Kaham tei hamya no logi twiwino hasteni hamkwrai tei hayaung hamkwrai. Abohaino kaisa wansukmung naharwi nangkukjak yapri naharkha Tripura ni Goria Hukumo Bodal welfare Society. Tripura hasteo kwbangma rwchapkwrwngrog tongo. Haiphano Mokol nukya wngjak rwchapkwrwngrogni kokno khorogo wansugwi khoroksabo yapri naharnai kwrwi. Ayang bwkhak naisigwino Society o yapri naharkha.
Salsani hojak khwlaima panda songsajakha Tripura ni 6TH Schedule Area TTAADC Santi Kali Mission . Chubachu khwlaithani tongo TTAADC, kokthum hukumu bedek. Tei khaksa bwkhak panda chengna swkang Santi kali Mission o kwrwija nukhungni swrwngnairogno ri-chumbo bakjakha. Sathai kwlaio o Mission Tripura hasteni kaichar hangkhorni kwrwija nukhungni cherairogno naiwino swrwngmung rwjago mungsa rang ri naharyawi. O missionobo chubachu rwkha Goria Hukumo Bodal. Jotowi swrwngnairog tongo khorok bara(500 students). O Mission phwrwngmung rwjago remchi jora. Abono karwibo 2022 bisini Madhyamik amjokmung pass khwlaijakrognobo borom tei swilai yapharjakha. Goria hukumo Bodal welfare Society ni naharmung kwrwija bororokno bahaikhe thinango bwskango twlangwi man. O naharmungno twiwino bodol ni twiphang eba rwchapkwrwng Bishudeb Kalai o yapri naharkha.
Tei khaksa bwkhak O salsani hojak khwlaima pandao mokol nukya rwchapkwrwngrogni bisingo tongo Korendra Tripura. Nok Tripura ni Gandatwisa hangkhor o Raishyabari . bo khoroksa mokol nukyaphano rwchapkwrwng, swirwngkwrwng. Ranjit Debbarma. Nok Tripura ni Sepahijala hangkhorni bisingo khobjak Jampuijala o. bo khoroksa rwchapkwrwng tei sumwi subkwrwng. Rayeltithoi Halam. Nok Kailasahar tei khoroksa rwchapkwrwng hwnwibo sinijago.Ratha Jatra Jamatia. Nok Tripura ni Khowa hangkhorni bisingo khobjak Mohar kami. Bishram Debbarma . Nok sepahijala hangkhorni Maharam kami tei Barsai Nanda Molsom. Nok sephaijala hangkhorni Thelakung bari .
O khorok dok no (6 Persons) mokol nukyarogno Live Performance khwlaikha tei borogno borom bwlaibo yapharjakha. Abohaikhe panda songsama bagwi panda luajinai tei ADC haphangno kha kaham yapharkha mokol nukya rwchapkwrwngrog. Bwskangni salobo teibo Tripura abohai jwngjalo kwlaijak bororokno thinangno swkangwi tubuna wngthun hwnwibo koimung borogni. Kokthumno rwksawi rwchapkwrwng eba Goria Hukumo Bodal ni tangphang okra Bishudeb Kalai sal kwdwkma romwino mokol nukyarogno twiwi samung tangwi tongo. Bwskangni salo mokol nukya wngjakrogno teibo rutugwi tikhwlaina tei sep sab yapharjakna wngthun hwnwibo sakha mokol nukya rwchapkwrwngrog. A salo mokol nukya rwchapkwrwngrog bisi kwdwma romwi dal dibda jwngjalo kwlaimani eba birmano kwlaimani kokrogno sawi khwnarwkha pandao. Salsani o hojak khwlaimani panda eba sicharwmung panda teibo phuwarjakthun hwnwi khao chongjak tei kha kaham yapharkha ADC haphang tei Goria Hukumo Bodal no.
Bishudeb kalai bo khoroksa rwchapnai wngwi samanikhe hai jephuruphano rwchapmungni panda akorog khwlaina thangkhe kamini lukurogbai koklam salaio. Norogni kami eba moyalrogo mokol nukya rwchapkwrwngrog tongkhe ano rohorjadi. Bisi kwdwkma rutukmani ulo tripura hasteni kai char hangkhorni bisingo khorok dok mokol nukyarogno thumsa khwlaikha. Abono karwibo Bishudeb babu sakha borogno talo waisa khwlaiwi tangrang rwjakmani aborog belai kisakhe rwjago. Aborogno tei kisa kwbang khwlaiwi rwnani bagwibo ADC haphang tei Tripura Govt. no koimung rwkha.
Tei khaksa bwkhak Bishudeb ni naisikma wngkha mokol nukya wngjakrogno twiwi puila yapri sema ADC amchaini Santi kali Missioni simi chengmani. Aroni simi Tripura Govt. Borogno twlangwi panda khwlainani tei paithago India ni Parliament Bhawan o thangwi mokol nukya rwchapkwrwngno panda khwlainani. Abobai baksa Tiprasani sinimungnobo hayung haa kotorgwnangwi phunuknani mokol nukya rwchapkwrwngrogno logio twiwi.
"O kokbwkhal swnamjakha Adivasi Awaaz projectni bwkhaktwi, Misereor tei Prayog Samaj Sevi mothani chubamungbai"