Chini Tripura hasteo chwng waa ni swnaamjaak manuirokno belai khai samungo phwnango. Aigi ni saal o jephuru electricity sokphaiyakhu phuru chini nana chuchu song khe kerosene ni lamp no sogu. Tobu tini ni dino powercut wngkhe chwng moombati sogo. Hinkhe moombati no bo chwng naithok khe waa bai swnaam mano. Amohai waa ni moombati toh mwtaaini bwswkango bo sogui maano. Ang obohai moombati swnaamnani rwngo tei aang tini norok no bo phwrwngano:
Maamblaisai swkang khe bolongo thangwi waathwi waa ma taanano. O waa kisa kwra tei milik wngna nangano.
Aboni ulo ang taanjaak waa no satungo phwrano salsini jora twi. Waa ni aroni twi rog raan rina bagwi. Tamo ni hinkhe waa kwthang no kwthwi ma khai nai chwng.
Waa ranribaima ulo khe o waa kolok no bara bara khai tai waa ni bothor naragwi rawo. Aboni ulo kaham khai waa no kaisa ree bai huwo. Ulo khe POP (plaster of Paris) no wa ni bisingo phulnai. O POP no chwng khai kuphur cement bo hinoi mano. Tai hinke abo no building tang furu rogo bo rijagu. O POP no waa-o phulnai tamonikhe o hor swlak yaa ni bagwi. Bisingo plaster riya khe o wa ni moom-holder khamui thaangnai. POP phulma porewo chwng o plaster no raanrinai.
Moom chakka paina mano bazaro. Aa moom no kisa raoi kaisa steel ni batio khlai naha nai tei abono kisa muthungwi goli rinai. Aboni ulo khwtwng kisa bara khai rai naha nai. Aa khwthwng bo bazaro pai na mano. Tai kaisa kok khai chwng chum mani rwjai rog sup mani aa khwtwng no abo.
Khwtwng bai moom no thepa nai waa-o. Ulo khe kisa joratwi moom bwtwi no fwran nai tai kwrak khai nai. Ulo khe waa ni fataro color rinai. Je naithok jak mani color no fului manu sajogwi naithok naithok khai.
Tai hinke chwng o moom no chini kwbangma panda ni saal rogo samungo phwnang maano. Chini birthday wngthwng ba Diwali tei Laxmi Puja, chwng o moombati no naithok khai sajogwi maano. Nirokni para rogo mela rog achukkha hinkhe aaro bo nwng obohai khe swnaamui phaloi maano.
Ang puila o samung no khai man glak na hai hinwi wansuk mani. Nai khai kisa kutuk hai maa tongu. Hai fano ang bar bar chesta khai naikha, aboni ulo twlwk twlwk khai maan thangkha. Ang belai khai no kha o tongthok kha o samung no swrwng gwi. Ang je o samung khai manma hai no tai kubuni borok rog no bo fwrwng na muchungu. Tai kaisa kok hinke ang bo tabuk o samung no khlai falwi tongu tei kaham laab mano. Nogo tongtwtwi no chwng o samung no khai mano. Hinke takhuk tai bukhuk song no aswk jora twi no ani kok. Tai waa ni moom bahai khai swnam jakkha abo no twi swi mung oro paikha. Hambai.
This article is created as a part of the Adivasi Awaaz project, with the support of Misereor and Prayog Samaj Sevi Sanstha.