Jora kaisao chini borokrog huk khwlai chama tongoi tongphuru chini bebak chamung nwngmung kanmung chummungni khwlai yakni kanmung swnamwi kano tei chamungnibo swnamwi tei yakbai nijini saichung sakbaino kaiwi tei sakni kolomtwi khiklaimani ajimungbai ahaikhenu chawi phaimani jora.Chini borokrogni bagui kanchum sunani bagui kwdwkma jora rogo mungsa kwrwi phuru rogo 'Thapwlani Chakwi tolwi' abobai ri-kan, sulai phaijao.Tei chini Tiprasarogni chamung moi kotor eba moi okra ni bisingo chakhwi mongui moi songui chalaima nukjago, ah chakhwi chamani bahaikhe Cha tei chakhwi tolwi chalai phaimani bisingo chini Thapwlani chakhwi Tolwi chama bwswk jora kaham abono tini chwng khwnalainai chini borokrog ni kokbwthaio.
Manjuri Debbarma ni kokthaio sawi khwnarwkha"Chini chalai jora rogo tei ani maapha ni swkang jora rogo chwng huk khwlai phuru siping hukgo kaio.Tei chwng chakhwi tolwi chamani agiphuru hinkhe hukni siping no nokgo tubui siping swkrai narwkgui abono thapa hor o karaio yokgui thapwla swnamwi chao chakhwi tolwi chao.Tei ah siping ni chakhwi hinkhe jotoni sai chakhwi kothok hinui sajakgo aboni bagui chini borokrog agini jora rogo abohaokhe kwbang chakhwi chalaijao,tabokbo juda juda thaio rogo huk khwlai chawi tongnairogni bisingo chini borokrog chawi tongkhwna abohai ma wansokgota.Phiya tabokni mol o hinkhe huk khwlaiya phano bol Thapwlani wa bolni abo bai bo chakhwi tolwi chao.Haiophano sana thangkhe kom nu nukjakbaikha suja tei kwlai naitokbaikha abo hatio manma 'Soda' abono kwbang chamasi nukjakgui tongkhabla tabokba."
Thapwlani ni chakhwi tolwi chamani tei Hatio manma Soda chamabai tamo pherlai?
"Hatio manma Soda ba moi songjak nukhe sijak tongo rimiwi tongo rei abo chakhe bohokrog sao,bohorokrog rwswkgo,bismarog kiyoro eba gastric bario hinjakgo tei ang nijibo panda rogo thangui machai phaikhe sak hamya uthalio sakni bemar barima saimano.
Tabok chini Yakbai Thapwlani ni chakhwi tolwi chamani abo belaino kaham,chini toljak chakhwi moi chawi sak swrwng swramgwi ma tongo.Tei sakni bemar rogbo hamrwo abo ang simibo saya jotono sabaio.Ani joratwi je manwi kahamno chawi sakni bemar hamo tei sak swrangwi ma tongo hinkhe abo belaino kaham chini jotoni bagui,tei Hatio pai chayawi chini lukurog chakhwi tolwi chalai khe kaham wngnaita."
Tamoni bagui tabuk Hatini Soda bai chakhwi chalai tei tangui chakhwi tolwi chama kom nukjakha?
"Chakhw tolwi chanabo kisa kok kakkwbangbwngo tabok bol wa kaham ni eba bol kahamni Thapwlani chana nangu abo bol hamya hinkhe bo wngya chakhwikhol eba chayakhok aborogno kahamkhe wanai nukjaklia Hatio bo salbrum manthoklia bla abagui kisa kosto khwlai chama nangma bagui Hatio manma rogno naharwi kosto kwrwi khwlai chabaikhata."
Kosto khwlai chana nangmao kahamni bagui chana nangmao tamokhwlainai?
"Waisa waisa chakhwi toljak phuru kwbang khwlai narwkgui botol rogo dawi narakmano tangui hinkhe chakhwi aswk dati dati hamya wngui thangya.Tei chini borokrogni bagui Hatio chakhwi tolwi phalwi mankhe bo belai chanai abo hinkhe tabokrogo joto borokni nukhungo thapa hor mwswngjaklia kwbang borok gas bai mamoi song chalaio abagui, phiya chini chakothok chaborok abono kebo chaya tongmaya haini bagui. Hatio chakhwi toljak phaljakkhe chawano hinuimano."
Tabok chwng kahamkhe saimankha Thapwlani chakhwi tolwi moi songui chajakmarog wngkha bwswk joratwi kaham.Tei chini borokrog ni kokbwthaio sakni kahamni bagui kwthang tongwi thana bagui cha kaham khwlai kosto khwlai chama aborog chini Tiprasarogbai kaham mukumu gwdalwi phaino tongkhob tei taboksak jora romwi komorna rwya wngui tongna lama phiyokjagui narwkgui tongjak.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"