripuri dopha ni luku rok omo haikhe hohom dodom khe o gora bwtwk bai no bebak ter tei panda no palai jak wo hinui salaikha ,tei bukhuk Pramila Jamatia sai khwna rokha bahai khe Nai,Chuchu tei okra,chakra rok fwrwng matwi tei samatwi o gora bwtwk no bahai khe swnamjak hya khe ba sung jak o dophani puila sirisiti ni simi tbk swk jora.
O Gora bwtwk hya khe ba chuwak bwtwk no tripurijwk rok ni yak bai no swnam jago.o Gorano swnam nani bagwi belai khe nang kuk mani manui wng kha Mairung tei Chuwa bele.
Chuwa beleno swnam nani hinkhe puila mairung no twi wo chom woi tong ro jago,boni yagula marung kochom phuro twi no khibi rohorwi mairung no simi narwk woi bono Rwsam bising dawoi romo bai sugwi kwsap khaiwo.O mairung kwsap bai baksa nw chuwathwi,chuwa blai,risum,moso,gadrwi bwthama rokno bo mairung bai baksa bool woi sukjago rwsam bisingo.Haikhe yak bai dol woi bele khe swnam jago,boni yagula satungo fwranwi kwran khaiwi narwk tongrojago.
Teibo poreinaidi:Tiprasa ni chamung no hayung ha kotor o tunsanani naharmung
O Gora bwtwk no swnam nani hinkhe puila mai songwi nagrao.Mai monwi kiyok bai mani yagulo o mai komon no waruk ni ramthai,thalwi blai hya khe ba pulithino pheharjago rojago mai komon no,boni ulo mai kwchang baikheno,chuwa bele no kwsap khe phere woi,o mai komon bai kaham khe bolwi langio dawi rio, haikhe o langi no kholobwi rojago nokbar manya wngna twi.Hornui hinkhe no o mai bai chuwa kwsap bol jak Gora bwtwk chawoi thango.Abo haikheno o langi kholopjakno phiyogwi chungino(straw made with bamboo branch) langi bising kaiso woi nung laio hya khe ba wasung bai phano khoksawi gora bwtwi simi khe sake woi nawi nung laio.
Omo haikheno o dophani lukurok ter brumno bisi brum brum o gora bwtwk bai ter palaiwi phailaio.Omo simi bai pya kho,dophani Okra chakra rok o kok bo salaio,o Gora bwtwk nungkhe kisa misa kongrai,kulum wng mani rok bo hamo hinui.Tei nogo nograi tei ochai phaikhe bo o gora bwtwk bai no nograi rokno hamjakma tei kha kaham lamsok mwng yapharlaio .Bebagwi sana thangkhe o Gora bwtwk no kaisa o dophani hamjakmwng ,khulumwng yaphar mani tei funuk mani bagwi belai nangkuk mani kaisa manui,o Gora bwtwk no tong thok chathok ,hohom dodom ,takhuk bukhuk thusa khe malai mani sal ,kailai panda tei ter kotor wo no buini sai belai nangkuk o dophani sirisitini hukumu mukumuni simino.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"