Jamatia Borok Rakma Chomani Yagulo Bahaikhe Luku Song Samwng Humwng Khai Saimandi

Thwinai borokni santai tei jaiti rok borung no kitingwi yak romlaiwo

Rakma chomani wng kha o swngsar ni raida. O raida no kebo yokgwi maya. Sal fai khe hor wngmahai nw chini mang bo. Mang kwthwi no twigwi bwini dopha gw raida tong mahai, Jamatia luku gobw raida kaham swnam jak tong gw.

Hasteni Jamatia luku rokni bisingo khoroksa nukhung ni borok thwi kha ekhe nukhung gw tong nai jefa khoroksa thangwi eba bwini khuktwi luku chokdiri no koktun (news) tungw. Luku chokdiri koktun mamani yagulo lukuni chongjak khadol no sakhe khadol lukuni jotto nogo nogo thangwi koktun tungw. Haikhe nw parani jaiti gusti takhuk bukhuk rok jotto koktun mabai gw. Luku go tong nai jotto borok rok nw chubachu khai fai bai gw baksa khe ba bufang, baksa kheba bol simalwng go tungw tei baksa khe mangkwthwi no sokjak nai simalwng go borung swnam gw. Kamini sikli chaslok rok tei sagwnangma rok khe ba khum khol lai gwi khutwrang sulaigw tei baksa kheba mang kwthwi no twlang jaknai tolai swnam gw.

Kwthwi no simalungo tilang jaknai tolai waa bai swnamjago

Maikhlai barogwi bwsa bwtwisong mai mui charoi rohowu

Mang kwthwi no simalwng go twlangya kho swkang bwsa bwtwi, takhuk bukhuk rok twi tukuk rogw. Twi tukuk robai mani yagulo thok motom fulgwi, bwkhwnai khalgwi, chumwng kanmwng kwtal karogwi sajokgwi thuyam khaigwi mokhol rojak gw khula jaga gw.Mokhol gwi rojak mani yagulo khutwrang khum karogwi boklai gw tei boni yakung tola go faruk bwthar gwi thwinaini loge song roho jak gw. Boni yagulo jotto bwsa bwtwi rok thwinaini mwng twi boni yakung tola gw maikhwlai barok lai gw eba paithak ni chamwng rojak gw tei debwra yak bai charo gw. Haikhe mang kwthwi no tolaigo mokholwi rwchamwng bai khan (musical drum) bai khe luku rok simalwng gw twlang na balsa khe bwsa rok hago magoirok gw, tei tolai no nok busu go fwnang gwi twlangwi thang jakgw.

Tolai simalwng sok mani yagulo mang kwthwini mwkhang tei waisa nairwk laigwi simalwng ni borung gw tisai rojak gw. Boni yagulo jotto santai rok bai jaiti gusti bai khe borung no kitingwi yak romlai gw tei bwsa roknokheble nw bising go hopeng kongnwi yakgo twi rogwi debwra waitham guri rojak go, hor buchuk bai buchuk khorok digi kaisa, yakung digi kaisa khe waitham hor malai rogwi Hari bol Hari ni mwng nagwi hor rogwi rojak gw. Hor romani yagulo kifil gwi nogo thangphuru kebo firokgwi manahoya tei twitukuk gwi kwthar khe nogo mathangw tei dondo dosa jabra bongbra go kwchai tongrwk lang thwng hwnwi khachoi makabo gw. Nogo thang mani yagulo noksing hapya kho swkang sotwi (turmeric) no kwpal fulgwi , da no buwa bai wargwi tei hosuda bai hor kohongwi tei tulsi bwlai ni twi bai sakno kwthar khaigwi noksing go mahawu.

Omo rok wng kha rakma chomani yagulo mang kwthwi no twigwi samwng humwng eba raida. Luku hamabai aswk kotorma samwg humwng swrasa bai nw chagwi thang gw. Ang khakhlai gw nirok bo Jamatia luku rokni o chubamwng raida no chajak khwna hwnwi.

This article is created as a part of the Adivasi Awaaz project, with the support of Misereor and Prayog Samaj Sevi Sanstha.